دیسان تورکیا و ڕۆژئاوای کوردستان و ئەمریکا!

Monday, 28/11/2022, 23:15

2456 بینراوە


دەسەڵاتدارانی تورک بە درێژایی مێژوو، هەمیشە لە بیانوویەک گەڕاون، بۆ ئەوەی قینی ئەستووریان دژ بە نەتەوەیەکی چل ملیۆنی هەڵڕێژن. ئەوەی ئەردوغان ئەمڕۆ بەرامبەر بە میللەتی کورد لە هەموو بەشەکانی کوردستاندا دەیکات، بەتایبەتی لە ڕۆژئاواو و باکوور و باشوور، میراتی پەیڕەو کردنی سیاسەتێکە، کە  چەند سەدەیەکە دەسەڵاتدارانی تورک، لە هەموو قۆناغە جیاوازە مێژوویەکانی جۆری سیاسەت و دەسەڵاتدارانی ئەو وڵاتە، بگرە لە تورکیای سوڵتانە موسڵمانەکان، تا تورکیای مۆدرنی ئەتاتورک و تا دەگات بە ئەردوغانی موسڵمانی مۆدێرنی ئەمڕۆ پەیڕەوەیان کردووە و دەیکەن، بۆیە ئەزموون و مێژووی پێکەوە ژیانی فرەنەتەوەکانی نێو تورکیا، بە تایبەتی لەگەڵ  گەلی کورد بە مانای وشە فەشەلی هێناوە. ئەو ئەزموونە پێمان دەڵێت، کە مەحاڵە میللەتی کورد بە ڕێگەی ئاشتیانە، دامودەزگەی حکومی و بەرقەرار بوونی سیستەمی دیموکراتی و پەرلەمانی تورکیا لە ئەنقەرە مافی خۆی بسەنێت،  بۆیە بەستنەوەی ئامانجی شۆڕش و خەباتی نەتەوەیی و نیشتمانیی بە گۆڕانی سیستەمی دەسەڵاتی سیاسی لە ئەنقەرەوە نابێت، لەبەرئەوەی بە درێژایی مێژووی تورکیا ئەردوغانێک دوای ئەردوغانێک هاتووە، کوردستانی وێران کردووە و کۆمەڵکۆژی دژی گەلی کورد لە هەرچوار پارچەی کوردستاندا ئەنجام داوە، یەک بەڵگەیی مێژووی لەبەردەستدا نییە کە ئەو ڕاستییە نەسەلمێنێت. 
تورکیا خاوەن سوپایەکی زەبەلاحە، بەڵام  هەمیشە خۆی لە جەنگی ڕووبەڕوو بوونەوەی زلهێزەکانی دنیادا پاراستووە.  سوپای تورکیا ترسنۆکە تەنیا بۆ گیانی نەتەوە ژێردەستەکانی وەک گەلی کورد ئازایە، بۆیە بە دڵنیاییەوە ئەگەر تورکیا لەلایەن زلهێزەکانی دنیادا چرای سەوزی بۆ هەڵنەکرابێت، ناوێرێت ئەمڕۆ هێڕشی سەربازیی بۆ سەر ڕۆژئاوای کوردستان ئەنجام بدات، ئەمریکا و ئەوروپا و ڕوسیا بێباکن لە هێرشی سوپای تورک بۆ سەر کوردستان، بۆیە متمانە دان بە هەر زلهێزێکی دنیا، هەڵەیەکی مەزنە، ئەزموونی کشانەوەی ڕوسیا، چەند ساڵێک لەمەوبەر لە عەفرین و ڕێگەدان بە تورکیا بەبێ کۆسپ هێرش بکاتە سەر کوردستان بەهێزترین بەڵگەیە بۆ سەلماندنی ئەو ڕاستییە. 
هێرشی تورکیا بۆ سەر ڕۆژئاوای کوردستان تەنیا مەبەست کاول کردنی ئەو دەڤەرە نییە، بەڵکو مەترسی بۆ سەر ئاسایشی ئەوروپا و ڕوسیاش هەیە، بە حوکمی شوێنی جوگرافییان. بێگومان هێرشی سوپای تورک بۆ ڕۆژئاوای کوردستان ، دەبێتە هۆی زێتر سەرهەڵدان و گەشەکردنی هێزە تیرۆریستەکان لە ناوچەکەدا، بەتایبەتی داعش و هەموو میلیشیاکانی سەر بە تورکیا و ئێران، کە لە ئاکامدا ئەو دارودەستەیە کارتێکی فشار دەبێت بەدەست ئەنقەرە، هەر کاتێک ئارەزوو بکات و بزانێت بۆی دەچێتە سەر، سوپاکەی چۆن ئەمڕۆ سنووری سوریا و عیراق و کوردستانیان بەزاندووە ئاواش سنووری ئەوروپا و ڕوسیاس دەبەزێنن، واتە ئەو چاڵەی کە ئەمڕۆ زلهێزەکان بۆ گەلی کوردی هەڵدەکەنن، لە داهاتوودا ئەو چاڵە بۆ خۆیان زۆر قوڵتر دەبێت، ئەوجا دووبارە وەک کاری هەمیشەیان، دەکەونەوە بەکارهێنانی پرسی کورد، لەگەڵ هێزە کوردییەکان گفتولفتیان خۆش دەبێت، دووبارە  میللەتی کورد لە ئەڵقەیەکی داخراودا دەخولێننەوە!
بەهێز بوونی تورکیا لە سوریا بە تایبەتی لە ڕۆژئاوای کوردستان، پێکانی ئامانجەکانیەتی وەک پاکتاوینەژادی  کورد و کەمەنەتەوەکانی دی ناوچەکە، دەربەدەر بوونی خەڵکی سیڤل و دروست بوونی کارەساتی مرۆیی، زیاد بوونی ڕێژەی کۆچ کردن بە تایبەتی بۆ وڵاتانی ئەوروپا بەهۆی سنووری جوگرافی، وەک یەکەم وێستگەی خۆ دەرباز کردن، کە ئەمە قورسایەکی بێ هاوتا بۆ وڵاتانی ئەوروپا دروست دەکات، لە کاتێکدا ئەوروپا بەهۆی جەنگی یۆکرانیاوە، لە هەموو ڕوویەکەوە ڕووبەڕووبەڕووی دۆخێکی خراپ و نەخوازیار دەبێتەوە، لەلایەکی دیوە دەبێتە هۆی گۆڕانی دیموگرافیا و جیوگرافیایی سیاسیی ناوچەکە. 
لەسەر ئاستی ناوچەکە و دنیادا، تورکیا یەکێکە لەو وڵاتانەی کە نموونەیەکی جوانی نەبەخشیوە بە ناوبانگی ناتۆ،  لە هەموو هێڕشەکانی بۆ سەر ڕۆژئاوا و باکووری کوردستان و سوریا، سوپای تورک  تاوانی جەنگی ئەنجام داوە، ژن و منداڵی بێتاوانی کوشتووە، دەستدرێژی سیکسی کردۆتە سەر خەڵکی ناوچەکە، پاکتاوینەژادی ئەنجام داوە، پاڵپشتی لە تیرۆریستان و دروست کردنی میلیشیا کردووە، بە دەیان هەزار دۆکیۆمێنت لە نەتەوە یەکگرتووەکاندا هەیە کە ئەم ڕاستییە دەسەلمێنێت، بەڵام ئەوروپا هەمیشە خۆی لەو ڕاستییانە گێل کردووە نەک هەر هەوڵی نەداوە لە ناتۆ دەربکرێت، بەڵکو وڵاتێکی وەک سوید کەوتە پارانەوە و ملکەچی مەرجەکانی تورکیا بوو، بۆ ئەوەی لە ناتۆ وەربگیرێت، ئەمە دۆڕانی ئەوروپا دەگەیەنێت، چی وەک پێگەی سیاسیان، چی وەک ئەو وڵاتانەی کە خۆیان بە پێشڕەوی داواکردن و دابین کردنی مافی مرۆڤ لە قەڵەم دەدەن. 
پێنتاگۆن لە ٢٣/١١/٢٠٢٢دا ڕایگەیاند:  "کە هێرشە ئاسمانیەکانی تورکیا مەترسی ڕاستەوخۆی لەسەر هێزەکانی ئەمریکا دروست کردوە، ئەوانەی وا لەگەڵ هێزەکانی سوپای سوریای دیموکرات شانبەشانی یەکدی دژی داعش لە ناوچەکەدا کار دەکەن". 
پێنتاگۆن، هەڵوێستێکی لاوازی بەرامبەر بە هێڕشەکانی تورکیا دەربڕیوە، وەک ئەوەی ئەمریکا وەک هێزێکی بچووکیی ناوچەیی بێت، کە خاوەن چەند بنکەیەک و گروپێکی چەکداریی بێت پێشان داوە، نەک وەک زلهێزێ لەسەر ئاستی دنیادا، کە بە یەک چاوسوورکردنەوە، دەتوانێت هێرشەکانی تورکیا ڕابگرێت. ئەمریکا سیاسەتێکی کۆنکریتی نییە بەرامبەر بە مەسەلەی کورد و دەسەڵاتدارانی ئەنقەرە. لاواز بوونی بەرەی سوریایی دیموکرات لە بەرژەوەندیی ڕوسیایە لە سوریادا. بەهێز بوونی تورکیا و فرەوان بوونی دەسەڵاتی لە ناوچەکەدا لە بەرژەوەندیی ئەمریکادا نییە، لەبەرئەوەی لە ڕابردووی نزیکدا دەمان بینی کە تورکیا هەمیشە لە سەنگەر گۆڕین بوو لەنێوان ڕوسیا و ئەمریکادا، ئیتر بۆ دەبێت تا ئێستا ئەمریکا متمانەی بەوە مابێت کە تورکیا باشترین هاورێیەتی لە ناوچەکەدا.
ئەزموون و مێژووی شۆڕشەکان و بزوتنەوەی ڕزگاریی نیشتمانیی میللەتی کورد، دەریخستووە کە خۆبەستنەوە بە ئەجێندای دەرکیی، دانی متمانەی کوێرانە بە زلهێزەکانی دنیا و ناوچەکە، بوون جاش و دارودەستە و  ئەڵقە لە گوێی دەسەڵاتدارانی بەغداد، دیمەشەق، ئەنقەرە و تاران، خامۆش کردنی بزوتنەوەی ڕزگاری میللەتی کورد، بەناوی کۆبوونەوە لەژێر چەتری هێزە ئازادیخوازەکانی تورک و عەرەب و فارس بە هەڵگری بیروباوەری مرۆیی، ئیسلامیی یان کۆمۆنیستیی یان نیشتمانیی عیراقیی و ئیرانیی و تورکیی بووبێت، لە دروشمێکی کەچەی، بریقەداری بێ سوود زێتر هیچی بۆ میللەتی کورد لێ شین نەبووە. ئەوەی لە مێژووی خەباتی ڕزگاری نەبینراوە، وەک یەکگرتنی میللەتی کورد لە چوار پارچەی کوردستاندا، کۆبوونەوە لەژێر یەک ئاڵا و یەک دروشمی تۆکمەی نیشتمانی و نەتەوەیی و پێکهێنانی یەک هێزی چەکداری پتەو و پشتبەستن بە ئیرادەی هێزی لەبن نەهاتووی میللەتەکە بووە، بۆیەش تا ئێستا کوردستان نەیتوانیوە، ببێت بە خاوەن دەوڵەت و سوپایەکی فەرمیی، کە بتوانێت لەسەر ئاستی دنیادا بچێتە هاڤرکێ، لەسەر ئاستی دنیا و ناوچەکە سامێ دروست بکات، کە سوپای دەوڵەتانی دەوروبەر هەژماری بۆ بکەن، نەوێرن بەکەیفی خۆیان لە کوردستان تەراتێن بکەن. تا ئەمڕۆ، هێزە کوردییەکان بیانەوێت یان نا، زلهێزە ناوچەیەکان و دنیا وەک میلیشیا مامەڵەیان لەگەڵدا دەکەن، هەموو سەرانی هێزە سیاسیی و چەکدارەکانی کورد، ئەگەر بەرژەوەندیی خۆیان وەلا نەنێن، ڕێگەی یەکگرتن نەگرنە بەر، بە دڵنیایەوە نیشتمان لە دەست دەدەن، میللەتەکەش تەرتەوورتە دەبێت و چارەنووسی وەک ئاشووریەکان و کلدانیەکان دەبێت، هەروها هەر ڕۆژەی سوپای وڵاتێک هەڵدەکوتێتە سەری، وەک ئەمڕۆ کە دەبینین تورکیا لە دەڤەرێک و ئیران لە دەڤەرێکی دی، سوپاکانیان بەبێ سڵمینەوە لە دەسەڵاتدارانی هەرێم و هێزە کوردییەکانی دی، بەبێ هەژمار کردن بۆ یاسای نێو دەوڵەتی سنووریان بەزاندووە، بەبێ شەرمی ڕۆژهەڵات و ڕۆژئاواو و باشوور و باکووری کوردستان بۆردوومان دەکەن!

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست