بۆچی هەرلایەك لە پارتی نزیك بێتەوە جەماوەرەكەی لەدەست دەدات؟
Tuesday, 25/08/2015, 20:23
3146 بینراوە
ئەو پرسیارەی دەبێت خودی پارتی پێش لایەنەكانی تر وەڵامی بداتەوە، ئەوەیە، ئایا بۆچی هەر كەس و لایەنێك لە پارتی دیموكراتی كوردستان كە خۆی بە پاڵەوانی كوردستان دەزانێت و بەو هەموو توانا و مێژووەوە بە هەر شێوەیەك بووە، نزیك بێتەوە، رێژەیەكی باش لە جەماوەرەكەی لەدەست دەدات ؟
ئەمە وا لە چاودێران دەكات لە زۆر لاوە شیكاری زانستیانەی بۆ بكەن و، راست و دروستی هۆكاری بڤەیی پارتی لە پەیوەندیەكانی لە گەڵ لایەنەكانی تر بدۆزنەوە . ئەمەش زیاتر وا دەردەكەویت كە بیەوێت، لە فەرزكردنی بەرژەوەندیە تەسكەكەی خۆی بەسەر لایەنی بەرامبەر و جێبەجێ كردنی ئەجێندا تایبەتیەكەی و ئامانجەكانی خۆی لە رێگەی ئەوانی ترەوە جێبەجێ بكات و،ئەو ئىنجامەش بۆ هەموو لایەك دەربخەن، كە هەمیشە هەوڵی بەردەوامی پارتی ئەوەیە، كە خۆی باڵا بێت و لە هەموو لایەك براگەورە بێت ، بۆیە لە دەرئەنجامدا بەو شێوەیە لە بەرژەوەندی بەرامبەرەكەی دەدات ، ئەمەش هۆكاری سەرەكی زەرەرمەندی هەر لایەنێكە كەلە پەیوەندی و نزیكبونەوەی لەگەڵ پارتیدا بەردەوام بێت و، نزمبونەوەی ئاستی جەماوەرێتیی لێدەكەوێتەوە و بەرژەوەندیە حزبی و سیاسیەكانی لەدەستدەدات .
مێژووی پارتی لە مامەڵە كردنی لەگەڵ پرسی كورد و كوردستاندا، وا خۆی دەنوێنێت، كە هەمیشە وا دەزانێت تا ئێستاش تاكە حزبە و واقعی كوردستان وەك شۆرشی ئەیلولە و سەرجەم لایەنەكانی تر لە منداڵدانی ئەو هاتونەتە دونیاوە و ئەو باوك و برا گەورەیە و ئەوانی تر لای ئەو ریزبەندیەكی بۆ كردون و، دەبێت ئەوانی تر وەك باوك وكور لە پارتی بروانن و داواكاریەكانی وەك فەرمانی عەسكەری جێبەجێ بكەن، سەرەرای ئەوەی ئێستا و دوور لە گزی و فرت وفێل و ساختەی هەڵبژاردن، بە ژمارەی دەنگدان پارتی نوێنەری كەمینەیە .
لە كوردستاندا، بارودۆخی سیاسی و رۆشنبیری و كۆمەڵایەتی خەڵكی كوردستان گۆڕاوە و هەمیشە گۆران و پێشكەوتن باڵی بەسەر كوردستاندا كیشاوە و، ئەمەش وا پێویست دەكات كە پارتی پێش لایەنەكانی تر، بە رێگەیەكی زانستیانە ئەم هەموو گۆرانكاریە گشتیانە بخوێنێتەوە و، لە مامەڵە و پەیوەندیەكانی لەگەڵ لایەنەكانی تردا لەبەرچاو بگرێت و، سەرجەم هەنگاوەكانی لەسەر ئەم گۆرانكاریە گشتیە تازانەدا بنیات بنێت . ئەمە لە لایەك، لەلایەكی ترەوە زۆر پێویستە لە خوێندنەوەی بارودۆخی كوردستان تەنانەت مامەڵە و سیاسەتی خۆی لەگەڵ خەڵكیشدا مەیسەر بكات، نەك هەمیشە هەموو لایەك بە تابع وخۆی بە مەتبوع تەماشا بكات و بزانێت .
لەو روانگەشەوە، دەبێت پارتی بە خۆی هۆكاری سڵكردنەوەی خەڵك و تەماشاكردنیان بۆ ئەم حزبە وەك لایەنێكی ساختەچی لە هەڵبژاردن و رەفتار نادیموگراسی و موحافكار و تەنها بنەماڵەیی و ناوچەگەری بدۆزێتەوە و، سكەی سیاسی خۆی راستەرێ بكات . بۆیە، لەم قۆناغە و لەمەش بەدواوە، سەرجەم حزبەكان لە نزیكبونەوەیان لەگەڵ پارتی زۆر سڵ دەكەنەوە و لەوبارەوە بە وریاییەوە هەنگاودەنێن، بۆ ئەوەی جەماورێتی خۆیان لەدەست نەدەن . ئەمەش سونەتی ژیانە كە دەبێت گۆرانكاری رووبدات و گونجاو لەگەڵ سەردەم و گۆرانكاریەكان جێگەی ناگونجاو دەگرێتەوە، هەرچەند كاتەكەی دوا بكەوێت .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست