په‌یکه‌رێکی ئاشتی بۆ دیاری قه‌ره‌داغی
Monday, 16/07/2012, 12:00
3397 بینراوە
کێ شه‌ڕی نه‌فره‌تیی ناوخۆی بیر نایه‌ت، وه‌ک مامۆستا عه‌بدوڵا په‌شێو ده‌ڵێت شه‌ڕ کام کوانو و ماڵ و ره‌نگی نه‌کردبو به‌دو به‌شه‌وه، هه‌موان ده‌زانین ئه‌وانه‌ی خاوه‌نی ناو بون و له‌شه‌ڕی ناوخۆدا بێ لایه‌ن مانه‌وه‌له‌په‌نجه‌ی ده‌ست تێناپه‌ڕن، هه‌مو کایه‌کانی ژیان له‌و ساڵانه‌دا بو به‌دو ره‌نگ و دو به‌شه‌وه، ماڵی وه‌ها هه‌بو له هه‌فته‌یه‌کدا دو ته‌رمی له‌هه‌ردو به‌ره‌ی شه‌ڕه‌که‌وه‌بۆ ده‌هاته‌وه.
له‌و سه‌رده‌مه‌دا که‌خوێن و جه‌نگ هه‌مو کوچه‌و کۆڵانه‌کانی هه‌رێمی گرت، وه‌ک هه‌مو چینوتوێژه‌کانی تر، هونه‌رمه‌ندانیش بێ به‌ش نه‌بون له‌دابه‌شبون به‌سه‌ر به‌ره‌کانی جه‌نگدا، هه‌رچه‌نده‌هه‌ندێک هونه‌رمه‌ند بێ ده‌نگیان لێکرد و به‌غه‌مباری و دڵێکی شکاوه‌وه‌له‌جه‌نگیان ده‌ڕوانی و حه‌سره‌تیان بۆ کۆتایی هاتنی جه‌نگ هه‌ڵده‌کێشا، به‌ڵام هه‌ندێکی تریش هه‌ر زو بون به‌به‌شێک له‌جه‌نگ و په‌نجه‌و زمان و گه‌رویان خسته‌خزمه‌تی لایه‌نێکی جه‌نگه‌که‌وه.
له‌ناو ئه‌و دو به‌شه‌ی هونه‌رمه‌ندانیشدا و له‌به‌شه‌ناڕازیه‌که‌یاندا هونه‌رمه‌ندێکمان هه‌یه‌که‌پڕ به‌گه‌روی هاواری کۆتایی هاتنی جه‌نگی ده‌کرد، داوای ده‌کرد جه‌نگ کۆتایی بێت و جه‌رگی دایکان نه‌سوتێت، له‌و سه‌رده‌مه‌دا که‌زۆربه‌مان سڵمان له‌هه‌ردو حیزبی شه‌ڕکه‌ر ده‌کرده‌وه، ئه‌و هونه‌رمه‌نده‌به‌گۆرانی دژه‌جه‌نگ نه‌وه‌ی نوێی به‌رامبه‌ر شه‌ڕ رق ئه‌ستور ده‌کرد.
دیاری قه‌ره‌داخی، به‌گۆرانی و ئاوازه‌غه‌مگین و ناوازه‌و جیاوازه‌کانی که‌دژی جه‌نگ ده‌یوت، پێی وتین که‌هونه‌ر‌مه‌ندان ده‌توانن به‌گژ شه‌ڕ و براکوژیدا بچنه‌وه، بۆیه‌له‌ئێستادا که کوردستان تا راده‌یه‌ک سه‌قامگیری سیاسی هه‌یه‌و پارته‌کان له‌بری فیشه‌ک و ئاگر په‌نا ده‌به‌نه به‌ر سندوقه‌کانی ده‌نگدان، هه‌قوایه‌به‌رامبه‌ر ئه‌و هونه‌رمه‌نده‌بێ وه‌فا نه‌بین.
ئێستا له‌کوردستاندا په‌یکه‌ر بۆ زۆر که‌سایه‌تی و ره‌مز ده‌کرێت، په‌یکه‌ر بوه‌به‌ئامرازی گه‌یاندنی مه‌به‌ستی جیاواز، بۆیه‌پێشنیار ده‌که‌م، وه‌ک رێزێک بۆ چه‌ند ساڵ به‌گژداچونه‌وه‌ی جه‌نگ و خوێن رشتن، په‌یکه‌رێکی ئاشتی بۆ ئه‌و هونه‌رمه‌نده‌دروستبکرێت، داواکارم رۆژنامه‌نوسان و رۆشنبیران و هونه‌رمه‌ندانیش پشتگیری ئه‌و بیرۆکه‌یه‌بن، تکا له‌هاوڕێ په‌یکه‌رتاشه‌کانیش ده‌که‌م، ئه‌وه‌شانازیه‌به‌خۆیان ره‌وا ببینن و به‌زوترین کات ئه‌و کاره‌ئه‌نجام بده‌ن، چونکه‌دروستکردنی په‌یکه‌رێکی ئاشتی بۆ ده‌نگێکی وه‌ک دیاری قه‌ره‌داخی که‌ساڵانێکه‌ته‌نها نیشتیمان ده‌لاوێنێته‌وه‌و پشتی له‌حیزبایه‌یتی کردوه‌و نه‌بوه‌به‌دارده‌ستی هیچ لایه‌نێکی سیاسی، ئه‌رکێکی پیرۆزه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
