کە هاتمەوە شەیتانەکانی نیشتیمان رەجم دەکەم.

بیست ساڵ زیاترە نەمتوانیوە سەر بکەمەوە بە کوردستان و نیشتیمانی داگیرکراودا.

بیست ساڵ، کە تەنیا یادەورەییەکانی تەمەنی هەرزەکاریمی تێدا دەبینم, لێ منی بێ هیوا نەکردووە، هێشتۆمیەتەوە، تا لەم دوورییەوە بۆ نیشتیمانەکەم بژیم، بەو هیوایەی ئەو رۆژە ببینم، کە دەسەڵاتی دزەکان نەمێنێت و بە دیداری شاد ببمەوە.

ئەو برایەم کە کۆچی دوایی کرد، لە دوا تەمەنی ژیانیدا و لە قوڵایی ئازاری نەخۆشییەکانیدا دەیگوت: دەترسم بمرم و نەتبینمەوە. ئەو مرد و ئازارەکەی بۆ من و ترسەکەی لەگەڵ خۆیدا بردە ژێر گڵەوە.

ئەمە یەکەم جار نییە کەسیێکی خۆم ماڵئاواییم لێبکات و نەیبینمەوە، لەو هەموو ساڵانەدا دایکم و باوکم مردن، کەسیانم نەبینییەوە، مام، پور، خاڵۆزا و پورزاکانم زۆربەیان ماڵئاواییان لە ژیان کرد، لە نزیکەوە لەگەڵیاندا نەبووم، زۆر لە هاوڕێکانم جێیان هێشتم، پێش مردنیان ئەوانیشم نەبینییەوە.

هەندێک کەس بۆم دەنووسن: هۆکارەکەی ئەوەیە، کە تۆ بە رقەوە دەنووسیت و قسە بە دەسەڵات دەڵێیت و مێژووی ئەو سەرکردانە ناشرین دەکەیت.

ئەوان پێیان وایە تەنیا رقێکی نەرێنی هەیە، نازانن، کە لە دەرەوەی ئەو رقە پیرۆزەی من، هەستێکی دیکەش هەیە، تەژییە لە خۆشەویستی بۆ خاک و گەل.  ئەوان وا دەزانن منیش دەبێت وەک خۆیان خاڵی بم لەو هەستە پیرۆزە، لەو خۆشەویستییە مەزنە، دەیانەوێت سەری رقم بەسەر دەسەڵاتی دزەکاندا بنەوێنمەوە، وەک خۆیان لە ناو دنیای ناوگەڵ و گەدە و خۆشییەکانی ژیانیاندا دابنێم.

کابرایەکی چەنەباز هەیە، گوایە رووناکبیرە،پێی خۆشە بە دکتۆر بانگی بکەن بۆم دەنووسێت:

(تۆ ترسنۆکی، تۆ (جبان)یت، تۆ لە پاڵ کۆمپیتەرێکدا لە دوورە وڵاتەوە دانیشتوویت قسەی زل دەکەیت. خەتێکی راست و چەپم پێدا دەهێنێت، دەیەوێت بمسڕێتەوە. درێژەی دەداتێ: ئەوە ئێمەین، کە لێرە سەر و ماڵمان تیاناوە، پەلاماری ئەم دەسەڵاتە ئەدەین، نەترسانە دەچین لە راگەیاندن و کەناڵەکانیان قسە دەکەین، هەی کەمالی فەقیر... هەی ترسنۆک تۆ چیت کردووە و چیت لە دەست دێت؟! ئەگەر راست دەکەیت فەرمو وەرەوە لایەنی کەم لەبەر دەرکی سەرای سلێمانی، کە وەک منت پێت ناکرێت بشیڕێنیت، فەرمو تاکە وێنەیەکی خۆتم بۆ بگرە! ئایا ئەمە دەکەیت!؟ نەخێر نایکەیت، چونکە تۆ ترسنۆکیت.... تۆ جەبانیت!؟).

- پێش چەند ساڵ لەمەوبەر نێچیرڤان بارزانی لە کۆبوونەوەیەکدا، قسە لەگەڵ کارمەند و کەسە نزیکەکانی دەوروبەری خۆیدا دەکات، تا رێنمایی بکەن چی بکات بۆ ئەوەی دەنگە ناڕازییەکان فێری پیسخۆریی بکات؟! یەکێک لە پێشنیارەکان، کە دەیخەنە بەر دەمی ئەوە دەبێت، داوەتنامە بۆ هەندێک لەو کەسانە بنێرن، بەتایبەتی ئەوانەی دەرەوەی وڵات، تا بگەڕێنەوە، بۆ ئەمە ناوی ژمارەیەک لەو کەسانەی بۆ هەڵ دەدەن، یەکێک لەوانە ناوی منیش دەبێت!

وەک بۆیان گێڕامەوە: کاتێک نێچیرڤان ناوی من دەبیستێت تووڕە دەبێت و دەڵیت: هەر پێ بنێتەوە کوردستان، من سەگی پیوە دەنێم.

وەڵامی منیش ئەوە بوو، کە رەنگە مەبەستی لە خۆی بووبێت، دەیەوێت قەپم پێدا بکات.

- کاتی خۆی کە کوردستانپۆست لە هەرەتی لوتکەدا دەبێت، عومەر فەتاح لە سەردانێکی بۆ هۆڵەندا بە کەسەکانی دەوروبەری دەڵێت: ئەرێ کەسێک نییە، ئەو کەمالەم بۆ بطۆپێنێت؟!

کاودزەکان لەسەر کێشی (کاوبۆیەکان)، کە داویانە بە سەر ئەو نیشتیمانەدا و تاڵانیان کردووە، چۆن دەهێڵن کەسێک وەک خۆیان دز و پیاوخراپ و ناپاک نەبێت بگەڕێتەوە، یان ئەوانەی لەوێن دەبێت کزۆڵە و بێدەنگ دانیشن، ئەگەر کردیشیا رەخنەی رێگاپێدراو بگرن، لەملاشەوە دەرگای نیشتیمانیان خستۆتە سەر گازی پشت، تا هەرچی لاوی کورد و کەسی دڵسۆزە،،، نیشتیمانیان بۆ چۆڵ بکەن و جێی بهێڵن. ئەوان زینداندان پڕ کردووە لەوانەی بێدەنگ نیین و سەرکێشی لە فەرمانەکانیان دەکەن، لە گۆشەیەکدا گیریان پێخواردوون و دایاننیشاندوون. 

لە کۆتاییدا سەرچاوە و هۆکاری ئەم هەموو نەهامەتییانە باجی کوردبوونمانە، کە نرخەکەی لەسەرمان گران کەوتووە، کەم کەس توانای هەیە، بچێتە ژێر باری، ئەوانەی توانایان نییە قەرزی کوردبوونی خۆیان بدەن، روویان کردۆتە خیانەت و ناپاکی، ئەمڕۆ ئەو نیشتیمانە پڕە لە خائین و دزە قەرزکوێرەکانی نیشتیمان، دەستی ئەوانەش دەبڕنەوە، ئەگەر ئەستۆیان پاک و خاوێن بێت، تا کەس چاو لە خۆشەویستی نیشتیمان و گەلەکەی نەکات.

ئەی ئەوانەی کە نەمدین و ماڵئاواییتان کرد، ئەگەر رۆژێک نەمردم و توانیم بگەڕێمەوە، دێمە سەر گۆڕەکانتان لە بری چەپکێ گوڵ دوو فرمێسک بۆ سەرگۆڕی هەر یەکەتان دادەنێم. بە لای گردی ئەو خائینانەشدا تێدەپەڕم، وەک شەیتانەکانی نیشتیمان رەجمیان دەکەم.

رێز و سوپاس و پێزانین بۆ ئەوانەی سەرخۆشیان لێکردووم، لەوانەش کە لە دوورەوە هاوبەشی خەمیان کردم.