هەمیشە ئەندامەکانی ناو پارتی لە کەشێکی پڕ لە ترس و دڵە ڕاوکێدا ژیان دەگوزەرێنن
Wednesday, 07/04/2021, 1:57
8019 بینراوە
هەروەک چۆن لەسەرەتای دروستبوونی دەوڵەتی عێراقدا رەمزی فەتاح مامی برایم ئەحمەد، یەکەم هەڵبژاردەی ئینگلیزەکان، بوو بە سیخوڕ و لەگەڵ خۆیدا برایم ئەحمەدی برازای بۆ ئەو کارە راکێشا.
ئەمانە کاری زۆریان بۆ دوژمن و داگیرکەرانی کوردستان کرد، بەهۆی رەمزی ئەفەندیەوە ژمارەی خۆفرۆشەکان هەڵکشا و گەیشتە لوتکە، بە شێوەیەک زۆربەی وەزیر، ئەفسەر و فەرمانبەرە باڵابەرزەکانی سەردەمی مەلیکی لە عێراقدا کورد بوون و خزمەتێکی زۆری ئەو دەوڵەتە نوێیەیان کرد، لەوێدا دەستی رەنگینی خیانەتی کورد لە ناو ئەو دەوڵەتە دروستکراوەی عێراقدا دیاربوو.. رۆڵی زۆریان هەبوو بۆ پتەوکردنی سوپا و ئیدارەی حکومەتی عێراقی، لەوە بەدواوە ئیتر مەسەلەی نیشتیمانیی و کوردبوون لەناو دەوڵەتی داگیرکەردا توایەوە.
ئەمڕۆ بە هەمان شێوە نەوەکانی رەمزی ئەفەندی لە باشووری کوردستان دووبارە ئەو رۆڵە دەبیننەوە، زیاتر و ترسناکتر لەوەی پێشتووتر. بنەماڵەی بارزانییش وەکو دروستکراوی ئینگلیز و دەوڵەتە داگیرکەرەکانی تری کوردستانن، لە رێگای سیخوڕە و خائینە کوردەکانی ئەو سەردەمەوە، بەتایبەتی برایم ئەحمەد دروستبوون، کردیانە رابەری کورد.
دوای رووخانی سیستەمی پادشایی و دامەزراندنی کۆماری عێراق لە رۆژی 18 / 7 / 1958 شاندێکی تایبەت لە سیخوڕە خائینەکانی کورد لەسەر داوای ئینگلیز، کە تێیدا برایم ئەحمەـەد و جەلال تالەبانی چوونە سۆڤیەت و داوایان لە بارزانی کرد تا بۆ عێراق بگەڕێتەوە، وەکو سەرۆکی پارتیی دیموکراتی کوردستان و گەلی کورد دیارییان کرد، پاش تێپەڕبوونی سێ ساڵ بە سەر شۆڕشەکەی عەبدولکەریم قاسم، دیسان ئەم خائینانە یاخی بوونەوە. لە کاتێکدا عەبدولکەریم قاسم عێراقی بە نیشتیمانی کورد عەرەب دانابوو، بەبێ شەڕ و خوێنڕشتن لەسەردەمی بەعس زیاتر مافی بە کورد دابوو.
لە شاخیش برایم ئەحمەد نەک وەکو سکرتێری حیزب، بەڵکو وەکو کارمەندێکی بەردەستی مەلا مستەفا کاری دەکرد و رێزی دەگرت، تەنانەت کاتێک چادریان لە تەنیشت چادرەکەی مەلا مستەفاوە بۆ هەڵدابوو، لە پێشمەرگەکان تووڕە دەبێت، دەڵێت مەلا مستەفا لە من گەورەترە کە دەبێت لە خوار سەرۆکەوە بۆم دابنێن، چونکە پلە و پۆستی مەلا مستەفا لە ئێمە گەورەترە.
خائینەکان بۆ ئەوەی ناپاکی خۆیان تێپەڕێنن و جوانی بکەن، چاک یەکتر دەدۆزنەوە و یەکتر لە شوێنی یەکتر دادەنێن و بەسەر ئەو میللەتەیدا گەورە دەکەن، بۆیە ئەمڕۆ کوڕەکانی تالەبانی هەر بە شێوەیەی باپیریان مامەڵە لەگەڵ نەوەکانی مەلا مستەفا دەکەن، تا خیانەت لە ناو کورددا برەو پێبدەن، بنەماڵەی مەلا مستەفا کە هەڵبژاردەی دوژمنانی کورد و پەروەردەی دەستی برایم ئەحمەد بوو، وا ئەمڕٶ بۆڕی بنەماڵەی برایم ئەحمەد و تالەبانییان داوەتەوە، بۆیە مەترسی ئەوەش دەکرێت، بە یەکجاری کورد لە باشوور بەرەو تێداچوون و نەمان بچێت، کە بە پلان داگیرکەرانی کوردستان سی ساڵە کاری لەسەر دەکەن.
ئەوەی جێگای سەرنج و تێڕوانینە، ئەوەشیانە، کە لەگەڵ ئەو هەموو خیانەت و دزیی و تاڵانییەی بنەماڵەی بارزانی ئەنجامیان داوە کەچی بازاڕیان گەرمە، بە لێشاو کەسانی سەر بە پارتەکانی تر و کەسانی تر خۆفرۆشێ دەکەن و دەچنە باوەشی پارتیی و بنەماڵەی بارزانییەوە لەوێدا هەست بە ئارامی دەکەن. یەکێتیی، گۆڕان، ئیسلامە توندڕەوەکانی کورد، هەموو لە ژێرەوە دەبنە پارتیی و بەشێکی زۆریش لەوانەی کە خۆیان بە نەتەوەیی و پاسۆک دەزانن، لەگەڵ کۆنەشیوعییەکان راستەوخۆ سەر بە دەزگا بەدناوەکەی پاراستنن.
هیچ شتێک لە شوێنی خۆیدا نەماوە، کەس ناتوانێت بە لۆگیک لێکدانەوە بۆ ئەو هەموو رووداوانە بکات کە لە باشووردا دەگوزەرێت. لەگەڵ ئەو هەموو دیاردە نەخوزراوانەی سەرەوەدشا، دەبینین کەوا کەسانی سەر بە پارتی و خاوەن ویژدان واز دەهێنن و دەگەڕێنەوە نێو باوەشی گەلی خۆیان. لە کۆیلەبوون بۆ بنەماڵەی بارزانی یاخی دەبن. ئێمە هەوڵ دەدەین ئەوانە بدۆزینەوە، دیدار و چاوپێکەوتنیان لەگەڵدا بکەین، ئیستاش
ئەم دیدارەی خوارەوەمان لەگەڵ کاک (دانا مەنمی)مان رێکخستووە. پێشتر کاکە دانا مەنمی لەناو پارتییدا خاوەنی پلە و پۆستیش بوو، دوای ئەوەی لە رێگای نووسینەکانی هەڵوێستەکانیمان بۆ دەرکەوت بڕیارمان دا پەیوەندیی پێوە بکەین و ئەو چەند پرسیارەی خوارەوەی ئاڕاستە بکەین، کە لە خوارەوە پێشکەشتانی دەکەین.
 |
| دانا مەنمی |
| هەرگیز جارێکی تر ناگەڕێمەوە ناو پارتی و پارتییبوونیش عەیبەیەکی گەورەیە |
سڵاو لە ئیوەی ئازیزو ستافە خۆشەویستەكەی كوردستان پۆست
پەیوەندی و پرسیارەكانتان لای من جێگەی ڕێزو بەرز دەینرخێنم كە ئیمەتان بەسەر كردووەتەوە، هەركاتیك و هەرقوناغێك پرسیاری ترتان هەبیت ئیمە لەخزمەتی ئیوەداین زیاتر لە دەیان ساڵە ئێوەی ئازیز رێز لە دیدو روانینی ئیمە دەگرن و هاوكاری ئیمەن بۆ بلاو كردنەوەو روانین و بۆچونەكانمان لەسەر پرسە سیاسی و ئالنگاریی و كێشەكانی دەسەڵاتی كوردی. بفەرموون پرسیارەکانتان بکەن!
کوردستانپۆست: سەرەتا خۆتان بە خوێنەران بناسێنن لەوێوە کە چۆن بوونە پارتیی و سەرەتای پەیوەندییتان کەی بوو؟
وەڵام: من رۆژنامەنوس دانا مەنمی ساڵی ۱۹۸۰ لە بنەماڵەیەكی شۆرشگیرو كوردپەروەری جوتیار نشین لە گوندی كەندەكەوەی شەهیدان لە دایك بووم، دایك و باوكم لە ژیاندا ماون، دایكم خانمی ماڵە و باوكیشم خانەنشینە لەسەر میلاكی بەرێوبەرایەتی ڕێگاوبان، خاوەنی سێ برا و دوو خوشكم، دوو خاڵ و یەك مامم هەیە لەبەری دایك سێ پورم هەیە و لەبەری باوك یەك پورم هەیە سوپاس بۆ خودا هەموو لە ژیاندا ماون، جگە لە خالێكم كەسوكارەكەم دوورن لە سیاسەت و پەیوەندی حیزبی و ئۆرگانیان بەهیچ لایەنیكی سیاسییەوە نییە، سالی ۱۹۸۸ گوندەكەمان لەلایەن رژێمی بەعسەوە خاپوركراو دواتر لە سلێمانی نیشتەجێ بووین، خویندنی سەرەتایی و دواناوەندی و ئامادەیم لە سلێمانی تەواو كرد. ساڵی ۱۹۹۹ بەهۆی بوونی خاڵێكم لەناو پارتیدا توشی فشاری سیاسی و سەرئێشەی سیاسی بووین لەلایەن لایەنێكی سیاسیییەوە، برایەكم ژیانی تاراوگەی هەڵبژارد و روی كردە هەندەران، منیش بەناچاری رووم كردە هەولێر و دوو براكەی تریشم منداڵ بوون لە سلێمانی مانەوە، جگە لە من خاڵەكەی تریشم بەهۆی ئەوەی براكەی پارتی بوو بیانوی پێدەگیرا و فشاری سیاسی لەسەر بووە، من لە هەولێر مامەوە تاكو پرۆسەی ڕێكەوتنامەی ئاشتی جێبەجێ كرا و ساڵی ۲۰۰۱ بە یەكجاری گەڕامەوە سلێمانی.
کوردستانپۆست: پلە و پۆست و رۆڵی سیاسییتان لە ناو پارتییدا چی و چۆن بوو؟
وەڵام: دوای گەڕانەوەم بۆ سلێمانی وەكو كادری ڕێكخستن لە لیژنەی ناوچەی سلێمانی كارم دەستکەوت.
ساڵی ۲۰۱۲ پلە حیزبیەكەم گوازرایەوە بۆ لقی چوار وەكو كادری لق لە مەكتەبی رێكخستن..
ساڵی ۲۰۱۳ پلەی ئەندامی مەكتەبم لە لقی چوار مەكتەبی ڕێكخستن پێ بەخشرا .
ساڵی ۲۰۱٥ لەسەرۆكایەتی هەریم وەكو بەرێوبەری بەشی هەواڵی سیاسی دەست بەكار بووم .
ساڵی ۲۰۱٦ لە نوسینگەی نێچیرڤان بارزانی وەكو نووسەرێك لە دەستەی نوسەران پیشە و کارەکەیان بۆ دیاری كردم، بەڵام من ئەو كارەم ڕەتكردەوە .
سەرەتایی سالی ۲۰۱۷ کارەکەم گوازرایەوە بۆ ئەنجومەنی سەركردایەتی پاریزگای سلێمانی وەكو ئەندامی مەكتەبی ئەنجومەنی سەركردایەتی لە مەكتەبی ڕاگەیاندن، بەڵام دوای چوار مانگ لە دەستبەكاربوون ناكۆكی كەوتە نێوان من و ئەدهەم بارزانی بەرپرسی ئەنجومەنی سەركردایەتی پاریزگای سلێمانی، پاشان بۆ ماوەی سێ مانگ موچەكەم ڕاگیرا لەسەر ئەوەی ڕەخنەم لە ئەدهەم بارزانی گرتبوو لە ساڵیادی كیمیابارانكردنی هەڵەبجەدا، ئەوە بابەتە بووە هۆكاری وازهێنانم لە پارتی و لە پلە و پۆستەكانی تریش لە ئۆرگانە جیاجیاكان دەستم لە كار كێشایەوە، واتە ساڵی ۲۰۱۷ بەیەكجاری لە پارتی وازمهێنا و هیچ پەیوەندییەكی ئۆرگانیم بە پارتییەوە نەماوە و هیچ پەیوەندییەكی ئۆرگانیشم بە هیچ حیزب و ڕێكخراوێكی سیاسییەوە لە كوردستاندا نییە .
لە دەرەوەی ژیانی سیاسی لە ناو كایەی ڕۆژنامەنوسیدا ساڵی ۲۰۰۳ ئاشنا بووم و دەستم كرد بە وتار نوسین، رۆژنامەی هاوڵاتی وەكو یەكەمین رۆژنامە زیاتر لە ۳۰ وتارم لە تیراژەكانی هاوڵاتی بڵاو كرایەوە، ساڵانی دواتریش لە رۆژنامەی ئاوێنە گرنگی بە بابەتەكانم دەدرا، لە ماڵپەرە ئەلكترۆنیەكانیشدا ساڵی ۲۰۱۰ یەكەمین پێگەی ئەلكترۆنی پێگەی كوردستانپوست بوو كە وتارەكانی ئێمەی بڵاو كردەوە ئەو وتارانەی كە لە خەیاڵم مابێت لەوانە (پەیدابوونی دیاردەی جاشایەتی، بە گژداچونەوەی گەندەڵی، دیكتاتۆریەتی زۆرینە، رۆژنامەنوس پەیامبەرێكی مێژوویە) زۆر بابەتی تر كە تا ئێستا بەردەوامین، لە دوای ساڵانی ۲۰۱۲ وە بەشێكی زۆری ماڵپەرەكان لەوانە ماڵپەری (شارپرێس، لڤین پرێس، ئاوێنە، خەندان، ستاندەر، سنور میدیا، ڕوانگەو ڕەخنە، شەن پریس ) زۆری تر كە ئیستا ناوەكانیانم لە خەیاڵدا نییە.
کوردستانپۆست: بە چ بیروباوەڕێکی پارتیی سەرسام بوون، یان چی وای لێکردن ببن بە پارتیی و نەبوون بە ئەندامی حیزبێکی تر؟
وەڵام: هۆكاری بوون بە پارتی لەو سەردەم و قۆناغەدا ناچاری و فشاری سیاسی بوو، بیانوی لایەنێكی سیاسی پاڵنەر بوو، پاڵنەرەکە ئینتیما نەبوو، خۆشەویستی بۆ ئەو ڕێبازو سیاسەت و ئایدۆلۆژیایە نەبوو، وەکو لەسەرەتادا ئاماژەم پێی دا زیاتر پاڵنەرەکە فشاری سیاسی بوو بەهۆی خاڵێكم لە ناو پارتیدا، واتە پاڵنەرێکی ئیجباری بوو، هەڵبژاردەکەش ئامانجی دەرباز بوون بوو لەو فشارە سیاسییەی کە یەکێتی لەقەڵەمڕەوی خۆیدا دژ بە پارتییەکان دەیگرتە بەر و پارتیش لە جوگرافیای خۆیدا دژ بە یەکێتییەکان هەمان فشار و سزای لەسەر یەكێتییەكان دروست كردبوو،
هەمیشە پارتییەکانی ناو پارتی لە کەشێکی پڕ لەترس و دڵە ڕاوکێ دا ژیان دەگوزەرێنن، ئازاد نین و ژیانیان لەقاڵب دراوە |
دوای تێکەڵبوونم بەکاری سیاسی لە ناو پارتیدا تێگەیشتم کە بینای سیاسەت لە ناو پارتیدا عەقڵ و لۆژیک و زانست و هونەری بەڕێوەبردن نییە و خودی کایەی سیاسی لەناو ئەم حیزبەدا ئاسایی تەندروست نیە، كایەی سیاسەت لەسەر بنەمای پارە و پۆست و ئینتیما و دڵسۆزی بۆ بنەماڵەی بەرزانی و بەخشینەوەی ئیمتیازات بونیاد نراوە، لە دەرەوەی ئەمەش ژیانی سیاسی بۆ ئەو کەسانەی کە دەستەمۆنابن پڕە لە کێشە و لە ململانێ و دڵەڕاوکێ و ترس، هەمیشە پارتییەکانی ناو پارتی لە کەشێکی پڕ لەترس و دڵە ڕاوکێ دا ژیان دەگوزەرێنن، ئازاد نین و ژیانیان لەقاڵب دراوە، هەمیشە پارتییەکان ترسیان هەیە لە غەزەب و عەبەسیەتی بنەماڵەی بەرزانی، ترسیان هەیە لە دەربڕینیک، لە هەنگاوێک، لەکارێک، لە کۆمێنت و لایکێکی فەیسبووک کە جێگەی ڕەزامەندی ئەندامێکی بنەماڵەی بەرزانی نەبێت.
کوردستانپۆست: بە لای ئێوەوە هیچ جیاوازییەک هەیە لە نێوان ئەو رێکخراو و حیزبە سیاسییانەی کە لە باشووردا هەیە؟
وەڵام:سیاسەت هونەری بەڕێوەبردن و کێبڕکێ و ململانێیە هەمیشە لەسیاسەتدا ململانێی سیاسی، جیاوازی بیرو بۆچوون، ڕەگێکی قوڵی هەیە، سیاسەتیش بەململانێ و بەجیاوازییەکانەوە توانای خۆ نوێکردنەوەی هەیە، دونیای سیاسەت دونیای پلۆرالیزمی سیاسی و ڕێزگرتنە لە جیاوازییەکان کە ژینگەیەکی تەندروست بڕەخسێت و خەڵکیش بەهۆی هونەری بەڕێوەبردنەوە خوشگوزەران بێت و ئاسایش و ئارامی و سەقامگیری بۆ دابین بکرێت، سیاسەت دەرهاویشتەی عەقڵە و بەعەقڵ و زانست نەبێ هەڵناسوڕێت، لەسیاسەتدا هونەرو پسپۆریەت ڕۆڵ دەگێرێت بۆ ئەوەی خەونەکانت بۆ بکاتە واقیع،
حیزبەكان هیچ خەسڵەتێکی زانستی و لۆژیكی سیاسییان تیدا نەماوەو بەدووی بەرژەوەندی و قازانجی بازرگانی خۆیانەوەن |
لەسیاسەتدا پێویستە نیاز پاکی و متمانەو ڕاستگۆی هەبێت بۆ ئەوەی مامەڵەیەکی ئینسانیانە لەگەڵ مرۆڤەکان و کۆمەڵگادا بنیات بنرێت و چاکەی گشتی لەسەروی مەسڵەحەت و بەرژەوەندی حیزب و مێنتەڵییەتی خێڵەوە بێت، کورد لەناو سیاسەتدا هیچکات نەیتوانیووە دەستکەوتەکانی بپارێزێت و دەرفەتەکان بقۆزێتەوە، حیزب و ڕێکخراوە سیاسییە کوردییەکان ناتوانن لەکات و شوێنی گونجاودا نەخشەڕێگا و ستراتیژی سیاسی بۆ خزمەتی چاکەی گشتی بخاتە ڕاپرسییەوە و ڕێز لە دەنگ و ئیرادەی گشتی بگرێت، نەبوونی متمانەی سیاسییە لە نێوان حیزبەكان و لە نێوان حیزب وحكومەت و خەلكدا لە نزمترین ئاستدایە، ئەمەش نیشانەی ئەوەیە كە حیزبەكان هیچ خەسڵەتێکی زانستی و لۆژیكی سیاسییان تیدا نەماوەو بەدووی بەرژەوەندی و قازانجی بازرگانی خۆیانەوەن و گاڵتە بە هەست و شعوری خەلك دەكەن و بانگەشەكانیان كرداری لە پاڵدا نیە وفشەڵ و بەزیوون، ئەمەش یەكێكە لە مەترسییە گەورەكانی بۆ داهاتووی سیاسی ئەو حیزبانە و ئەزمونەكەو حوكمرانیەتی كوردی بە گشتی، لەبارەی جیاوازییەوە پارتی و یەكێتی و گۆران مۆدێلی یەكتری دوبارە دەكەنەوە، نەوەی دووەمی ناو پارتی و یەکێتی و گۆران، بێ ماندووبوون بە هۆی پەیوەندی خوێن و پێگەی خێزان و بنەماڵەییەوە پاره و ده‌سه‌ڵات و بریاری سیاسییان گرتووەتە دەست، ئەمانە نەك خۆیان بەڵكو كار بۆ نەوەكانی دوا خۆشیان دەكەن كە بەبێ ماندوو بوون و شارەزایی جیگەیان بگرنەوە و ببنە خاوەنی بارەگای حیزبی و كۆمپانیا و تاپۆكردنی زەوی لەسەر خۆیان و قۆرغكردنی كایەی سیاسی و ئابوری و خەلكی كوردستانیش بە چەواشەكاری و درۆی كوردایەتیەوە سەرقاڵ بكەن .
کوردستانپۆست: بۆچی وازتان لە پارتیی هێنا، لە کاتێکدا ئیستا بازاری پارتیی گەرمە و هەر بە لێشاو ئەندامی حیزبەکانی تر بە ئاشکرا و بە نهێنی پەیوەندیی بە پارتییەوە دەکەن، تەنانەت نەک یەکێتیی، ئەوەتا بزووتنەوەی گۆڕانیش گێڕی گۆڕیوەو لەسەر سیاسەتی پارتی خۆی بەڕیوە دەبات؟
وەڵام: حیزبیبوون پرۆسه‌یه‌كی ئاره‌زوو مه‌ندانه‌یه مرۆڤ ئازاده له‌وه‌ی په‌یوه‌ست بێت به حیزبێك یان ڕێكخراوێكی سیاسییەوە و ئازادیشە لە وازهێنان لە حیزبیك و حیزبایەتیش لە چارەنوسی هیچ مرۆڤ نەنوسراوە، ئەوەی شەرمەزاری و عەیبە ئەوەیە كە مرۆڤ له ناو سیاسەت و حیزبیبوندا ببیته كه‌ره‌سته و ئامراز به‌ده‌ست حیزبه‌وه له‌مسه‌ر بۆ ئه‌وسه‌ر به‌پێی به‌رژه‌وه‌ندییه‌كانی بتهێنێت و بتبات و ڕەشت پێ بگۆرێت بە سپی و سپیشت پێ بكاتە ڕەش، مرۆڤی هوشیارو به‌ئاگا بۆ ئه‌وه حیزبایه‌تی ناكات تا ببێته برغوی مه‌كینه‌ی فڵانه حیزب وفلانه سه‌ركرده و نابێته ئامرازو سەركردەو حیزبیشی لەلا موقەدەس نییە، چونكه بۆخۆی ئامانجه‌و راستگۆیانه دیدوجیهانبینی خۆی ده‌خاته ڕوو، خۆئه‌گه‌ریش رێز له به‌هاو ئێراده‌ی نه‌گیریت ڕیزه‌كانی ئه‌و حیزبه جێده‌هێڵێت، لە كوردستان سه‌رجه‌م حیزبه‌كان له ڕاسته‌وه بۆ چه‌پ خۆیان لەبەرگی بیری ڕزگاری نەتەوەیی، ناسیونالیستی، سۆسیال دیموکرات، چینایەتی، عەدالەتی کۆمەڵایەتی، نەهێشتنی گەندەڵی ….هتد حەشارداوه بە شێوازی جیاواز خۆیان نمایشدەکرد،
مرۆڤی هوشیار و به‌ئاگا بۆ ئه‌وه حیزبایه‌تی ناكات تا ببێته برغوی مه‌كینه‌ی فڵانه حیزب وفلانه سه‌ركرده |
بەڵام لەگەڵ تێپەڕبوونی کات ڕووە ڕاستەقینەکەیان بەکردار دەردەکەوت، پارتی لەناو شیعاراتی قەومیدا خۆی پێ مامەخەمەی كوردایەتییە و لە بواری ئازادی و دیموكراسی و مافەكانی مرۆڤیشدا بە دروشم و بانگەشە هیچی نەهێشتووەتەوە، لەكاتێكدا ڕووە ڕاستەقینەکەی پارتی له‌ناو شیعاراتی قه‌ومیدا خزمه‌تكردنه به ئیحتیلال و مه‌شروعی عێراقچێتی، ئەم دروشمە لای پارتی درۆیەكی فشەڵەو بازاڕی سیاسی خۆی پێ گەرم دەكات، دواجاریش بینیمان پارتی و بنەماڵەی بەرزانی لە ریفراندۆم داچی قوماریكیان بە چارەنوسی خەلكەوە كرد، پارتی به بیانووی پەیڕەو پرۆگرام و دیسپلینی پارتایەتی ئازادی بیركردنه‌وه‌و تێرامان و ڕه‌خنه‌گرتن له ئه‌ندام و كادره‌كانی وه‌رده‌گرێته‌وه و ده‌یكاته مێگه‌لێكی ناو رێزه‌كانی رێكخستن، هاوكات له‌گه‌ڵ لێسه‌ندنه‌وه‌ی ئازادی له عه‌قڵ مرۆڤه‌كان ده‌كرێنه بونه‌وه‌رێكی ده‌سته‌مۆو ملكه‌چپێكراو، ، لەناو سیاسەت و هونەری بەریوەبردنیشدا پارتی هەموو هونەرەكانی پیكەوە ژیانی لە بار بردووەو شاڕێیەكی مەترسیداری گرتووەتەبەر جگە لە ترس و تۆقاندن، جگە لە درۆو چەواشەكاری و بەلێنی فشەڵ، جگە لە كلتوری جنیودان و شەڕەنگیزی و فرت و فێڵ هیچی تری لێ سەوز نەبووە، سیاسەتی پارتی لە ژێر هەیمەنەو هەژموونی مێنتەڵییەتی خێڵی بەرزانی و تەریقەتی ئایندایە، پارتی بانگەشەی ئازادی و دیموكراسی دەكات هەربۆخۆشی دژی ئازادی بیركردنەوەو هونەری ڕەخنەگرتنە، پارتی بانگەشەی سەروەری یاسا دەكات دژی سەروەربونی یاسایەو دادگاكان بێ ئەرزش دەكات و دادوەرانیش بێ ڕۆڵ دەكات، بانگەشەی یەكڕیزی كورد دەكات هەربۆخۆیشی دژی هونەرەكانی پێكەوە ژیان و لەبابردنی ئاشتی كۆمەڵایەتی و یەكریزی سیاسییە،
| وەزیفەی شه‌و رۆژی پارتیەكانی ناو پارتی دەبوو درۆكردن بێت بۆ جوانكردن و موقەدەسكردنی ئەندامانی بنەماڵەی بەرزانی |
تەواوی تیزەكانی پارتی فەشەلی هێناوەو ڕووە ڕاستەقینەیكەی پارتی ئەوە نییە كە بانگەشەی بۆ دەكات، وازهینانیشم لە پارتی لەبەر ئەم هۆكارانەو دەیان هۆكاری تر بووە كە نەمتوانیوە لە ناو پارتیدا ئازادانە مومارەسەی عەقڵی خۆم بكەم و پارتی له هه‌ناوی خۆیدا فۆڕمی پیرۆزی و موقەدەسی بنەماڵەی بەرزانی و فۆڕمی كۆیلایه‌تی بۆ كادیرو لایەنگرەكانی هێناوه‌ته ئاراوه كە دەبێ وەزیفەی شه‌و رۆژی پارتیەكانی ناو پارتی درۆكردن بێت بۆ جوانكردن و موقەدەسكردنی ئەندامانی بنەماڵەی بەرزانی، پارتیبون واتە ئیدی خۆت له به‌رپرسیاره‌تی ئه‌خڵاقی و ویژدانی هه‌ڵوێستی ڕاستگۆیانه بدزیته‌وه له پێناو به‌رژه‌وه‌ندی تایبه‌تی بنەماڵەی بەرزانیدا، لەبەر ئەم هۆكارانە پارتیبونم پێ عەیبەیەكی گەورە بوو بەسەربەرزی هاتوومەتە دەرەوە .
کوردستانپۆست: بۆچی پارتیی دەستیان لێکردیتەوە، وەکو بیستمان لێشیان دابوویت! ئایا ئەمە راستە؟
وەڵام: هێرش و پەلاماردانەكانی پارتی بۆ سەر ئێمە و خەڵكانی ئازادیخواز و چالاكوانانی مەدەنی له چوارچێوه‌ی هه‌ڕه‌شه‌و په‌لاماردانی نهێنی و ئاشكرادایه كه به پێی پلان به‌رنامه‌ڕێژی بۆ كراوه، ڕاستە ڕۆژی ٨ی٨ی٢٠٢٠ كاتژمێر ١٠:٢٥ دەزگای پاراستنی بەدناوی پارتی لەڕێگەی پێنج بەكرێگیراوەوە لە پشتی نەخۆشخانەی فاروق پەلاماریان دام،
پارتی ھەرچەندە گەورەو بەھێز بێت، بارتەقای گەورەی و بەھێزییەكە لە دەنگی ئازادو قەڵەمی بوێر و ھەقبێژی دەترسێت |
پێش چەند رۆژێك لە پەلاماردانەكە پاراستنی پارتی لەڕێگەی چەند دۆستێكەوە پەیوەندییان پێوە كردم و داوایان لێكردم كە ڕەخنە لە (مەسعود بەرزانی و بەتایبەت بنەماڵەی بەرزانی و مەلا مستەفا )نەگرم و بە تایبەتی داوایانكرد وتارێكم لە ژێر ناونیشانی (كابینەی نۆیەم و نەفەسی پارتی) بسرمەوە، بەڵام من لای خۆمەوە داواكەیانم ڕەتكردەوەو دواتر ئەو ڕوداوە ڕویدا كە بیگومان ئامانجی پارتی له هێرش و پەلاماردانی ئێمە بە ڕۆژی روناك لە شاری سلێمانی ته‌نها بۆ بێده‌نگبوونی ئێمه‌یه له‌ناو كایه‌ی سیاسی و رۆژنامه‌وانیدا، ئه‌م كلتوری هێرش و په‌لاماردانه‌ی پارتی یه‌كێكه له گرفته هه‌ره قوڵه‌كانی به‌رده‌م كۆمه‌ڵگای كوردی، گرفتێكی كوشنده‌یه كه به‌داخه‌وه بووه به نه‌ریت له ناو هەندێك حیزبی تردا و چاو لە پارتی دەكەن! ئامانجی پارتی بۆ ئه‌وه‌یه كه ئازادیخوازان و قه‌له‌مه بوێرو ڕاشكاوه‌كان نه‌توانن به ڕاشكاوی به ئاشكرا و به ئازادی ڕاو بۆچوون دیدو جێهانبینی خۆیان ده‌رببرن، بەڵام پارتی جگە لە خۆناشیرینكردن و بەدناوی ھیچی تری بۆ نەماوەتەوە، ئەم كلتورە ناشیرینە كلتوری میراتی مەلا مستەفایە بۆ نەوەكانی ماوەتەوە، پارتی ھەرچەندە گەورەو بەھێز بێت، بارتەقای گەورەی و بەھێزییەكە لە دەنگی ئازادو قەڵەمی بوێر و ھەقبێژی دەترسێت .
کوردستانپۆست: لەدوای ئەو رووداوەوە وەکو کورد دەڵێت: ئیتر دەست و پەنجەت گەرم بۆتەوە و هێرش دەکەیتە سەر پارتیی و سیاسەتەکەی، ئەمە لە کاتێکدایە کە خۆت لە کوردستانیت، ئایا هیچ ناترسیت؟
وەڵام: ئەو ڕوداوە هۆكار نییە بۆ ئەوەی كە دەست و پەنجەم گەرم بێت بۆ نوسین، ئەو ڕوداوە بۆ من چاوەڕوان كراو بوو چونكە لە هێزێكی وەكو پارتی كە دژ بە ئازادی ئینسانەكانەو ژینگەیەكی بۆ پیسخۆری و گەندەڵی بنیات ناوە لە ڕووی سیاسی و ئابورییەوە بە شێوەیەكی نایاسایی گه‌نده‌ڵکارو مشه‌خۆر و پیسخۆرەكان دەپارێزێت هەر ئەوە چاوەڕوان دەكرێت، دوالیزمی گوتاری سیاسی پارتی و مامه‌ڵه سیاسییەكەی هیچ كات مامه‌ڵه‌یه‌كی زانستی و واقیعی نه‌بووه، نه‌یتوانیوه وێنه‌كان وه‌كو خۆی بگوازێته‌وه به‌ڵكو ڕوانگه‌یه‌كی گۆبڵزانە بووه،
| مێژووی 70 ساڵەی پارتی ڕۆژگارو مێژووی پارتی وەکو حیزبێکی خێڵەکی ڕۆژگاری پڕ بە بیرۆکەی ئیرهابی فیکری وشەڕی کۆنە قین و بڵاو کردنەوەی ترس و تۆقاندن |
پارتی لە یەک کاتدا خاوەنی دو جۆر له تێڕوانینی پێچەوانەو دژ بە یەکەو ئەوەی دەیکات ئەوە نیە کە بڕوایان پێی هەبێت و ئەوەیشی دەیڵێن ئەوە نیە کە مەبەستیانە..! حیزبی هاوشێوه‌ی پارتی لە کلتوری کۆمەڵایەتی و لەناو خەڵکدا به حیزبی ساخته‌چی پێناسه ده‌كرێن و ده‌ناسرێنه‌وه کە بەدوای بەرژەوەندی ته‌سكی حیزبایه‌تی خۆیانەوەن نەک بەرژەوەندی گشتی و چاکەی گشتی و مافی گشتی، پاشان بە ئاوڕدانەوە لە مێژووی ۷۰ ساڵەی پارتی ڕۆژگارو مێژووی پارتی وەکو حیزبێکی خێڵەکی ڕۆژگاری پڕ بە بیرۆکەی ئیرهابی فیکری وشەڕی کۆنە قین و بڵاو کردنەوەی ترس و تۆقاندن و پەلاماردان و تیرۆری سیاسی و گەمەی نابەجێ یە، ڕۆژگاری پارتی پڕە لە ڕۆحی تۆڵە سەندنەوە و پڕ لە فەرهەنگ و کلتوری شەڕە جنێو و هۆنینەوەی تۆمەت و بوختانی سیاسییە، فەرهەنگی پارتی فەرهەنگ خێڵ و دوژمن دۆست و هاوخەبات شکاندنە، من بۆ ئازادی و بەهای دیموكراسی و رێزگرتن لە روانینی جیاواز و پاراستنی كەرامەتی ئینسانەكان دەجەنگم و ترسیش دوژمنی هەرە گەورەی ئازادی بیركردنەوەو قسەكردنە، ریگاو ریبازو خەباتی من ئەوەیە كە هەڵمبژاردووەو سەربەرزم .
کوردستانپۆست: لە دوای ئەم وەرچەرخانەتان ئایا هیچ پەیوەندییەکت پێوە کراوە، یان هەڕەشەت لێکراوە؟
وەڵام: نامەوێ هەروا لولەی تۆپی ڕەخنەی بێ سەرو بەر ئاراستەی پارتی بكەم، بەڵام ڕێگەش لە ڕەخنەگرتن ناگیرێت، ڕەخنە یارمەتیدەرە تا هەڵەو كەموكوڕییەكان بخرێتە بەرچاو لێكۆڵینەوەیان لەسەر بكرێت و چارەسەری گونجاوی بۆ بدۆزرێتەوە، كێشەو كەموكوڕی و ئاڵنگارییەكانی پارتی لە ناو دونیای سیاسەت و هونەری بەڕێوەبردندا ئەوەندە زۆرە هەروا بە ئاسانی ڕەخنەی منیش و رۆژنامەنوسان لە پارتی نابڕیتەوە، من نامەوێت و كەسیش چاوەڕێی ئەوە لە پارتی ناكات كە گۆچانی سیحری بەدەستەوە بێت و كوردستانمان بۆ بكاتە شامی شەریف و نانمان بەدەمەوە بكات ! بەڵام منیش و خەڵكی ئازادیخوازیش چاوەڕێین پارتیی ڕاستگۆیانە واز لە پاشقولگرتن لە دۆزی كورد بهێنێت و قۆڵی لێ هەڵماڵێ بۆ جێبەجێكردنی ئەو بەلێن و دروشمانەی كە بانگەشەی بۆ دەكات و ڕۆژانە گوێبیستی دەبین .
نەخێر هیچ پەیوەندییەكم پێوە نەكراوەو منیش هەرگیز جارێكی تر ناگەڕێمەوە ناو پارتی و پارتیبونیش عەیبەیەكی گەورەیە بە سیمای پارتیەكانەوە، دوای هێرش و پەلاماردانی ئێمە لە شاری سلێمانی ڕوداوی ناخۆشتریش ڕویداوە كە ئەویش روداوی پەلاماردانی دكتۆر غالب محەمەد پەرلەمانتاری عێراق بوو كە رۆژی هەینی ٢٦ی شوباتی ٢٠٢١ لەبەردەم ماڵەكەی خۆی لە شاری سلێمانی بەچەقۆ هێرش كرایە سەری و دوای چەند ڕۆژێك سێ ئەفسەری دەزگای پاراستنی پارتی لەلایەن دەزگا ئەمنیەكانی سلێمانیەوە دەستگیر كران و دوای لێكۆڵینەوە دانیان بە تاوانەكانیاندا نا كە بەشدار بوون لە پەلاماردانی دكتۆر غالب محەمەد و دانیان بە هێرش و پەلاماردانەكانی ئێمەش دا نابوو كە مانگی ۸ی ساڵی ۲۰۲۰ پەلاماریان دابوین، بەڵام پارتی هەرزوو لە ئاستی باڵادا هەوڵی بۆ ئازادكردنیاندا فەشەلی هێنا دواجار مەسعود بەرزانی سەرۆكی پارتی هاتە سەرخەت و تاوانبارەكان لەلایەن دەزگا ئەمنیەكانەوە لەبەر خاترو خۆتری سیاسی ئازاد كران و ئازادیخوازانیش بوونە قوربانی تراویلکەی بەرژەوەندی سیاسی !
کوردستانپۆست: قسە و پێشنیارت چییە بۆ ئەو برادەر و دۆستانەت کە ئیستا لەناو پارتییدا ماونەتەوە، ئایا هیچ رێنماییەکت بۆیان هەیە؟
وەڵام: هیچم نییە بۆیان مرۆڤ ئازادە چۆن دەژی، دڵنیام ئەوانەی كە لە ناو پارتیدا ماونەتەوە ڕووكەش خۆیان ئاسوودە پیشان دەدەن، بەڵام لە ناخی خۆیاندا هەست بە ئاسودەیی ناكەم خەم بە سیمایانەوە دیارە و باری دەرونیان جێگیر نییە، چونكە ئەو رۆڵەی ڕۆژانە وەكو كارەكتەرێك دەیگێرێ هی خۆی نییە یاخود ئارەزوی نییە ئەو رۆڵە بگێڕێ، هیچ پلەو پۆستێك و ئیمتیازاتیك نرخی ئازادی نییە و ئازادی كرۆكی بوونی بەشەر پێك دەهێنێت.
کوردستانپۆست: بە رای ئێوە بۆچی پۆستە باڵاکان، چ حیزبی بێت، یان بەڕێوەبردن و حکومی تەنیا سەرکردە و بەرپرسەکان بۆ خۆیان و کوڕەکانیان یان کەسوکاریان بە رەوادەبینن و کەسی دیکە هەرچەندە زیرەک و لێهاتووش بێت ناتوانێت ئەو پۆستە وەربگرێت؟ نەک پارتیی بەڵکو یەکێتیی و گۆڕانیش هەر هەمان کار دەکەن؟
وەڵام: ئەگەر سیاسەت بە عەقڵ و بە زانست بكرێت ئەوكاتە پەیوەندی خوێن و خزمایەتی هەست و سۆز ڕۆڵ ناگێریت، بەڵكو هاوتەریب لەگەڵ عەقڵ و زانست پسپۆریەت و شارەزایی و توانای مرۆڤەكان ڕۆڵ دەگێرێت و ژینگەیەكی لەباری هەرەوەزی بۆ كاری سیاسی بنیات دەنرێت خۆئەگەر نا لە دەرەوەی عەقڵ و زانست سیاسەت دەبێتە موڵكی حیزب و خێڵ ئەوكاتیش عەبەسیەت و هەڵچون و سێنتراڵی هەڵكشان و داكشان و شكست ئاراستەی سیاسەت دەبەن بەڕێوە، پێدان و بەخشینەوەی پلەو پۆستیش لەسەر بنەمای مەحسوبیەت و پەیوەندی خوێن و خزمایەتی دەبێت، ئیدی وبەرگی شارچیتی و خێڵچێتی و بنەماڵەچێتی لەسەروی بەرگی نەتەوەیی و نیشتیمانیەوە دەبێت و كاراكتەرە سیاسییەكان ڕێز لە دونیای جیاوازی یەكتر ناگرن و چاكەی گشتی دەبێ بە ژێر پیوە و بە میزاج وهەڵچونە دەرونیەكان فەزای سیاسی كۆنترۆڵ دەكەن و تەنها کاریان پاراستنی خۆیان و خێزانەكانیانە و ئەوانەی لەدەرەوەی ئەوانن نە دەپارێزن و نەمافی هاولاتیبونیشیان هەیە، ئەم دۆخە دۆخی شەڕە قۆچی سیاسی یە كە حیزب و مێنتەڵییەتی خێڵ رۆڵی تیدا دەگێرن نەك عەقلانیەت و زانست و هونەری بەرێوەبردن، پیدانی پۆستە باڵاكان چ لەناو حیزب بێت یان حكومەت و كابینە یەك لە دوای یەكەكان هۆکارەکەی ئەوەیە هونەری بەڕێوەبردن عەقڵ هەڵی ناسوڕێنێ .
سوپاس و ڕێز
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
