خاڵەکانی مەترسی خراپی خوێندن و پەروەردە چین؟

Monday, 08/07/2024, 16:57

683 بینراوە


+ تۆ بڵێی کاربەدەستانی سیاسی کوردستان ئاگایان لە مەترسی خراپی پەروەردە ھەبێت ؟؟
+ ئەگەر بۆشایی لە نێوان دەستەڵات و خەڵکیدا دروست بێت ، ئاخۆ کێن ئەو کەسانەی کە ئەو بۆشاییە پڕ دەکەنەوە؟؟؟ وە بۆ چ مەبەستێک؟؟
++ خاڵە مەترسیدارەکانی خراپی پەروەردە و خوێندن، بەرفراوانن و کاریگەرییان لەسەر تاکەکانی کۆمەڵگە و هەم لەسەر  کۆمەڵگە خۆشی هەیە !!  لێرەدا چەند لایەنێکی گرنگ دەخەمە ڕوو:
١ . دەرفەتی ئابووری سنووردار دەکات : ئەو کەسانەی خوێندنیان خراپە ، زۆرجار کەمتر دەستیان بە کارێکی باش یان مووچەی باش دەگات !! ئەمەش دەبێتە هۆی کەمبوونەوەی داهات و سنوورداربوونی جووڵەی ئابووری (ئەگەر نەڵێم،  بێکاری و برسێتی).
٢ . نەبوونی کارامەیی سەرەتایی : خراپی پەروەردە ، دەبێتە هۆی کەمی کارامەیی و لێھاتوویی جەوهەری وەک خوێندەواری و ژمارە و بیرکردنەوەی ڕەخنەگرانە! ئەمەش کاریگەری نەرێنی لەسەر کارکردنی ڕۆژانە و ئەدای کار دەبێت.
٣ . نایەکسانی کۆمەڵایەتی : زۆرجار خراپی پەروەردە ، دەبێتە ھۆی بەھێزکردنی ئەو  نایەکسانییەی کە ھەیە و هەبووە 
!.  منداڵانی خێزانە  ھەژار و بێ بەشەکان کەمتر دەستیان بە خوێندنی بەرز دەگات، ئەمەش چانس و بەختی زیاتر کەم دەکاتەوە، بۆ باشترکردن بۆ دۆخی ئابووری کۆمەڵایەتییان !!
٤ . بابەتی تەندروستی : پەروەردە پەیوەندییەکی بەهێزی  ھەڵسوکەوت و ڕەفتاری تەندروستیەوە هەیە !!! چونکە  ئەو کەسانەی کە خوێندنیان کەمترە، زۆرجار باری تەندروستییان خراپترە و تەمەنیان کورتترە بەهۆی کەمی زانیاری تەندروستی و چاودێری لە خواردن و خۆپارێز بۆ ژیان.
٥ . کەمبوونەوەی بەشداریکردنی مەدەنی : پەروەردەی تەندروست و پێشکەوتوو،  ڕۆڵێکی چارەنووسساز دەگێڕێت لە پێشخستنی بەرپرسیارێتی مەدەنی و تێگەیشتن لە پرۆسەکانی دیموکراسی!! بەبێ پەروەردەی پێشکەوتوو، ڕەنگە خەڵک کەمتر بەشداری چالاکییە مەدەنییەکان بکەن و زیاتر هەستیار بن بەرامبەر بە زانیاری هەڵە و گوێ لە کەسانی تر دەگرن وەک (دینباز و شێخ و ئەوانەی بۆ بەرژەوەندی خۆیان ، کەسانی کەم دەرامەت بە ئارەزوی خۆیان دەجوڵێنن )
٦. زیادبوونی تاوان : پەیوەندییەکی بەهێز هەیە لە نێوان ئاستی نزمی خوێندن و بەرزبوونەوەی ڕێژەی تاواندا !!  ئەو کەسانەی خوێندنیان خراپە، بژاردەی کارکردنی گونجاوی کەمتریان هەیە، ئەمەش وایان لێدەکات زیاتر ئامادەبن بۆ چالاکیی لەبواری تاوان و توانکاریدا !
٧ . کاریگەری ئابووری : هێزی کارێکی نەخوێندەوار یان خوێدنی ئاست نزم ،  دەبێتە ھۆی لاوازکردنی بەرهەمهێنان و بێ توانایی لە کێبڕکێی ئابووریدا !. بەمەش زیان بە گەشەی ئابووری و خۆشگوزەرانی گشتی (نەک ھەرخۆی) دەگەیەنێت!.
٨ . کێشەی تەندروستی دەروونی : خراپی یان نزمی پەروەردە دەبێتە هۆی هەستکردن بە کەمتەرخەمی و سترێس و بێزاری، ئەمەش دەبێتە هۆی دروستبوونی کێشەکانی تەندروستی دەروونی وەک خەمۆکی و دڵەڕاوکێ و ترس لە ژیان.
٩ . داهێنان و پێشکەوتنی سنووردار : بۆ پێشکەوتنی تەکنەلۆژی و زانستی ، پێویستمان بە کۆمەڵگەیەکی خاوەن بڕوانامەی بەرز و باش ھەیە!!  خراپی پەروەردە دەبێتە ھۆی ڕێگری لە داهێنان و خاوکردنەوەی پەرەسەندنی بیرۆکە و تەکنەلۆژیای نوێ!.
١٠ . ڕکابەریی جیهانی : ئەو وڵاتانەیکە سیستەمی پەروەردەیان خراپە لە ئابووری جیهانیدا دوا دەکەون و پێگەی خۆیان لەسەر شانۆی جیهانی لاواز بکات!؛
بەکورتی پەروەردەیەکی باش بەردی بناغەی کۆمەڵگەیەکی ئاوەدان و دادپەروەر و پێشکەوتنخوازە.
+ بەڵام ئاخ و ھەزار ئاخ ،  کە عەقڵی سیاسی نەبوو !!، ئەوا پلانیش نییە ، کە پلانیش نەبوو !!!، ئەوا پەروەردە  تێک دەچێت ، کەپەروەردەش تێک چوو !! ئەوا کۆمەڵگە وێران دەبێت !! چونکە باری ئابوری و  ئازادی تاکەکان و بەھای کۆمەڵایەتی و کەلتوری جوانی کوردی و ھەستی نیشتمانی و نەتەوایەتی ،  تێک دەچێن !!! ئەو کاتە ، ھەر کەس بۆخۆی و بەئارەزووی خۆی شتەکان دەشێوێنێت و بەپێی بەرژەوەندی تەسکی خۆی شی دەکاتەوە!!!
+  ئەگەر ھەر کەسیش بۆخۆی کاری کرد ، ئەوا  سیاسەتمەند ، دەبێتە (سیاسەتباز) ، وە مەلای بەناو  نیشتمانپەروەریش ، دەبێتە (دینباز) !!! وە ھەریەکەشیان تەنھا لەیەک کونی بچوکی بەرژەوەندیەکانی خۆیانەوە،  دنیا و ژینگە وکۆمەڵگە دەبینن !!

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە