من په‌كه‌كه‌م من تیرۆریستم

Wednesday, 11.17.2021, 18:29

686 بینراوە


له‌و شاخانه‌ به‌ ده‌نگی به‌رز گۆرانی ده‌ڵێم 
مۆسیقام هاژه‌ی ئاوه‌و 
ده‌فم حیله‌ی ئه‌و ئه‌سپانه‌ی كه‌وی نابن 
كۆتره‌كان له‌ سه‌ر له‌پی ده‌ستم ده‌نیشنه‌وه‌و 
ئاسكه‌كان له‌ گه‌ڵما ئاو ده‌خۆنه‌وه‌ 
به‌ دوای ئازادیدا وێڵم و پارێزگاری له‌ زمان و بون ده‌كه‌م 
بیره‌وه‌ریه‌كانم له‌ سه‌ر گه‌ڵای داره‌كان ده‌نووسمه‌وه‌ 
به‌ دیلانێ‌ سروشت ده‌خه‌مه‌ سه‌ماو 
له‌ نێو قه‌دی هه‌ر دارێك ناوی شه‌هیدێكم ده‌نووسم 
من په‌كه‌كه‌م من تیرۆریستم 
به‌ كوردی شیعره‌كانی  یوسف خه‌یاڵ ئۆغڵو ده‌خوێنمه‌وه‌ 
به‌ كوردی له‌ ته‌ك ئارام تیگرانا ده‌ڵێم شیرین  و وه‌شه‌ زمانێ‌ كوردی 
به‌ كوردی گوێ‌ له‌ دواپه‌یامی گۆنه‌ی ده‌گرم 
به‌ كوردی بیره‌وه‌ریه‌كانی ئاپێ‌ موسا ده‌خوێنمه‌وه‌ 
به‌ كوردی به‌یانی باش له‌و نێرگزه‌ چاڕانه‌ ده‌كه‌م هێشتا پۆستاڵی ژاندارمی پێنه‌گه‌یون 
من په‌كه‌كه‌م من تیرۆریستم 
له‌و په‌ڕی نه‌هامه‌تیدا ئومێد ده‌چێنم 
برینه‌كانی جه‌سته‌م ده‌ده‌مه‌ به‌ر خۆره‌تاو 
شه‌هیده‌كانم له‌ نه‌مریدا دۆن ده‌كه‌م 
له‌ سه‌ر كێله‌كه‌ی گۆڕی ئۆلف پاڵمه‌ ده‌نووسم براده‌ر مه‌رگی تۆیان كرده‌ بیانوی كوشتنی من 
له‌و كه‌مه‌ نانه‌ی پێمه‌ به‌شی ئه‌و ئاژه‌ڵانه‌ ده‌ده‌م ناپاڵم و هاوه‌ن ترساندونی 
من په‌كه‌كه‌م من تیرۆریستم 
له‌ دوای ته‌واو كردنی زانكۆ چیاكان پڕ ده‌كه‌م له‌ ژیان 
له‌ نامه‌یه‌كدا بۆ دایكم ده‌نووسم چی تر به‌ توركی شه‌ق و شڕ مه‌دوێ‌ 
به‌ یه‌شار كه‌مال ده‌ڵێم كه‌ی برینی ده‌رسیم ده‌نووسیته‌وه‌ 
گوڵ ده‌ده‌م به‌ هه‌موو ئه‌و سه‌ربازه‌ دیلانه‌ی بۆ كوشتنی من هاتبوون 
یارمه‌تی پیاوێكی پیری نابینای تورك ده‌ده‌م ده‌ ده‌چێته‌وه‌ ماڵه‌وه‌ 
من په‌كه‌كه‌م من تیرۆریستم 
زیندان پڕ ده‌كه‌م له‌ سرودی ئاشتی 
به‌ ده‌نگی به‌رز گۆرانیه‌كانی كایه‌ ده‌ڵێمه‌وه‌ 
له‌ سه‌ر دیواری زیندانه‌كان ده‌نووسم "بمرێ‌ شه‌ڕ" 
شیعر بۆ پێكه‌وه‌ ژیانی گه‌لان ده‌خوێنمه‌وه‌ 
من په‌كه‌كه‌م من تیرۆریستم