بوهندەك ژخەلكێ دەڤەرا دهوكێ پارتی یا بو بویە دیانەت.

Saturday, 19/06/2010, 12:00

1638 بینراوە

لدەڤەرا دهوكێ ئەو پشكا مروڤێت هشیار و هوشمەند و ڕوناكبیر و نیشتمان پەروەر یا ڤەچغاندیە ژلایێ دەسەلاتێ و ڕەشەك و قەچاخچیێت وێڤە و دەمێ لڤینەك یان بزاڤەك یان گوتنەك ژێ هاتە دیتن ژهەمی لاڤە دێ داڕەسنێ و بێ نرخ كەن و مستا وان یا لهنداڤ سەری و دەلیڤێ بزاڤ و پێشڤەچونێ نادەنێ.
پشكەكا دی یا هەی، كو بەهرا پتر دەسەلات یا ژوان كەسا پێكهاتی كو ئەو كەسەنە یێت كرێگرتیێت ڕژیما هەلوەشای، چەتە بون یان ناسنامێت چەتاتیێ دبەریكێ دا بون دئامادە بون چ فەرمانەكا ژ لایێ سەركردایەتیا وانڤە ئانكو - مجلس قیادە الپورە - دەركەفتبا دژی هیڤی و ئومێدا گەلێ كوردستانێ ئانكو بنگەهێت پێشمەرگەی وخەلكێ بێ ڕێ و هەژارێ گوندێت دەرڤەری كونترولا ڕژێمێ دا هێرشێ كەنە سەر و داخازا
- قائد الامە العربیە - بجهدئینا، ئەو كەسە خزمەتكارێت دژمنی بون، نیشتمان فروش بون، شەرەفا خو فروت بو بپارە، داخازا وان بن دەستی و خو بەردان بو دبن پیێت دژمناڤە، بهزارەها نمونە و بەلگە یێت هەین، نمونەك ژوان خوفروشا كورێت حسنی بیكداودی بون، كو ڕەشەكێت ڕژێمێ بون و ئەمناتی و جەحشاتی دكر بو ڕژێمێ، محویێ كورێ حسنی بوسە ددانانە بەر ڕێكا پێشمەرگەی و پێشمەرگە شەهید كر و نوكە برازایێ وی زاتی كو هەر ئەو توخم و توڤەیە، دبێژنێ فەهمی سەلمان ئەندامێ كارگێرێ لقا پارتیە لئامێدیێ و بەرپرسێ ڕاگەهاندنا لقێ یە دسەرهندێرا كەسەكێ بێ نرخ و سڤكە لبەرچاڤێت خەلكێ دەڤەرێ.
ڕوژنامەكا هەی لدهوكێ دبێژنێ ڕوژناما ئەڤرو، ئەگەر خەلكێ دهوكێ هەمی ڤێ ڕوژنامێ بخوینن پشكەك ژێ دێ بیت ئەلبێرت ئینشتاین و پشكا دیتر دێ بیتە ولیەم شكسپیر، باهرا پتر ئەو كەسێت لڤێ ڕوژنامێ دنڤێسن ئەو كەسن یێ پشكداری دكر دنڤێسینا بابەتادا دڕوژناما هاوكاری یا ڕژێما هەڕفتی دا، وەكی موسەدەق توڤی و بەهجەت هروری و هتد .... ئەڤ تبەركێت مە ناڤێت وان ئیناین وەكی موسلمانێت گەلەك ژخودێ بترس دەمێ دەست بكارەكی دكەن دێ بێژن بسم اللە، ئەگەر نەبێژن دێ بەرەكەت ژخارنا وان یان ژ كارێ وان چیت، ئەوژی دەمێ دەست ببابەتەكێ نڤێسنێ دكەن پێدڤیە بێژن سەروكی
یا هوكری و یا هو گوتی، دا بەرەكەت بكەڤیتە نڤێسینا وان و ترس و سەهم دسەردا بچیت، شنوی دێ دەست بنڤێسینێت بحێبەتی كەن، هەروەكی بەری چەند ڕوژەكا لدەستپێكێ بەحسێ گرنگی و پێشوازیا سەرەدانا بارزانی كری بو فرەنسا ژبەرهندێ بو دا بابەتێ نڤێسینێ حەلال بیت، لبابەتێ دیفرا بەحسێ زیرەكیا سەید سەدیقێ خانكی كر بو و دابو نیاسین ئێكە ژ كەسێت كو كەلتورێ كوردەواریێ یێ پاراستی و زەنگین كری ژبەر چێكرنا كورتانا و ڤەهاندنا وەریسا و قساندنا پەزی و بپێت پەزێ شەبەكی ڤە دخاند هتد ......
ئەڤ دەستەكا مە دیار كری و لگەل هندەك ژكادرێت پارتی یێت كەڤن دپشكدارن ددەسەلاتیا دەڤەرا دهوكێ دا و كار و خەباتا وان مەدح و سەنایێت سەركێشێت وانن، نمونەیێت ڤان دیڤەلانكا وەكی تدارەكا قەچاخ كورێمەی نە، یێت بوینە كەلەخەكێ بێ هێز و نەمری و نەمای ددەستێت سەركێشێت خودا وەكی داركو بەركێت دامانێ كیڤە بڤێن دێ ژ وی كوژی ڤەگوهێزن بوكوژیەكێ دی و یان دێ ژ دامێ دەرئێخن بێی گازندەكێ بكەن یان نیزنیزەك ژێ بهێت، لێ هندەك ژكادر و پێشمەرگەیێت دلسوزێت كەڤن یێت پشت گوهێت خوڤە هاڤێتین و چ روی نادەنێ و پویتە پێناكەن.
پشكەكا دی یاهەی، پشتی سەرهەلدانا 1991 یێت كرینە زێرەڤان و چەكدار كرین، ئەڤ ژارو پەریشانە دێ هەیڤەكێ پارەی دەنێ و دوو هەیڤێت دی دێ بو بێ پارە شولكەن، ئەگەر هندەك پارە ژ پاشەزینكا ڕوژ نوری شاویسی و بابەكر زێباری زێدەكر دێ وی پارەی لێكڤەكەن لسەر فەرماندەیێت لەشكەری و ئەوژی دێ بەهرا خو ژێڕاكەن و یێ ژبەرمای دێ دەنە وان پەریشانا، ئانكو مرن و ژینا وان یا ددەستێت دەسەلاتێدا و كەسێ دی نابینن لڕەخ و دورێت خو ژوان پێڤە، ئەگەر پسیار ژێبكەی و بێژیێ كی دشێت ڕوناهیا ڕوژێ بڤەمرینیت و بای بڕاوەستینیت و ئوقیانوسا هشك كەت و ژیانێ بدوماهیك بینیت، دێ بێژیتە تە پارتی.