هۆکارەکە بەرژەوەندی تاکە کەسە یان کەلەرەقی پارتیە ؟

بە پێی سەرچاوە هەواڵیەکانی نزیک لە پارتی، ئەمرۆ رایانگەیاندووە کە ئەو حزبە، یان بەراشکاوی خودی بارزانی بە خۆی پێشنیاری ئەوەی کردووە کە ئەوان رازین بە سەرۆکایەتی گۆران بۆ پەرلەمان و کۆبونەوەکانی گرێ بدرێتەوە بە تەنها مەرجێک ئەویش سەرۆکی پەرلەمان شەخسی یوسف موحەمەد نەبێت . 

ئەوەی گوێی لەم قسانەی پارتی و مەرجەکانی و رەفتاری لەم حاڵەتەیدا بگرێت، باش دەزانێت کە سیاسەتی ئەم حزبە تەنها بەندە بە شەخسی مەسعود بارزانی و بەرژەوەندیە تەسکەکانیەوە و هیچ ئامانجێکی تری نیە و ئەوەی لە راگەیاندنەکانەوە دووبارەی دەکەنەوە تەنها چەواشەکاریە و هیچی تر، ئەگینا ئەو قسانەی کەدەیکات و دووبارەی دەکاتەوە؛ کە ئەو ئاسانە بۆ لاچون ناگات بە هیچ شوێنێک  و، تەنها رێگر ئەوەیە کە سەرۆکی پەرلەمان ملکەچی فەرمانی بارزانی نەبووە بۆ دووبارە دانانەوەی  وەک سەرۆکی هەرێم و هیچی تر و، ئەم رەفتارەی سەرۆکی پەرلەمان بە کارێکی شەخسی وەردەگیرێت و مامەڵەی لەگەڵدا دەکرێت، ئەمە لە لایەکەوە و لە لایەکی ترەوە هەڵوێستی پارتی ئەوەندە لاوازە، خۆی خستۆتە گۆشەیەکەوە تەنها دەیەوێت خۆی لەم کارە رزگار بکات بە مەرجی دەرچونی بە رووسوری، بەڵام  بێ ئەوەی بوێرێت بە راشکاوی باسی ئەوە بکات و قسە لەسەر هەڵەکانی بکات و بەخۆیدا بچێتەوە .

لەم رەفتار و هەڵوێستەدا بۆ هەموو لایەک دەردەکەوێت کە پارتی و زۆرینەی حزبەکان چەند لە روبەرێکی تەسکەوە مامەڵە لەگەڵ پرسە گەورە و سەرەکیەکان دەکەن و بەرژەوەندی و دوارۆژی میلەتەکە چەند گرنگە لایان و تا چەند لەخەمی میلەتدان .

ئەم هەڵوێستەی پارتی زۆر شتی تر دەسەلمێنێت، وەک راستیی دەنگۆ و هەواڵی ئەوەی برسیکردنی میلەت بە مەبەستی ملکەچ کردنی خەڵک و لایەنەکان بە پلاندارێژی بووە بۆ داواکاری تاکە کەسێک و مانەوەی لەسەر عەرشی عاجیەکەی، ئەگینا باری ئابووری هیچ پەیوەندیەکی بەم قەیرانی موچەوە نیە .

جا تۆ وەرە بەم عەقڵیەتە حوکم بکرێیت و  خەڵکیش لە ژێر ئەم بارە قورسەدا گوزەرانیان بەرێبکەن !