دادگای سەورەى بەعس، بە هەموو دڕندایەتییەکى رژێمەکەیان زۆر لە بنەماڵەى بارزانى شەریفتر بوون


پۆست گارە

Wednesday, 02.17.2021, 18:21

1288 بینراوە


 پەکەکە لە مێژە ئاماژە بۆ دەسەڵاتی باشوور ڕائەکێشێ لەوەی پێوستە لەبەرەی گەلی کورد بن وخۆیان نەخەنە بەرەی دوژمنانی کورد و کوردستان . داوایان لێکردوون چیتر لەدژی ئازادیخوازانی گەلەکەمان بە گشتی و ئەندام و لایەنگرانی پەکەکە زانیاری و گەلەکۆمێ لەگەڵ تورکان نەکەن و دژ بە سەنگەری پەکەکە،فیشەك ئاڕاستە نەکەن. هەر کاتێ گەریلایەك کرابێتە ئامانجی دەزگای میت و سوپاکەی ئەردۆگان و شەهید کردنی، هەر زوو پارتی و بنەماڵەی بارزانیان لێ ئاگادار کردۆتەوە و داوایان لێ کردوون چیتر چاوساغ و کەواسووری پێش لەشکر،نەبن.
بەداخەوە کاتێ پەکەکە ئەم هەموو ڕاستیەی زانیوە لێ نەیتوانیوە بە شێوەیەکی تەواو لەڕەگەوە ئەم کێشەیە چارەسەر بکا و لێرە و لەوێ چەندین گەریلا و ئەندامانی زەرەمەندی ئەم سیاسەتەی پەکەکە بوون. کادیرانی پەکەکە ئەبوو زۆر لەوە زیاتر بەتەنگ هاوەڵەکانیانەوە بوونایەوە و ئەوەندە خەم سارد نەبوونایە ، دەنا هەموان پارتی و بنەماڵەی بارزانی باش ئەناسین و لەوەتەی هەن جگە لەخیانەت و کاری مقاشی بۆ بێگانە و کوشتنی ئازادیخوازانی هەموو پارچەکانی کوردستان، هیچی ترمان لێ نەبینیون.. 
گەر ئامارێکی کورت بکەین بۆ ژمارەی شەهید و زیندان و تیرۆرکراوانەی  ئەو هەموو گەریلا و ئەندامانەی سەر بەم ڕێکخراوەن لەلایەن هەردوو چەتەی ئەردۆگان و مەسعودەوە، ئەوا پێوست بە بەڵگە ناکا بۆ ئەوەی پەکەکە نەخشەیەکی وای هەبوایە لانی کەم ڕێگری لەم تاوانانە،بگرتایە.
هێرشی ئەم جارەی جەندرمە و بەهاوبەشی چەتەکانی مەسعود بۆ سەر چیای گارە و زانینی ئەو حەشارگەیەی بۆ زیندانەکانی سوپای ئەردۆگان دیاری کرابوون لەلایەن پاراستن و دانی ئەو زانیاریانە بە  میت و پاشان لەڕێگای هێزی سەربازیەوە هەموویان لەناو بران،ئاماژەیەکی تری ترسناکە لەوەی لە کاتی تردا دووبارە بێتەوە. ئەم سەرکەوتنەی ئەم جارەی هێزی گەریلا گەر بێت و ڕیشەی خیانەتی پارتی و بنەماڵەی مەسعود هەڵنەکەنرێت، ئەوا ئەبێتە ئاریشەیەکی زۆر ئاڵۆز بۆ داهاتوو. پەکەکە ئەبێ وانەی ئەم جارە هەوڵدان بێ بۆ ڕیشەکێشکردنی چاوساغانی پارتی و ئەوانەی کار بۆ میت ئەکەن. ئەگەر نا ئەوا لەجیاتی سەرکەوتن جارێکی تر پەکەکە زەرەرێکی تر ئەکا کە ڕەنگە داهاتوویان بەتەواوی بخاتە مەترسیەوە.