مەرگی ژینا ئەمینی، بنەمای سەرهەڵدانێکی شکۆدار (بەشی دووەم)

Monday, 24/10/2022, 20:53

939 بینراوە


٭ پانۆڕامای خۆپیشاندانەکانی خۆرهەڵاتی کوردستان

لە ئەدەبیاتی زانستی دا دەوڵەتی ئێرانی بە سیستمی ”جووت دەوڵەتیی“ Dual state یان دەوڵەت لەناو دەوڵەتدا ناودەبرێت. واتە لە ئێران دا دوو دەسەڵات، دوو دەوڵەت بوونی هەیە: دەوڵەتی یەکەم بریتییە لە حکومەت و دەستور و پەڕلەمان و سوپایەکی فەرمی و سەرۆک کۆمارێکی هەڵبژێردراو، دەوڵەتی دووەم بریتییە لە دەوڵەتی ئاخوند (ڕەهبەر - ڕابەری شۆڕشی ئیسلامی ئێران) و ئەنجومەنە هەڵنەبژێردراوەکەی دەوری ڕابەر و سوپایی پاسدارانی نافەرمی، کە ئەرکی سوپایی پاسدران پاراستنی دەوڵەتە ئاخوندییەکەیە. لە ڕاستی دا دەوڵەتی ڕەهبەر، دەوڵەتە نا فەرمییە دینییە کۆنتڕۆڵنەکراوە ڕانەگەیاندراوەکە، دەسەڵاتی زۆر گەورەترە لە دەوڵەتی یەکەمی فەرمی ڕاگەیەندراو، تەنانەت نەک ناتوانێت بە هیچ جۆرێکی بڕیارەکانی دەوڵەتە ئاخوندییەکە ڕەدبکاتەوە، بەڵکو ناتوانێت گفتوگۆیشی بکات.
ئەوەی ئەم دوو دەوڵەتە لە ئێران دا بەیەکەوە گرێئەدات تیورەی ”ویلایەتی فەقیە“ە، کە تیورەیەکی دینیی سیاسییە و بەو سیستمە ”جووت دەوڵەتییە“  ناوەرۆک و شوناسێکی دینیی، دەبەخشێت.
ئێران هەموو هەوڵێکی بۆ ئەوەیە ئەم مۆدێلە بگوازێتەوە بۆ هەموو ئەو ووڵاتانەی هەژموون و دەسەڵاتی تێدایە هەیە بە تایبەتی عێراق، دامەزراندنی (حەشدی شەعبی، حەشدی شیعی)ش هەر لە سەر هەمان بنەما بوو.
لێرەوە دەگەینە ئەوەی هەر سەرهەڵدان و خۆپیشاندان و شۆڕشێک لە خۆرهەڵاتی کوردستان و ئێران دا دەربکەوێت، دەبێت تێکۆشان لە دژی دوو دەوڵەت بکات، دەوڵەتی ئاخوند و دەوڵەتی فەرمی. ئەمەش تەنها بە گەلانی ئێران دەکرێت، چونکە هیچ هێزێکی دەرەکی لەگەڵ ڕووخاندنی کۆماری ئیسلامی ئێران دا نییە، مەلەفی خستنی کۆماری ئاخوند لە سەر شەقامی ئێرانییە، نەک لە دەستی هێزێکی دەرەکی، چونکە ئەمریکا و ئەوروپا نایەنەوێت بە ڕووخاندنی ئێران هاوسەنگی نێوان سوننە و شیعە لە ناوچەکەدا تێکبچێت، ئەمە لە کاتێک دا هەموو هەوڵەکانی ئەمریکا لە ساڵی (1991) لە دەرکردنی عێراق لە کوێت و ڕووخاندنی ڕژێمەکی سەددام حسێن لە ساڵی 2003 دا و پیلانگێڕی داعش و لە ناوبردنی لە ساڵی 2013  - 2017، هەموو لە بەرژەوەندی ئێران و هەژموونی شیعە دا شکاوەتەوە. تورکیا لە ترسی بەهێزبوونی کورد لە ناوچەکە دا دژی کەوتنی ڕژێمی کۆماری ئیسلامی ئێرانە. ڕووسیا و چین لە دژایەتیکردنی هەژموونی ئەمریکا لە ناوچەکەدا لەگەڵ مانەوەی ڕژێمەکەی ئێران دان. کەواتە مەلەفی ڕووخانی ڕژێمی ئاخوندی ئێران لە دەستی شەقامی ئێرانی دایە نەک لە دەستی دەوڵەت و هێزێکی دەرەکی دا بێت.
سەبارەت بە مردنی خاتوو (ژینا ئەمینی) پزیشكی دادوەریی ئێران ڕاپۆرتێکی بڵاوکردەوە و نوسیبویان: "كۆچكردوو دوای نەشتەرگەرییەك كە لە تەمەنی (8 ساڵی)دا بۆی كراوە، توشی كێشە بووە لە بەشێكی كۆئەندامی دەماردا (هایپۆسالامەس). بەهۆی ئەم نەخۆشییەوە، كۆچكردووە بە دەرمانەكانی (هایدرۆكۆرتیزۆن- لوتیرۆكسین- دیسمۆپرسین) چارەسەر كراوە. رۆژی 13ی ئەیلول كاتژمێر (7:56) خولەك بەهۆی ئەو نەخۆشیەوە توشی بێهۆشی بووە‌و كەوتوەتە سەر زەوی، نەخۆشەكە توانای خۆگونجاندنی لەگەڵ ئەو دۆخەدا نەبووە، بۆیە لێدانی دڵی تێكچووە‌و پەستانی خوێنی دابەزیوە‌ و هەوڵەكانی بوژاندنەوەی دڵی لەسەرەتاوە كاریگەرییان نەبووە‌ و توشی كەمی ئۆكسجین بووە‌ و لە ئەنجام دا مێشكی زیانی بەركەوتووە. سەرەڕای گواستنەوەی بۆ نەخۆشخانە‌ و ماندوبوونی كارمەندانی تەندروستی، بەهۆی لەكاركەوتنی چەندین ئەندامی جەستەیی و كەمی ئۆكسجینی مێشكی، گیانی لەدەستدا. لەسەر بنەمای تۆماری پزیشكی لە نەخۆشخانە‌ و  پشكنینی (سی تی سكان)ی مێشك‌ و سییەكانی‌ و توێكاری جەستەی، مردنی ناوبراو بەهۆی بەركەوتنی زەبر بە (سەر) یان ئەندامە هەستیارەكانی جەستەی نەبووە". لە ڕاستیی دا ئەو ڕاپۆرتە، ڕاپۆرتێکی پڕ لە چەواشەکاری و هەڵبەسترا بوو، ڕاپۆرتێک بوو بۆ پەردەپۆشکردنی تاوانی پۆلیسی ئەخلاق.

٭هەڵوێستی نوێنەری حکومەتی هەرێم لە ئێران

ڕۆژی 9/10/2022 نازم دەباغ، نوێنەری حکومەتی هەرێم لە ئێران لە گفتوگۆیەکی لەگەڵ پێگەی هەواڵی (ئێرنای) کۆماری ئیسلامی ئێران دا وتی: "20 رۆژ لەمەوبەر لیژنەى هابەشی ئەمنی ئێران و هەرێمی کوردستان کۆبوونەتەوە و جەختیانکردوەتەوە کە نابێت حزبەکانی دژی ئێران، بارەگا و شوێنى مەشق و راهێنانیان لەنێو خاکی هەرێمی کوردستاندا هەبێت. پێویستە بارەگاکانیان چۆڵ بکەن. وەکو حکومەتی هەرێمى کوردستان توانیومانە تا رادەیەک چالاکیی ئۆپۆزسیۆنی ئێران لەنێو خاکی هەرێمی کوردستان سنوردار بکەین، بەڵام هەندێک لایەن درفەتەکان دەقۆزنەوە. ئەگەر حزبەکانی دژی ئێران بەگوێرەی رێککەوتنەکان نەجوڵێنەوە و سەر ئێشە بۆ ئێران دروست بکەن، حکومەتی هەرێم بڕیاری جدیان لەبارەوە دەدات".
 هەر هەمان ڕۆژ هەر لەم بارەیەوە (محەمەد پاکپور) فەرماندەی هێزەکانی زەمینی سوپای پاسداران، وتی: "مانگ‌ و نیوێك به‌ر له‌هێرشه‌كه‌ى سه‌ر حزبه‌كانى دژی ئێران لە هه‌رێمى كوردستان، وەزارەتی ئیتڵاعات گروپێکی دژبه‌رى ئێرانیان ده‌ستگیركردوه‌ كه‌ هه‌وڵیانداوه‌ لەناوه‌ندێکی ئەتۆمی لە ئه‌سفەهان ته‌قینه‌وه‌ بكه‌ن، دواى ده‌ستگیركردنیان دانیان به‌وه‌داناوه‌، ئیسرائیل لەبنکەیه‌كى هێزه‌كانى دژی ئێران لە هەرێمی کوردستان، کەسانێکیان هەڵبژاردوەو بردویانن بۆ ئیسرائیل‌ و پەروەردەیان كردون بۆ ئه‌و چالاكیه‌".

٭ وەڵامی پژاک

لە بەرامبەر دا سیامەند موعینی هاوسەرۆكی پارتی ژیانی ئازادی كوردستان - پژاك وتی: "ئێمە هیچ پەیوەندییەكی فەرمیمان لەگەڵ حكومەتی هەرێم نییە، ئێمە لە چیاكانی كوردستان كە هەمیشە لانكەی شۆڕشگێڕان بووە پارێزگاری لە كەرامەتی گەلی خۆمان دەكەین، ئەوڕۆكەش ئەو لانكەیە بۆ شۆڕگێران هەیە و  ئێمەش شەڕ و تێكۆشان دەكەین. لە هەموو بوارەكانی سیاسی، رێكخستنی‌ و سەربازییەوە لە نێوخۆی رۆژهەڵات دا هەین‌ و خەبات‌ و تێكۆشان دەكەین. رژێمی ئێران بەردەوام چ لە ناوخۆی رۆژهەڵات‌ و چ لە دەرەوەی سنورەكان هێرشی كردووین، بەڵام بە هیچ شێوازێك نەیتوانیوە هێزەكانی پژاك لە رەوتی ئەو خەبات‌ و تێكۆشانە لابدات. ئێمە لەسەر داوای هیچ هێزێك لەم ناوچانە جێگیر نەبوین‌ و لەسەر داوای هیچ هێزێكیش ئەم ناوچانە چۆل ناكەین. ئێمە بۆ ئازادی تێكۆشان دەكەین‌ و تەنیا داخوازی گەلەكەمان بە ئەساس دەگرین‌ و بۆ ئازادی گەلەكەمان تێكۆشان دەكەین. ئەو نوێنەرەی حكومەتی هەرێم كە بۆ خۆی قسە دەكات هیچ بەهایەكی لای ئێمە نییه و قسە و داوخوازییەكانی خزمەتە بۆ داگیركاری كوردستان".
سیامەند موعینی: "كوردستان خاكی ئێمەیە، پژاك بۆ ئازادی گەل‌ و نیشتمان بەدژی كۆماری ئیسلامی ئێران شەڕ و تێكۆشان دەكات. پژاك ئەو هێزە نییە كە ئەگەر پێیان وت تەسلیم بەو بچۆ ئۆردوگایەك دابنیشە، بچێت دابنیشێت. پژاك بە رۆحی شۆڕشگێڕی‌ و ئازادیخوازییەوە تێكۆشان دەكات، ئامادەیە بە "نانە رەقە" لە چیاكان بمێنێتەوە و بەربەرەكانێ بكات لەگەڵ هەر داگیركەر و كۆنەپەرستێك. لەكاتی گونجاودا دەكەوینەوە قوڵایی رۆژهەڵاتی كوردستان‌ و ئێران، ئەو دەرفەت‌ و ئیمكانەمان هەیە، دەتوانین هێزی كۆماری ئیسلامی توشی قەیرانێكی جددی بكەین، بەڵام ئێستا ئێمە پێمان وایە، قۆناغەكە رەنگە ئەوە نەبێت‌ و لەبواری ستراتیژییەوە بە گونجاوی نەزانین، بەڵام گەر مەجبور بین دەتوانین ئەو هەنگاوە بنێین".
سەرهەڵدان و خۆپیشاندانی شاره‌كانى خۆرهه‌ڵات‌ و ئێران لەزانکۆکان‌ و ناوبازاڕه‌كا ندا دژی حكومه‌ت زیاتر لە مانگێکە بەردەوامە، چاودێرانی مافەکانی مرۆڤیش باس له‌وه‌ده‌كه‌ن، لەکاتێکدا شەپۆلی ناڕەزاییەکان پێی ناوەتە هەفتەی پێنجەمەوە سەدان کەس کوژراون‌ و لەنێویاندا تەمەنەکانی خوار 18 ساڵیش بونیان هه‌یه‌.
چاودێری مافەکانی مرۆڤ HRANA کە بنکەکەی لەئەمریکایە له‌ئامارێك دا ده‌ڵێت:"لەدوای خۆپیشاندانەکانی 17ی مانگی 10 تاکو 12ی مانگی 11ی2022، 233خۆپیشاندەر کوژراون، لە نێو ئەو کوژراوانەدا 32 کەس تەمەنیان لەخوار 18 ساڵەوەیە".
هەر کە سەرهەڵدانەکانی ئێران دەستی پێکرد، چەند میدیا و مەڵپەڕێکی فەرمی پارتی دیموکراتی کوردستانی عێراق ئەوەیان بڵاوکردەوە کە پەکەکە هێزی ناردووە بۆ یارمەتی ئێران تاکو خۆپیشاندان و ناڕەزایەتییەکان سەرکوت بکات، لە هەندێك میدیاشیانەوە دەنگۆی ئەوەیان بڵاوکردەوە کە "پارتی ژیانی ئازادی کوردستان - پژاك" ئامادەیی دەربڕیوە بۆ كۆماری ئیسلامی ئێران كە سەركوتی خۆپیشاندەران بكات.لەم بارەیەوە (سیامەند موعینی) هاوسەرۆكی پارتی ژیانی ئازادی كوردستان "پژاك" بە (سایتی درەوە)ی ڕاگەیاند: "بەڕاستی ئەو چەواشەكارییەی كە بە زانابوون دژی ئێمە دەكرێت بابەتێكی كۆمیدییە.  پژاك لە 10-15 ساڵی رابردوو زۆرترین شەهیدی لە تێكۆشان‌ و خەبات بە دژی كۆماری ئیسلامی ئێران داوە. بەردەوام لە بەرامبەر كۆماری ئیسلامی ئێران دا لە بوارەكانی سیاسی، كۆمەڵایەتی‌ و ژینگەپارێزی‌ و تەنانەت چەكداریش دا، پژاك تێكۆشانی كردوە و بەرهەڵستكارێكی سەرسەختی ئەو رژێمە بووە. ئێستا شەڕێكی تایبەت لە دژی پژاك لەلایەن ئیتڵاعاتی ئێران، میتی توركیا و پاراستنی پارتی دیموكراتی ماڵی بارزانی لە ئارادایە. خۆفرۆشان‌ و جاسوسانی پاراستنی پارتی لە زەوییەوە هێزەكانی ئێمە شوناسایی دەكەن، ئێران زانیاری دەدات بە توركیا و ئەوانیش بە تەیارە و درۆن هێزەكانمان دەكەنە ئامانج. لە ئەنجامی هاوكاری هاوبەشی هەر سێ لایەنەكە (میت، پاراستن‌ و ئیتلاعاتی ئێران) بە دەیان هەڤاڵی ئێمە بە تەیارە و درۆنی توركیا شەهید بوون. ئەوە لەچوارچێوەی شەڕێكی تایبەت‌ و چەواشەكاریەكدایە كە دەزگای هەواڵگری (پاراستن)ی بارزانی لە كوردستان پەیڕەوی دەكات، ئیدیعای زۆر ناجوامێرانە و زۆر درۆیە كە جار جار هێندەی دووپات دەكەنەوە بۆ خۆیان باوەڕ بە درۆكەی خۆیان دەكەن، شتی وا چۆن دەبێت؟ ئەوە هیچ لۆژیكێكی سیاسی تێدا نییە كە پژاك وێڕای ئەو هەموو خەبات‌ و تێكۆشان‌ و قوربانیدانە بێت‌ و لەولاوە لەگەڵ كۆماری ئیسلامی هاودەست بێت. چۆن شتی وا دەبێت؟! ئەو ئینسانەی بڕوا بە شتی وا دەكات دەبێت چەند جار لە بواری سیاسییەوە بە خۆیدا بچێتەوە و فكربكاتەوە كە چۆن شتی وا دەبێت؟ فكری سیاسی‌ و عەقڵی سیاسی ئیجازە بەوە نادات، هێزی پژاك لە بەرانبەر كۆنەپەرەستی‌ و داگیركاری كوردستان دا چۆك دابدات‌ و سەر دابنەوێنێ، بەڵكو پێشەنگە و لە ریزی پێشەوەی گەل شەڕ دەكات‌ و دژ بە داگیركاری‌ و كۆنەپەرستی لە شەڕدایە. ئەو كەسانەی كە ئەو ئیدعا چەواشەكارییانە بڵاودەكەنەوە راستەوخۆ خزمەت بە دوژمنان‌ و داگیركەرانی كوردستان دەكەن".
ڕۆژی 12/10/2022 ئاژانسی دەنگوباسی تەسنیمی نیمچە فەرمی بڵاویکردەوە کە عەلی خامنەئی لە کۆبونەوەیەکیدا لەگەڵ بەرپرس و ئەندامانی خولی نوێی ئەنجومەنی دەستنیشانکردنی بەرژەوەندییەکانی ڕژێم (مەجمەعی تەشخیسی مەسڵەحەتی نیزام ) باسی لە ڕووداوەکانی ئەم دواییەی ناو ئێران کرد و گوتیەتی: "ئاژاوە پەرشو بڵاوەکان، پلانی دوژمنە بەرامبەر بە پیشکەوتن و داهێنانەکانی ئێران. هەندێک کەس دەڵێن نابێت دۆخەکە بکرێت بە دۆخێکی سەربازی، ئێمەش هاوڕاین و تا دەکرێ دۆخەکە بەرەو دۆخێکی سەربازی نابەین، بەڵام کاری کلتووری جێگەی خۆی هەیە و کارەکانی دادوەری و ئاسایشیش شوێنی خۆیان هەیە. هەندێک لە خۆپیشاندەران "یان بەکرێگیراوی دوژمنن، یان ئەگەر بەکرێگیراو نەبن، ئەوا لەگەڵ دوژمن دا هاوڕان. بەشێکی دیکەی خۆپیشاندەران "کەسانی وروژاو"ن کە دەبێت لە ڕێگەی "کاری کلتورییەوە چارەسەرییان بۆ بکرێت."
خامنەئی بەشێکی دیکەی خۆپیشاندەرانی وەک ئەندامانی ڕێکخراوی موجاهدینی خەلق، جودا خوازان، لایەنگرانی حکومەتی پەهلەوی و هەروەها بنەماڵەکانی ساواک ناودێرکرد و داوای لە دەزگای دادوەری کرد ڕووبەڕووی سزایان بکاتەوە".

٭ ناڕەزایەتی زیندانی ئەوین

شەوی 16/10/2022 زیندانیانی (زیندانی ئەوین) دەستیاندایە ناڕەزایی دەربڕینی دژی ڕژێمی ئێران و بەوهۆیەوە ئاگرێکی گەورە لە بەندیخانەکەدا کەوتەوە. زیندانیانی زیندانەکە بریتین لە خەڵکی سیاسی و ڕۆشنبیر و ناڕازی و مامۆستایی زانکۆ و مامۆستایی ئایینی و چالاکانی مەدەنی و سیاسی، لەبەئەوە هەندێک بە (زانکۆی ئەوین) ناویی دەبەن.
زیندانی ئەوین یەكێكە لە بەناوبانگترین زیندانەكانی ئێران كە ساڵی 1971 لە ناوچەی سەعادەت ئابادی شاری تاران دروستكراوە و زیاتر لە 15 هەزار زیندانیی لەخۆ دەگرێت و هەندێك لە بەشەكانی ئەو زیندانە لە ژێر چاوەدێریی دەزگای دادی دەوڵەتی ئێراندا نین و لە لایەن دامەزراوەكانی دیكەوە بەڕێوەدەبرێن، بۆ نموونە بەشی 209و 24ی ئەم زیندانە كە ژووری تاكەكەسی و فرە كەسی تێدایە لە ژێر چاودێریی دەزگای ئیتلاعاتدایە.
ڕیکخراوی مافی مرۆڤی ئێران ئاماژەی بە ڕووداوەکانی شەوی 16/10/2022 زیندانی ئەوینی تاران کردووە و تیایدا بەبیری هیناوەتەوە کە دەسەڵاتی دادوەریی ئێران، ڕایگەیاندووە لەو ڕووداوانەدا چوار بەندکراو گیانیان لە دەست داوە. 61 به‌ندكراویش بریندار بوون و 10 كه‌سیش لە بریندارەکان گواستراونه‌ته‌وه‌ بۆ ناوه‌نده‌ پزیشكییه‌كان، كه‌ بارودۆخی چوار كه‌سیان ناجێگیره‌.
ڕێکخراوی مافی مرۆڤی ئێران بە ئاماژەدان بە مێژووی ئێران لە شاردنەوەی ڕاستییەکان و مێژووی کوشتن لە بەندیخانەکان و ئاسایی بوونی درۆکردن لە نێو بەرپرسانی ڕوونکردنەوە فەرمییەکانی قبوڵ نەکرد و  داوای کرد بۆ تێگەیشتنی تەواو لە ڕاستییەکان و لێپرسینەوە لە ئەنجامدەرانی ئەم کارەساتانە، موداخەلەکردنی خێرای کۆمەڵگەی نێودەوڵەتییە بۆ ئەم کەیسە و دروستکردنی میکانیزمێکی جیهانییە لە ژێر چاودێری نەتەوە یەکگرتووەکان.
ڕیکخراوەکە ئاشکراشیکرد، ڕۆژی یەکشەممە ١٦ی تشرینی یەکەم، ئاڵۆزی لە نێوان زیندانیان و هێزەکانی حکومەت لە زیندانی ناوەندی شاری ڕەشت (لاکان) ڕوویداوە کە تێیدا بە پێی هەواڵە پشتڕاست نەکراوەکان شەش زیندانی گیانیان لەدەستداوە.
16/10/2022 کۆمیتەی زیندانییانی كۆمەڵگەی دیموكرات و ئازادی ڕۆژهەڵاتی كوردستان-كۆدارلەبارەی ڕووداوەكانی زیندانی ئەوین لە تاران ڕاگەیاندراوێكی بەناونیشانی "ڕژێمی ئێران بەرپرسە لە پاراستنی ژیانی زیندانیانی ئازادیخواز و ڕاپەڕیوانی زیندان" بڵاوكردەوە.
لە ڕاگەیەنراوەكە دا هاتووە: "كارەساتی هێرشی هێزەكانی ڕژێمی فاشیستیی ئێران بۆ سەر زیندانی ئەوین و كەوتنەوەی ئاگری گەورە لەگەڵ تەقەكردنی ڕاستەوخۆ لە زیندانیان، لە ئاستێكدایە، كە هێشتا لێكەوتەكانی بەهۆی قەدەغەكاریی میدیاكانی ڕژێم و نەبوونی شەفافیەت لە گەیاندنی هەواڵ و زانیاری دا، بە ناڕوونیی ماوەتەوە و زیندانی ئەوین لە شەوی 15ی تشرینی یەكەم هێرشی سەركوتكارانە و كوشتاری بە ئەنقەست تیایدا دەستیپێكرد.
ئاشكرایە كە ڕژێم بۆ سەركوت و دروستكردنی كەشێكی سەركوتكاریی و بێدەنگیی لە دژی زیندانییان، بەتایبەتی زیندانیانی سیاسی و چالاكوانانی مەدەنیی زیندانیكراو، دەست بۆ تاكتیك و سیناریۆی دروستكردنی ئاژاوە دەبات، لە بەردەوامیی ڕاپەڕینی 28 ڕۆژی ڕابردوودا، چەندین هەزار گەنجی ئازادیخواز دەستگیركراون و براونەتە زیندانەكان، بۆیە بێگومان ڕژێم لە دژی ئەو زیندانیانە سیناریۆی مەترسیداری داڕشتووە، بەڵام دەبێت ڕژێم بە باشی بزانێت، كە بەمجۆرە سیناریۆ سەركوتكارییانە ناتوانێت ڕایگشتی گەل و سەرنجی بەردەوامی گەل لەسەر ڕاپەڕینەكان بە لاڕێدا ببات".
ئێران ئاماده‌كارییه‌كى گه‌وره‌ و به‌رفراوانى ده‌ستپێكردوە بۆ هێرشكردنه‌ سه‌ر هه‌رێمى كوردستان، بە مەبەستی هێرشکردنە سەر حیزبەکانی خۆرهەڵات لە باشور، سوپایی پاسداران بەسەدان تانک‌ و زرێپۆش‌ و چەکی قورس‌ و فڕۆکە و کۆپتەری لە سەر سنوری خۆرهەڵات و باشور، لە سنوری پارێزگاى (ورمێ) کۆکردبوویەوە. به‌رپرسانى سه‌ربازیی ئێرانیش ده‌ڵێن، هێرشه‌كه‌یان به‌ئاگاداریى‌ و هه‌ماهه‌نگى حكومه‌تى هه‌رێم‌ و حكومه‌تى عێراقه‌.
سوپای پاسدارانی کۆماری ئیسلامی ئێران سەرقاڵی ئامادەکاریی‌ و کۆکردنەوەی هێز بوو لە سەرسنورەکانی هەرێمی کوردستان‌ و لەچەند ناوچەیەک هیزێکی زۆری کۆکردەوە و ئامادەکاریکرد بۆ هێرشکردنه‌ سەر هەرێمی کوردستان، میدیاکانی ئێرانیش باسیان لەوەدەکرد، تەواوی ئاماده‌کارییەکان کراون‌ و تەنها چاوەڕێی کاتەکەیان دەکرد.

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست