چۆن جەلال تاڵه‌بانی ئیهانەی به فارۆقی مەلا مستەفا كرد؟
Wednesday, 01/04/2009, 12:00
2131 بینراوە
لە وانەیە زۆر كەس نەزانێ، فارۆقی مەلا مستەفا برای دكتۆر عزەددین مستەفا ڕەسولە. هەروەها بە هەمان شێوە لەوانەیە زۆربەی خەڵك نەزانن كە هەردوو ئەم بەڕێزە ئامۆزای زانا و هزرڤانی كورد، شەهید (فازڵ رەسول)ن.
دیارە زۆر جار، بە كوردی و عەرەبی، لە ڕۆژنامە و سایت و گۆڤاری جیاواز، باسی شەهید فازڵ ڕەسولم كردووە. بە هۆی ئەم وتار و باسانە، سوپاس بۆ خوا، ئەم شەهیدە نە ناسراوە بە نێوەندی كورد و ڕۆشنبیرانی عەرەب ناسرایەوە. ئێستا زۆربەی ڕۆشنبیرانی كورد فازڵ ڕەسول دەناسن.
زۆر هەوڵمدا بۆ ئەوەی سیمینارێك یان ساڵیادی شەهید بكرێتەوە و، بەرهەمەكانی تەرجومەی كوردی بكرێ و، هاوڕێیانی شەهید لە دەرەوەی كوردستان میوانداری بكرێن، بۆ زیاتر ناساندن و ڕێزگرتن لە شەهید فازڵ. دیارە پێشتر ڕوونم كردووەتەوە كە ئەم هەوڵانە بێ ئاكام بوون، چونكە شەهیدی ناوبراو لای دەسەڵات و میدیای پارتی و یەكێتی نرخی نیە!
هەرچەندە برای بەڕێز دڵزار حەسەن دیداری لە گەڵمان كرد، بۆ كوردستانی نوێ و، دواتریش كۆڕێكمان ڕێكخست لە گەڵ برای شاعیر فەریدون سامان، لە مانگی 7 ی ساڵی 2006، تیشكمان خستە سەر ئەم بابەتە.
بەڵام دواتر لێپرسراوانی یەكێتی، ئەم دیدارە و كۆڕەكەشیان پێ ناخۆش بوو. بۆیە سەركۆنەی ڕێكخەرانی كرابوو!
ئەوە كەسەی سەرپەرشتی تیرۆر كردنی فازڵ ڕەسول و قاسملۆی كرد لە نەمسا، محەممەد جەعفەر سەحرارودی بوو. بەڵام خودی ئۆپەراسیۆنەكە لا ئەحمەدی نەژاد بەڕێوە چوو، كە لە هنگاریا چەكی دەگواستەوە بۆ نەمسا و، لەوێوە سەرپەرشتی كارەكانی دەكرد.
سەحرارودی پەیوەندیەكی یەكجار بە هێزی هەیە لە گەڵ سەرانی پارتی و یەكێتی، بە تایبەت جەلال تاڵەبانی.
بۆ وەبیر هێنانەوەش، سەرەتای ساڵی 2007، سوپای ئەمریكا دەستیان گرت بەسەر كونسولیەی ئێرانی لە هەولێر بۆ دەستگیر كردنی سەحرارودی، بەڵام چونكە پارتی ئاگاداری سەین و بەینەكە بوو، نیوەی شەو سەحرارودیان دەرباز كردبوو و تەسلیمی ئێرانیان كردەوە!
بێ گومان ئەم كارەی پارتی و چەندین كاری تریش، بوە هۆی تێكدانی متمانەی ئەمریكا بە پارتی و، تێكچوونی پەیوەندی پتەوی نێوانیان. تا ئەمڕۆش ئەم متمانە هەروا بە تێكشكاوی ماوەتەوەو چاك نەبوەتەوە!
بۆ مەسەلەی نوسینی كتێبێك دەربارەی شەهید فازڵ، دوو جار چاوپێكەوتنم لە گەڵ بەڕێز دكتۆر عزەددین مستەفا ڕەسول كرد. جاری یەكەم لە ئۆفیسەكەی خۆی لە زانكۆی سلێمانی ساڵی 2003 و، لە ماڵی خۆشیدا مانگی ئاداری ساڵی 2007. دەققی چاوپێكەوتنەكە لە دوو نوسخەی كاسێت پارێزراوە.
دكتۆر عزەددین بۆی باسكردم، كەوا حكومەتی ئێرانی نوێنەریان ناردووە بۆ لای، بۆ داوای لێبوردن كردن و، ئینكاری كردنی كوشتنی فازڵ ڕەسول!
دكتۆر عزەددینیش ئەم مەسەلە ڕەتدەكاتەوەو، بە نوێنەرەكە دەڵێ: "
ئەگەر سەحرارودی و تاقمەكەی دكتۆر فازڵیان نەكوشتوە، ئەی بۆ پاش ئەنجامدانی ئەم كارە تیرۆریە، پلەو پایەیان لە ناو حكومەتی ئێران بەرز بویەوە؟!"
هەروەها دكتۆر عزەددین لە درێژەی باسكردنی ئەم مەسەلە گووتی:
"
لە نەوەتەكان، سەحرارودی سەردانێكی كوردستان دەكا و دە بێتە میوانی تاڵەبانی. بۆ نانخواردنی نیوەڕۆ، تاڵەبانی تەلەفۆن بۆ فارۆقی مەلا مستەفا دەكا (برای دكتۆر عزەددین وەك پێشتر ئاماژەمان پێی دا)، بۆ حازر كردنی نانی نیوەڕۆ و هێنانی بۆ بارەگای تاڵەبانی كە سەحرارودی میوانیەتی!".
بۆ ئەم مەسەلەش، دكتۆر عزەددین ڕوونی كردەوە: "
فارۆقی برام، هەڵدەستێ بە ئامادەكردنی خواردنی نیوەڕۆ و، بردنی بۆ بارەگای جەلال. پاش ئەوەی ئەم هەواڵەم بیست زۆر بە توندی لە فارۆق توڕە بووم و، پێیم گووت: چۆن دەچیتە مەجلیسی بكوژی ئامۆزامان و خواردنی بۆ دەبەیت؟!"
هەروەها دكتۆر عزەددین گووتی: "
فارۆق پێی گووتم جەلال ئەم كارەی پێكرد و نەیزانیبوو كە سەحرارودی مێوانیەتی، ئەگەر نا نە دەچوو!"
بەڵام دكتۆر عزەددین یەكجار توڕە دەبێ و عوزرەكەی فارۆق ڕەتدەكاتەوە دەڵێ:
" خۆ كە گەیشتیتە بارەگای تاڵبانی سەحرارودیت بینی، بۆ یەكسەر نەگەڕایتەوە؟!". (*)
دیارە هەڵوێستی فارۆق لاوازەو، بەرگری لە خۆی دەكا بەوەی ئەو سەحرارودی نەناسیوە!
بەڵام پرسیار ئەوەیە، ئایا تاڵەبانی لە نێو هەموو سلێمانی كەسێكی نەدۆزیەوە خواردنی نیوەڕۆی پێ ئامادە بكا بۆ میوانە خۆشەویستەكەی، جگە لە فارۆق نەبێ كە ئامۆزای ئەو فازڵ ڕەسولەیە كە میوانە خۆشەویستەكەی كوشتویەتی؟!
باشە مەبەستی تاڵەبانی لەم كارە نا بەجێیە و بێ سیفەتە چی بوو، لە كاتێكدا ئەو دەزانێ ئەم ڕەفتارە لە كوردەواریدا بە ئیهانەو ئەتك لە قەڵەم دەدرێ؟!
بەڵێ خوێنەری خۆشەویست ئەمەیە ئەو كەسەی، لەوانەیە ئێستاش خەڵكانێك هەبن، که بە سه‌ركردە و تێكۆشەری كوردی حیساب بكەن!
ئەم بابەتەشم بۆیە ئاشكرا كرد، كە دەبوایە لەو كتێبە باسی بكەم كە لە پلانمدایە دایبنێم. بەڵام پلانەكەی من جارێ دوا كەوتووە، لە بەر ئاستەنگی زۆر.
لە لایەكی ترەوەش دكتۆر عزەددین هێشتان لە ژیان ماوە (خوا تەمەنی درێژ بكا)، بۆ ئەوەی هەریەكێك ویستی لە ڕاستی ئەم بابەتە بكۆڵێتەوە، ئەوا دكتۆر عزەددین لە سلێمانیە و دەتوانێ پرسیاری لێبكا.
(*) ڕەنگی سوور دەققی قسەكانی دكتۆر عزەددین مستەفا ڕەسولە.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
