جێندەر و چەواشە کاری ئیسلامی سیاسی

Tuesday, 03/01/2023, 20:46

6064 بینراوە


ئیسلامییەكان، بە ڕابەرایەتیی چەند نیمچەخوێندەوار و گومڕاكەر و فەوزاخوڵقێنێك، هەراوهوریا و بەزمێكی بێمانا و بێپاساو و ناڕاستیان لەبارەی چەمكی جێندەرەوە درووست كردووە، ئەو نیـمچەخوێندەوارە سەرلێتێكدەرانە كە بەحساب هەندێكیان (كۆمەڵناس)ـن، زەنەقی كۆمەڵگەی كوردیی و مسوڵمان و ئیسلامییەكانیان لە چەمكی جێندەر بردووە و بە چاك و خراپ لەگەڵ باسكردنیدا یەكسانی دەكەن بە هاوڕگەزخوازیی و منداڵبازیی و بەرەڵڵایی. كە ئەمە بەلاڕێدابردنێكی خراپە، نادرووستە و مەترسیدارە، مەسەلەكەش بە تەنیا جێندەر نییە، بەڵكو ئەو شێوازەیە كە ئەو چەمكەی پێ دەشێوێنرێت، ڕەت دەكرێتەوە و بەشەیتانیی دەكرێت، ئیدی ئەوان یەك قاعیدەی بەرفراوان لە مرۆڤی ساویلكە و دڵپاك و دڵسۆز، تەییار دەكەن بۆ ئەوەی هەر كەسێك بیەوێت بتوانێت بێ هیچ هەستێكی ڕەخنەیی، بیركردنەوە و لەبێژنگدانێك هەرچۆنێكی بووێت بەو جۆرە ئاراستەیان بكا
جێندەر gender خۆی ووشەیەکی ئینگلیزیە ڕێک بە مانای ڕەگەزی مرۆڤ دێت و لەو ووڵاتانەی زمانیان ئینگلیزیە لە دایرەوقوتابخانەکان بەکار دێت . بەڵام بەشێکی ڕابەران ومەلاکانی ئیسلامی سیاسی وسەلەفی وەک پیشەی هەمیشەیان مانای ئەم ووشەیەیان گۆڕیوە بۆ ( هاوڕەگەز خوازی ) لە کاتێکا ووشەی بەرانبەر ئەمە Homosexuel. ئیتر هاواردەکەن و قسەی لە سەر دەکەن گوایا هەرکەس باسی ئازادی جێندەری کرد ئەوە هاوڕەگەز خوازە و بێ ئەخلاقە ئیتر ئەوە خێزان تێک ئەدا ودژی کولتورەو هتد . ئازادی جێندەری بە مانای ئەوە دێت هیچکەس مافخوراو نەبێ لەسەر ڕەگەزەکەی ئیتر نێرە یامێ یە لەڕووی مافە کۆمەڵایەتی وئابوری وسیاسی وفەرهەنگی یەکانیەوە یەکسان بن و ئەنجا لە ڕووی سێکس وخۆشەویستیشەوە ئازاد ویەکسان بن بەمەرجێ لەسەرووی ١٦ ساڵەوە بن. ئازاد بن لە ڕووی پێکهێنانی خێزان وهاوژینی . نابێ کچی منداڵی ٦-٩ ساڵان هاوسەرگیری پێ بکرێ نابێ کچ یا کوڕی خوار ١٦ ساڵ هاوسەرگیری پێ بکرێ بەتایبەت لەگەڵ کەسە بەتەمەنەکاندا ، نابێ فرە ژنی و زەواجی متعەو سیغە و لەشفرۆشی هەبێ و نابێ ژن لە سەر ناموس بکوژرێ یا ئازاری بدرێ وسووکایەتی پێ بکرێ . نابێ توندو تیژی و سووکایەتی هەبێ لەبەرانبەر ژن یا پیاو بەبیانووی جۆراو جۆر نابێ ژن بەهۆی جیاوازی پێکهاتەی لەشی یەوە مافی یەکسانی نەبێ لەگەڵ پیاو لە بوارە ئابوری وکۆمەڵایەتی وسیاسی یەکانەوە و لە بواری خوێندن وەرزش و هونەرەوە ..هتد ئەمە یە مانای ئازادی جێندەری . چاولێ کردنی ژن وەک ئینسان ئەو شتەیە کە ئیسلامیەکان تووڕە دەکات لە بەرانبەر سکۆلاریست وچەپ و کۆمۆنیستەکاندا ، چونکە ئیسلامیەکان ژن بە کەم عقل وزەعیف دەزانن بۆیە نابێ وەک ئینسان چاو لێ بکرێن و مافی ئینسانیان هەبێت بەڵام کۆمۆنیست وسکۆلاتیستەکان پێداگرن لەسەر بە ئینسان بوونی ژن ویەکسانیان لەگەڵ پیاو . ئەگەر ئەمە بەدەست بێ پایەی خورافاتەکەی ئەوان دەڕووخێ ئەوان ئەو ڕاستیە چاک دەزانن بۆیە بەهەموو شێوەیەک هەوڵ دەدەن کارو چالاکی لەم پێناوەدا قەدەغە بکەن . ئەگەر خۆیان دەسەڵاتیان هەبێ دەیکەن وەک لەئەفغانستانی ژێر دەستی تاڵەبان و جمهوری ئیسلامی ئێران دەکرێ یا وەک ئەوەی لە کوردستان بە پاڤێڵ تاڵەبانی دەیکەن (دیارە ئەویش لەم کاتەدا پێویستی بەوەیە چونکە حیزبەکەی زیاتر پێوستی بەدەنگ هەیە بۆ هەڵبژاردنی ئەمجارە ئەوە دەزانێ ڕووبەڕووی شکستێکی گەورەیە لەبەرانبەر پارتیدا ). ئەوان دەڵێن ووشەی جێندەر بیانیە نابێ بێتە ناو کولتوری کوردیەوە .ئایا ووشە عەرەبیەکانی ئێوە هێناوتانە ناو کولتوری کوردیەوە بیانی نیە ؟ ئێوە خەمی کولتوری کوردیتان نیە بەڵکو خەمی لەدەست چوونی کولتوری نەزانی وناهۆشیاری و خورافەن . یا دەڵێن ئەوانەی باسی جێندەر دەکەن دەیانەوێ کولتوری کوردی موسڵمان تێک بدەن و لەشفرۆشی بڵاو بکەنەوە وخێزان هەڵوەشێنەوە هاوسەرگیری نێرو نێر ومێ و مێ بێننە ناو کوڵتوری کوردیەوە !؟. لەمەشدا درۆ دەکەن هیچ کەس ئەوەی نەووتووە یەک بەڵگەشتان نیە لەسەر ئەو قسەیە . ئەمە چەواشەکاری وفریودەرانەیە بۆچی ؟ چونکە بەرگری کردن لە ئازادی ویەکسانی جێندەرەکان ناکاتە هەڵوەشانەوەی خێزان و هاوسەرگیری هاوڕەگەزخوازەکان و بڵاو کردنەوەی لەشفرۆشی . لەشفرۆشی دیاردەیەکی ئەو سیستەمە سەرمایەداریەیە کەخۆشتان ناتانەوێ نەمنێنێ یا هەر خۆتان لەشفرۆشی لە ڕێگای فرە ژنی و مارەیی و زەواجی مسیارو ومتعەوە برەو پێ دەدەن ە هێناوتانە ناو کولتوری کوردیەوە ئەوە ئێوەن لەشفرۆشی بڵاو دەکەنەوە و هۆکارن بۆ لەشفرۆشی ژنان . کاتێ من دەمەوێ هیچ کەس لە ڕووی جەندەریەوە نەچەوسێتەوە ومافی نەخورێ هەروەک ئەوەیە هیچ کەس لە سەر ئیسلام بوونی یا هەڵگری هەردینێک و ناسنامەی هەر نەتەوەونەژادو ڕەنگی هەرجۆرە پێستێ بێ مافی نەخورێ ونەچەوسێتەوە. لە کاتێکا من خۆم نە دیندارم و نەکەسێکم سەر بەدینی مەسیحی وجولەکەم و نەڕەشپێستم ونە لەنەتەوەیەکی ترم بەڵام دەمەوێ هەموو ئەم کەسە جیاوازانە مافی ئازادو یەکسانیان هەبێ بێ جیاوازی . خۆ ناکرێ من خۆم چۆنم وچۆنم بوێ بەئیجباری هەمووی وەک خۆم لێ بکەم هەروەک ئەوەی ئیسلامی سیاسی وسەلەفی دەیەوێ ئەنجامی بدات. بەرگری کردن لە مافی جێندرەکان یابڵیم لە مافی ژنان و پیاوان بەو مانایە نیە من ڕەگەز خواز بم و دەمەوێ خێزان هەڵوەشێنمەوە ئەوەی من بناسێت دەزانێ من لایەنگری هاوڕەگەز خوازی نیم بگرە بەباشیشی نازانم من کۆمۆنیستم ، نەوەی مارکس و لینین و مەنسورحیکمەتم کە خۆیان خاوەن خێزان و منداڵ بوون بەڵام باوەڕم وایە هیچ کەس نابێ مافی ئینسانی پێشێل بکرێ لە بەر ئەوەی خۆی جۆرێکی تر لە ژیان بۆ خۆی هەڵ ئەبژێرێ کە جیاوازە لە ژیانی من . ئازادی تاک زۆر پێویستە بۆ گەشەی کۆمەڵگا و پێشکەوتنی لە ڕووی زانستی وداهێنانەوە ئەم مافانە بە درێژایی زیاتر لە چورادە سەدە لە کۆمەڵگا ئیسلامیەکاندا نیە بۆیە هیچ گەشەیەک لەو چواچێوە جوگرافیەدا نابینرێ و جەهالە ت ونەخوێندەواریش زاڵە بەسەریدا. بەپێچەوانەوە ئەو کۆمەڵگایانەش ئازادی تاکی تێدا زیاترە داهێبانە زانستیەیاکان هەمووی لەوێدا دەکرێن کە کۆمەڵگاکانی ئێمە قەرزاری ئەوانن.فەلەک ناسی و کارەبا ، ئۆتۆمبیل ، دەرمان ، ئەنتەرنێت وئایفۆن وکۆمپیتەر زۆر شتی تر کە ئێمە لە ژیاندا بە کاری دێنین داهێنان ودروستکراوی ئەوانن، چونکە ئازادی تاڕادەیەک لەوێدا هەیە وەک ئازادی ژن وپیاو خۆشەویستی وپەیوەندیە کۆمەڵایەتیەکان و ئازادی بیروڕا وعەقیدە و دین وبێدینی تاڕادەیەکی باش ئازادی جێندەرییش هەیە . ئەم دەسکەوتانەی لە کۆمەڵگای ڕۆژئاوادا بەدەست هاتوون لەڕووی ماف وئازادیەکانەوە بەرهەمی سیستەمی سەرمایەداری ڕۆژئاواو ئیمپریالیزم نیە بەڵکو دەسکەوتی خەبات وتێکۆشانی چینی کرێکارو وچەپ وکۆمۆنیست وئازادیخوازو ڕۆشنبیران وفەیلەسوف و سکۆلاریستەکانن کە سەرەتای ئەو خەباتە دەگەڕێتەوە بۆ سەدەکانی ناوەراست لە ڕێنسانسەوە واتەلە ڕاپەرینی ئەوروپاوە دەستی پێکردووە کەدژ بە دەسەڵاتی کلیسا و ئایینی مەسیحی بوو تاشۆڕشی گەورەی فەرنسا و وە هەوەها هەردوو شۆڕشی پڕۆلیتاری شۆڕشی کۆمۆنەی پاریس و شۆڕشی ئۆکتۆبەر کەدینیان لە دەولەت جیاکردەوە. لە ئەنجامدا مرۆڤایەتی توانی ئەم کۆمەڵە دەسکەوت و مافانە بەدەست بێنێ کە لەدونیای ڕۆژئاوادا هەن و بوونەتە مافی بێئەملاوئەولای خەڵک . ئەم جوڵانەوەیە هێشتا بەردوامی هەیە بۆ دەسکەوتی زیاتر چ لەدونیای ڕۆژ ئاواو چ لە ووڵاتانی ئاسیاو ئەفەریقاش وە لە نێویاندا ئەو ووڵاتانەش کە دەسەلاتی دینی وئیسلامی بەسەریاندا زاڵە. لەسعودیە و قەتەر وئیمارات بەشێک لەو دەسکەوتانە بەدەست هاتوون و خەڵکی ئێرانیش دەیانەوێ بەڕاپەڕین و شۆڕش ئەو ڕژێمە بڕووخێنن کەدژی ئەم ماف وئازادیانەیە و تا ئێستا توانیویانە چەند دەسکەوت بەدەست بێنن وەک هەڵوەشانەوەی پۆلیسی ئەخلاق ودەرکردنی نوێنەری ئەو ڕژێمە لە کۆمسیۆنی ژنانی نەتەوە یەکگروتوەکان . لە کوردستانی باشوریش جوڵانەوە بۆ بەدەست هێنانی ماف وئازادیەکان لە ئێستادا بەهۆی کاریگەری گۆڕانکاریەکانی ئێران و ناوچەکە زیادی کردووە هەر ئەمەشە ئیسلامی وسەلەفیەکان ودەسەڵاتی کوردایەتیشی هەراسان کردووە وەک دەسەڵاتی سەدەکانی ناوەراستی ئەوروپا دەستیان داوەتە سەرکوتی ئەم جووڵانەوەیە بەڵام هەروەک چۆن ئەوروپا سەرکەوت هەرئاواش خەڵکی کرێکارو کۆمۆنیست وسکۆلاریست وچەپ ئازادیخوازانی کوردستانیش سەردەکەون ئەوە حوکمی مێژووە دەبێ و ئیمکانی هەیە . بەڵام بۆ ئەوەی زووتر و زیاتر کەرامەتی ئینسان و مافی ڕەگەزی وجێندەری بەدەست بێت شۆڕشێکی کۆمەڵایەتی بە ڕابەڕی چینی کرێکار وخەلکی هەژارو چەوساوەومافخوراو پێویستە . هەرکەس لایەنگری دەسکەوتە جێندەریەکان و ماف وئازادیەکانە دەبێ کار لەسەر ئەم شۆڕشە بکات ئەم شۆڕشەش شۆڕشی سۆشیالیستیەو کە سەرجەم دوژمنانی ئینسانیەت ڕادەماڵێت .

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە