دەسەڵاتى به‌ناو كوردى و سیاسەتى ترس و تۆقاندن..

Friday, 17/06/2011, 12:00

1114 بینراوە

ئەو سیاسەتە ترس و تۆقاندنەى دەسەڵاتى كوردى دژى نەیارەكان و رێكخەرانى خۆپشاندانەكان پەیڕەوى دەكات مافیاكانى ئیتالیاى هەشتاكانم بیردەخاتەوە كاتێك هەموو ئەو تیمە پۆلیسى و دادوەرییانەیان كردبووە ئامانج كە بەدواى ئەو كەیسانەوە بوون. تەنانەت كار گەیشتبووە ئەوەى ئەو بێژەرانەش كە لە كەناڵەكانى راگەیاندنەوە ئەو چالاكییانە دەخەنە بەر باس و لێكۆڵینەوە بكرێنە ئامانج، بە جۆرێك دواتر لەو بەرنامانەدا لەجیاتى پێشكەشكارى هەواڵ و بەرنامە بوكەڵەیان دادەناو لە رێگەى هەندێك تەكنیكى تایبەتییەوە دەنگى بێژەرەكەیان دەگۆڕى تاوەكو نەناسرێتەوە. لەگەڵ ئەوەى كە باندەكانى مافیا توانییان چەندین پۆلیس، ئەفسەر، دادوەر و پێشكەشكارى بەرنامە تیرۆر بكەن بەڵام هەموو ئەمانە رێگرنەبوون لەوەى كە حكومەت بتوانێ گورزى توندیان لێبوەشێنێت و چەندین باندو سەركردەیان لێدەستگیربكات و تارادەییەكى باشیش چالاكییەكانییان كەمبكەنەوە. كۆتایى هەشتاكان بە رۆژانى سەخت لە چالاكى باندەكانى مافیا ئیتاڵییەكان ئەژماردەكرێت.
بۆیە ئەگەر دەسەڵاتى كوردیش پێیوابێت بەبەكارهێنانى هێزى میلیشیاى سەربازى، میلیشیاى رۆشنبیرى و میلیشیاى راگەیاندن دەتوانێت كۆتایى بە ناڕەزاییەكانى خۆپیشاندەران و هاوڵاتییان بهێنێت، بەبێ جێبەجێكردنى خواستەكانییان، ئەوا پێویستە وانە لە مێژووە دوورو نزیكەكانى ناوچەكە وەربگرێت. لێرەشدا هۆنراوەیەكى شاعیرى گەورەى گەلەكەمان (عبداللە پەشێو) بەبیر دەسەڵات دەهێنینەوە كە بەرامبەر شاڵاوى بەدناوى ئەنفال لە ساڵى 1988 دا وتوویەتى:

لە كۆتاییدا دەڵێم هەموو ئەو دەسەڵاتانەى زەبرو زەنگییان بەرامبەر هاوڵاتییانى سڤیلى خۆیاندا بەكارهێناوەو لەبەردەم دوژمنى راستەقینەى گەلەكانیشیاندا ملكەچبوون دواتر زبڵخانەى مێژوو جێگایان بووە.