به‌رهه‌م ساڵح له‌گه‌ڵ عه‌دنانی حه‌مه‌ی مینا چی پێکیانه‌وه ده‌به‌ستێ؟
Wednesday, 15/07/2009, 12:00
1864 بینراوە
پاش ئه‌وه‌ی شێخ جه‌عفه‌ری به‌نوخوێن شل وه‌ک ڕه‌فتاری هه‌میشه‌یی خۆی له‌شه‌قامی توی مه‌لیک په‌لاماری خه‌ڵکی ڕاپه‌ڕیوی سلێمانی دا و به‌عس ئاسا ڕقی شکستی خۆیان له خه‌ڵکدا به‌تاڵ کرده‌وه، له‌هه‌مان کاتیشدا حیمایه سه‌رشۆڕه‌کانی هێرشیان کرده سه‌ر ستافێکی ته‌له‌ڤیزوێنی(ك. ن. ن) و به‌هه‌مان میتۆدی قوه‌خاسه‌کانی له‌مه‌ڕ مولازم موحسین و مفه‌وه‌ز چه‌لوب جه‌سته‌ی ئاسۆی جه‌مال موختارو هاوه‌ڵه‌کانی خڵتانی خوێن کرد، تائێره ڕووداوه‌که ئاساییه چونکه هه‌م خه‌ڵکی ڕاچڵه‌کیوی گۆڕان و هه‌م ئاسۆ و ستافه‌که‌ی له چاوی لۆمپه‌نه‌کانی جه‌لاله‌وه وه‌ک پێشمه‌رگه و ڕێکخستنه‌کانی کۆمه‌ڵه‌وه به‌هه‌مان نۆڕینی به‌عسه‌وه پۆلێن کراون، به‌ڵام لێدان و شکاندنی که‌رامه‌تی مولازم داستان ئه‌حمه‌د غه‌فوری سه‌ر به هیزه‌کانی پۆلیس که شێخ جه‌عفه‌ر خۆی به به‌رپرسی ئه‌و و سه‌دان ئه‌فسه‌ری تر ده‌زانێت به‌ڵگه‌یه‌کی زه‌قی حاشاهه‌ڵنه‌گره دژ به‌و بانگه‌شانه‌ی به‌رهه‌م ئه‌حمه‌د ساڵح له گردبونه‌وه‌ی جه‌ماوه‌ردا لیستی کوردستانی به لیستی نوێبوونه‌وه و ئاوه‌دانی ناوزه‌ند ده‌کات.
به‌رهه‌م ئه‌حمه‌دی سه‌رۆکه ته‌کنۆکراته‌که‌ی لیستی کوردستانی هه‌ڵبژاردنی په‌ڕله‌مانی داهاتووی کوردستان وه‌ک که‌رنه‌ڤاڵی دیموکراسی ده‌خه‌مڵێنێت، تۆ بڵێی چه‌مکی دیموکراسی به‌ندێکی تیا بێت باس له سوڵحی عه‌شایری بکات و ئێمه بێ خه‌به‌ر بین لێی، گه‌ر وانیه چلۆن ده‌بێت شێخ به‌رهه‌م ئه‌حمه‌د ساڵحی خوای دیموکراسی به قسه‌ی شێخ جه‌عفه‌ری شرواڵ کۆن داوا له مولازم داستان بکات په‌شیمان بێته‌وه له‌و داوایه‌ی له‌سه‌ری تۆمار کردووه.
ئێستا به‌رهه‌م خۆی خزاندۆته ده‌وروبه‌رێکه‌وه که هیچی که‌متر نیه له ئه‌ندێشه‌کانی سه‌رده‌می هه‌رزه‌کاری خۆی، به‌رهه‌می ئێستاش وه‌ک جارانه به‌ڵام له تۆپکی ده‌سه‌ڵاتدایه، به‌رهه‌م به‌ده‌ست خۆی نیه ئیتر ئه‌و له بازنه‌یه‌کدا ده‌سوڕێته‌وه ڕێک وه‌ک ئه‌و ته‌په‌دۆره سوکه‌یه به‌سه‌ر شه‌پۆله‌کانه‌وه، شه‌پۆله‌کانی ئه‌مڕۆش خوڵقاوی ده‌ریاکه‌ی (جه‌لالیزمه) و به‌رهه‌می باران و سه‌ڵته‌نه‌ت و کورسیه کاتیه‌کانه، به‌رهه‌م ئیتر به‌رهه‌می له‌نده‌ن و ئه‌مه‌ریکا نییه، ئه‌و به‌رهه‌می پڕۆژه‌و ته‌نده‌ره‌کانه له قه‌ڵاچوالان نه‌خشه‌ی بۆ کێشراوه، هه‌ر بۆیه ئه‌مڕۆ به‌رهه‌م له گه‌رمه‌ی بانگه‌شه‌ی هه‌ڵبژاردن ناتوانێت به‌رهه‌مێکی ووریا بێت و فاوڵی قورس نه‌کات. ئه‌و له‌باتی ئه‌وه‌ی بۆ بانگه‌شه‌ی لیسته‌که‌ی داوای بکردایه شێخ جه‌عفه‌ر ملکه‌چی یاسا بێت که‌چی به پێچه‌وانه‌وه ڕه‌فتار ده‌کات. دیاره به‌رهه‌م خۆشی ده‌زانێت جه‌لال ده‌سخه‌ڕۆی کردوه و نابێته سه‌رۆکی حوکمه‌تی هه‌رێم، هه‌ر بۆیه پاڵێکی نا به (عه‌دنانی حه‌مه‌ی عه‌دنانی حه‌مه‌ی مینه‌وه) و له‌بری ئه‌و بووه مه‌سئولی کاروباری کۆمه‌ڵایه‌تی و چووه ناو ئه‌و سوڵحه عه‌شایریه‌ی که شێخ جه‌عفه‌ر داوای کردبوو تا ڕێک که‌وێت له‌گه‌ڵ مولازم داستان.
به‌ڕاستی تاڵه‌بانی وه‌ستایه له ناسینی کاندیده‌کانی خۆی.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
