بابوخکێ

ئەمەی سەرەوە ناوی ئەو گوندەیە کە سەر بە پارێزگای دهۆکە و گەنجێکی تەمەن 23 ساڵ لە لایەن براکەیەوە، تیرۆر کرا. هۆکاری ئەم کارەش بۆ ئەوە ئەگەڕێتەوە کەوا ئەم گەنجە ڕەگەزی خۆی گۆڕیوە .

چەندین ساڵە لەو گوندانەی نزیك شاری دهۆك و زاخۆ سوپای داگیرکەری تورکیا و میت خاکی کوردستانیان داگیر کردوە و زیاتر لە 60 سەربازگەیان لەو ناوچانە دروست کردوە کەنەك تەنها وەك شوێنی قەدەغەکراوی لێهاتوە و خەڵك و  خاوەن زەویەکانیان دەرکردوە و هەرچی بەردەستیان کەوتبێ، دزیویانە و ڕەوانەی تورکیایان کردوە . وەیان لانی کەم هەستاون بە سووتاندنی سەراپا موڵك و ماڵی گوندنشینان و کاولکاری مەزنیان تیادا ، کردوە. بە داخەوە زۆرجار گەواهی ئەوەمان کردوە کە هەندێ لەو گوندنشینانە هەستاون بە هانا چوونی سوپای تورك و مەڕ و مانگیان بۆ سەر بڕیون و خوانیان بۆ ساز داوون. کەئەمەش بەتەواوی لە فەرهەنگی هیچ میلەتێکدا نیە ڕێز لە داگیرکەری خۆی بگرێ و لەسەر هەمان سفرە پێکەوە نانی ئێوارە ، بخۆن.

گەنجێك تەنها وویستویەتی تەلیسمی ترس بشکێنێ و خۆی بەو شێوەیە نمایش بکا کە لەش و هەست و نەستی پێکەوە بگونجێن، ئەم گەنجە نەهاتوە خیانەت لەگەلەکەی بکا و چاوساغی بۆ دوژمنی داگیرکەری کوردستان بکا، ئەم گەنجە نەهاتوە ماڵ و موڵکی گوندنشینەکانی تر بکا ، نەهاتوە چاوساغی بۆ دوژمن و میتی تورکی بکا، نەهاتوە سەروەت و سامانی کوردستان بەهەدەر ببا و نەهاتوە هاوپەیمانی لەگەڵ دوژمندا ببەستێ، ئەم گەنجە تەنها وویستویەتی ئەو ڕاستیە دەربخا کە چەندین ساڵە وەك گرێی دەروونی پێوەی ناڵاندویەتی.

میلەتی ئێمە خیانەت و ژنکوژی و خاكفرۆشی و دەست تێکەڵکردن لەگەڵ دوژمنان بە کارێکی ئاسایی و سروشتی ئەزانین و هیچ کات پێمان نەنگی نەبوە و باجیشمان نەداوە.. بە پێچەوانەوە لایه زۆربەمان نیشانەی پیاوەتی و نێرێتیە. کەچی گەر یەکێکمان کارێکی وەك ئەوەی ئەو گەنجەی کردی بیکەن، ئەوا چارەنووسی کوشتن و تیرۆرە.

میلەتی ئێمە بەگشتی و ئەم نەوە نوێیە بە تایبەتی ئەبێ لەسەر ئەم کارە قیزەوەنە بێنە دەنگ و دەسەڵاتی ئایینی و سیاسی ئەم بەشەی باشوور تەواو شەرمەزار بکەن. ئەبێ هەموان لەسەر ئەو تاوانە بێدەنگی بشکێنن و نەیەڵن ئەو کارە دووبارە ببێتەوە. 

مردن و سەرشۆڕی بۆ دەسەڵاتی دز و گەندەڵ و خاکفرۆشی پارتی و بنەماڵەی بارزانی کەهەر ڕۆژەی خەریکی نانەوەی کەتنێکی لەو شێوەیەن لەو ناوچانەدا کە مەبەستیان تەنها خۆ دزینەوەیە لەو هەموو کارە نەخوازراوانەی دژ بە میلەتەکەمان ئەیکەن و خەریکی شاردنەوەی کارە نا مرۆڤایەتیەکانیانن. وە مردن و سەرشۆڕی بۆ ئەو مەلا و پیاوە ئایینیانەش کە فوو ئەکەنە میزڵدانی دەسەڵات و هەوڵ ئەدەن کەلتووری جوان و بەرزی کورد ناشرین بکەن و لە شوێنیدا کلتوورێکی نامۆ و ناشرینی بیابان بەسەر گەلی کوردا لەڕێگای مەلا داعشەکان و ئەردۆگانەکان، بسەپێنن.

دهۆک: گەنجێك لەلایەن براكەیەوە كوژرا کە رەگەزی خۆی گۆڕیبو

پۆلیسی دهۆك، رایگەیاند، ئێوارەی ئەمڕۆ دوشەممە، تەرمی گەنجێكی تەمەن 23 ساڵان لەسنوری پارێزگاكە دۆزراوەتەوە كە بەپێی زانیارییەكان لەلایەن براكەیەوە كوژراوە.

ئاوێنە: پۆلیسی پارێزگای دهۆك، لە راگەیەندراوێكدا وتی، ئێوارەی ئەمڕۆ دوشەممە، پۆلیسی نەهێشتنی تاوان/نوسینگەی كوشتن ئاگاداركرانەوە لە بونی تاوانێكی كوشتن و دەستبەجێ تیمێكی تایبەتمەند دەستیان كرد بە دواداچون و دوای گەڕانێكی زۆر لە نزیك گوندی "بابوخكێ" تەرمێكیان دۆزیەوەو رەوانەی پزیشكی دادیی دهۆكیان كرد.

پۆلیس ئاماژەی بەوەداوە كە لە لێكۆڵینەوەكاندا دەركەوت كە كوژراوەكە ناوی (د. ا.)و تەمەنی 23 ساڵ و خەڵكی پارێزگای دهۆك بوە.

پۆلیسی دهۆك ئەوەشی وتوە، بكوژی تاوانەكە خۆی شاردۆتەوەو بەپێی زانیارییەكانی پۆلیس بكوژ برای كوژراوەكەیەو لە دەرەوەی كوردستان دەژی.