فەرهادێ ئەتروشی و سڤكێ هەوارا كەی تی ڤی و دەسگەهێت راگەهاندنا دهوكێ.
Friday, 28/05/2010, 12:00
1193 بینراوە
بەری گوندێت مە ڤبەر پێلێت ڤەگوستنا بزوری بكەڤن بو ئوردیگایێت زورەملی، تێكەليێت مە ل گۆندا گەلەك بهێز بون بشەڤ و روژا مە سەردانا ئێك و دوو دكر، بیرا من دهێت گوندێ مە هندەك چیروك بێژهەبون، ل زڤستانێ چ مالا ئەو چیروك بێژە چبانێ مە قەستا وان مالا دكر بو گۆهدانا چیروكا، چیروك ژی چەند جور هەبون، چیروكێت مێرانيێ و جەنگ و پێكدادانا، چیروكێت ئەڤینداريێ، چیروكێت قۆرتال كرنێ ژتەنگاڤیا بهارریكاریا سیمەرخا، و چیروكێت رویڤیا بو زاروكا. ئارمانجا من ژڤێ نڤێسینێ چیروكا قورتال كرنێ یە، دەمێ چیروك بێژی دیار دكر ڕولێ فێهرس و پەهلەوانێ چیروكێ
سیمەرخەك هەبو بو تەنگاڤیا وجوتەكێ پەڕا ژ چەنگێ سیمەرخێ دهەلكێشانە دەرڤە و چ گاڤا پێدڤی سیمەرخێ ببا دا وان هەردوو پەڕا لێكدەت و سیمەرخ دا ئامادە بیت بو هەر فەرمانەكێ. سەیدایێ فەرهادی ژی هەر دەسگەهەكێ ژوان جوتەكێ مویێت پرچێ خو یێت داینێ دەمێ پێدڤی سەیدای دبن مویێت پرچێ وی لێك ددەن سەیدا بسیمەرخ ڤە ئامادە دبیت، ئەڤە چەند روژەك بو ل مالپەرا ئەڤرو دیدارەك لگەل هاتبو كرن و ژبەر گەلەك گرنگیا وێ دیدارێ هەیامەكێ درێژ یا لسەر مالپەری بو، وەسا دیار بو بو روژناما ئەڤرو كو ئەڤ بابەتێ دیدارێ نێڕینەكا دویرو هزرەكا كویرە و بشافتنەكا ژ ڕهو
ڕیشالایە لسەر كاودانێت عێراقێ و كوردستانێ، سەیدايێ فەرهاد دیار دكەت كێشا عێراقێ یا ئالوزە و عەلاوی د بێژيت لدویف دەستوری سەروك وەزیراتی پشكا منە و مالكی دبێژیت سەروك وەزیر دێ ژهەردوو لیستێت دەولەتا نیشتیمانی و هەڤالبەندا نیشتیمانی بیت، سەیدایێ فەرهاد راست دبێژیت دێ هەرئێك ژوان بیت، مە دگوتە ڤان ئاخڤتنا كرامەتێت قەشەی، قەشەی یا گوتی ئەگەر وەریسی دنیڤەكێڕا ببڕن دێ وەریس بن چوار سەر، سەیدای دیار نەكریە كانێ ڕولێ لیستێت كوردا دێ بچ ڕەنگ بیتن بتنێ ناڤێ سەروك كومارو د. ڕوژ و هشیار زێباری یێ ئینای و ڕولێ وان یێ چاك ددانوستاندنێت
نەڕاستەوخو دا، دیسان یا دیار كری كو پێدڤیە مەژی ڕولەك هەبیت دچێكرنا هەڤپەیمانیادا، سەیدا مەبەستا تە ژ مە كی یە؟
دیارە تو حەز ناكەی ناڤێت لیستێت دی يێت كوردی بينی ئان تە سنورەك هەیە تو نەشێی ژكەڤیا سەڕادێ دەركەڤی و پتر لڕەخ و دورێت خو بنێری ؟
ئەڤە حەفت سالە ئەو دەستكەفتیێت تا نوكە ل بەغدا ژلایێ سەروك كوماری و هشیار زێباری و د. روژی ڤە بو مە دابین كرین تێرامە هەنە و ئەم یێت پێ حەمەر بوین، نەخشێ باشورێ كوردستانێ یێ نەخش كری و سنورێت كوردستانێ یێت داناندین لگەل عەرەبا و عەرەبێت داگیركەرێت كەركوكێ و دەڤەرێت ڕەخ و دور يێت زڤڕاندین سەر جهێت وان یێت بەرێ، و ئەڤ چوار سالێت بهێن دێ كار بو دهوكێ ژیكەن چونكی دڤەرا پارێزگەها دهوكێ یا داگیركریە ژلایێ فاشستێت تورك ڤە و چەند بنكێت لەشكەرێ توركا یێ لناڤ بەرواریا و بامەرنێ و ئامێدیێ هەین ئەوان ژی دێ كەنە دەرێ، و داخازا بودجەیەكا مەزن
ژ دەسەلاتا ناڤەندا میریا عێراقێ كەن بو نویژەنكرنا وێرانیا كوردستانێ و دێ كەس و كارێت ئەنفال كریا موچە و قەرەبو كەن، بئانەهیا خودێ ددەمێ بهێت دا سەیدا فەرهاد ژی دێ چیت بەغدا شوینا عادل بەگێ بەرواری گریت و ئەو كارو كنی و كنێزێت عادل بەگێ كرین و هندەك ماینە برێڤە سەیدایێ فەرهاد دێ بومە بەتە سەری! ئەڤە كار و كوكێ مە لبەغدا هاتە كرن!
سەیدایێ فەرهاد گەرم دبیت و پێڤە دچیت ئاڤریەكێ ددەتە كێشا شەهید كرنا گەنجێ بێ بەختی و زورداری لێ هاتیە كرن شەهید سەردەشت عوسمانی و دبێژیت ئەوكێشەیە یا ژقەبارێ وێ مەزنتر لێ هاتی و لایەنێت عەرەبی یێت عێراقی و دەرڤە یێ پێ دئاخڤن و ئەڤە تشتەكێ ترسناكە، ئەرێ سەیدایێ فەرهادێ بەلەنگاز كوشتن و بڕین و ڕەشە و گەف دترسناك نینن لێ ئاخفتن و ڕاگەهاندن تە و دەستەكا تە دترسینن، وەسا دیارە سەیدا حەز ژیاسای دكەت و ناڤێ دادگەهێ و دادوەری یێ ئیناندی و دبێژیت نابیت چ لایەن لایەنەكێ دی گونەهبار بكەن بتنێ دادوەری مافێ هەی كەسێ گومان لسەر تاوانبار
بكەت، ڕاستە و تو شەكرێ دخوی! لێ كیشك دادوەر و كيشك دادگا، ئەو دادوەر و ئەو دادگایە ئەوێت جەعفەر ئێمينكی لێ دادگای كری دەمێ گەنجەكێ هەڤدە سالی بدەبانجا خو شەهید كری و دادوەری كەسەكی دی ژ پێش جەعفەری ڤە هاڤێتە دگرتیخانێ ڤە، ئەرێ گەلو هوسا قەومیە ئەڤە ژیانێ لسەر رویێ عەردی دەست پێكری و دیروك هاتیە نڤێسین، سەیدا دادوەرو دادگا بو وان كەسانە لكوردستانێ ئەوێت برسی و تێهنی و رویس و ڕەوال و یێت هاتینە داڕوین و ڕویت كرن ژ هەمی مافێت مروڤاینیێ ڤە ئەو بتنێ دهێنە دادگای كرن.
سەیدایێ فەرهادێ قەلەندەر قیت دكەتە ئوپزسیونێ و ئاستەكێ لدویف قایدا خو بو ددانیت و دبێژیت عەقلیەتا وان یا بچویكە و پروگرامێت ڕێكخستی نینن ولایەنێ بێ هێزە و بتنێ دەسەلاتا كودستانێ ژلایێ ڕەوایەتیێ، جەماوەری، شەرعیەتێ، مێژوی و قانونێ ڤە یێ بهێزە، سەیدا تە لایێ لەشكەری و دارای دسەڕا بازدا،
بەربژێرێ سەركەفتیێ هەڤپەیمانا كوردستانی فەرهاد ئەتروشی، عەقلیەتا بچویك ئەوە كورسیك و دەسەلات و دارای و خەلكێت هندەك دەڤەرا وەكی كومەك)سلعه(بهێنە پاوان كرن و دەڤ دروین ودەڤ بێنانا خەلكی یە، عەقلیەتا بچویك ئەو نینە پتر ژ چوار سەدو هەشتێ هزار گوڕانخازێت ژیێ وان ژهەژدە سالیێ و ژوور لبن گەفێت نان بڕین ودەرئێخستن ژسەر كارێ وان و كرێت كرن و گەفێت كوشتنێ لێ دكرن، دسەر ڤان هەمی گەفاڕا دەنگ ددا گوڕانكارا ودگوتن بەلێ بو ئازادیا بیرو باوەرێ و دەربڕینێ، بو وەكهەڤیێ، بو تەناهیێ، بو داد پەروەریێ، بدیتنا سەیدای پەیرەو و پرگرام و رێكخستن
ئەون ئەوێت لایەنێ وی بەری چەندین سالا نڤێسی و كەلەپورێ چەرخی بوریە، نزانیت پروگرام و رێكخستن ئەوە كو كومەكا هزرو بیرێت هەڤپشكێت جڤاكینە و بەردەوام یێت دگوهڕینێ دا و پێشەڕوژا جڤاكی دیارە دكەن. سەیدا ئەم ژ نوكە وێڤە دێ لچاڤەڕێی
گوتارو دیدارێت تە یێت حێبەت گرتی بین.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
