قایمقامی مەڵبەندی سلێمانی و بۆمبەکەی هەڵەبجە

Tuesday, 17/04/2012, 12:00

1628 بینراوە

گیانلەدەستدانی (زانا حەمە ساڵح) قایمقامی مەڵبەندی سلێمانی بە هەر جۆرێک و بەهەر شێوەیەک بووبێت لە ڕووی ئینسانیەوە بۆ من جێگای نیگەرانیە، ئەوەی لەم دۆسییەدا کارەساتێکی گەورەتر لە مەرگی ئینسانێک پیشانی کۆمەڵگا دەدات، ئەو ئامادەگییەی خەڵکە کە ڕاستەوخۆ وەک پەرچەکردار بە شێوازی جۆراو جۆر، تەعبیر لەوە بکەن کە دەسەڵاتداران خۆیان ئەنجامدەر و داڕێژەری ئەم تاوانەن، ئەم تێگەشتنەی خەڵک ئەو حەقیقەتە دەدات بە دەستەوە کە ژیانی هەر ئینسانێک لە کوردستان یەکسانە بە پیلانێک بۆ فەناکردنی، هەر ئەم پیلانانە بۆخۆیان دەبنە کابوسێکی بەردەوام بۆ شەرعیەتدان بە مەرگی هەر ئینسانێک.
ئەوەی خەڵک ئەم تێڕوانینەی بۆ دەسەڵاتدارانی ئێستای کوردستان هەیە، بەرئەنجامی خەسڵەت و هەڵسوکەوتی (یەکێتی و پارتی)ە لە ساتەوەختی دامەزراندیانەوە تاکو ئەمڕۆ، مەرگی (جەوهەر نامیق، محێدین ڕەحیم، جەبار فەرمان، لەیلا عەلی، زانا حەمە ساڵح) هەموو ئەم مردنە جۆراو جۆرانە، پێش ئەوەی حیزب و دەزگاکانیان هیچ ڕونکردنەوەیەک لەسەر جۆری مردنەکەیان بڵاو بکاتەوە، خەڵکی کوردستان بە سەیر کردنی ڕابوردوی ئەم دوو حیزبە و کار و کردەوەکانیان، راستەوخۆ بڕیار دەدات کە دەسەڵاتداران خۆیان وەک تۆڕی جاڵجاڵۆکە لەم مردنە گومانی و ئاڵۆزانەوە ئاڵاون.
چ کارەساتیکە دەسەڵاتێک کە بڕیارە پارێزەری ژیان و گوزەران و ئاسایشی خەڵک بێت، بەڵام لای بەشێکی بەرچاو لە هاوڵاتیان دەزگاکانیان و بەرپرسەکانیان، کارەکتەر و پاڵەوانی تێکدان و کوشتن و دەیان سیناریۆی ئینسانکوژی و ژێر بە ژێر بن، ئەم دەسەڵاتە بۆ عیلاجی هەر تاوانێک دەرمانی لیژنەی لێکۆڵینەوەی بە دەستەوەیە، لە کاتێکدا لێژنەکان هەر هەموویان کارەکانی قۆناغی دووەمی تاوانەکان تەواو دەکەن نەک دۆزینەوەی تاوانبار، چونکە لە بناغەوە ئەو لیژنانە بۆ تاوانباران ناگەڕێن، بەڵکو هەموو هەوڵێکیان ئەوەیە کە قوربانیەکان بکەنە تاوانبار، یان ڕاستیەکان ئاوەژوو بکەنەوە، دۆسییەی (سەردەشت عوسمان) باشترین بەڵگەیە.
ئەوەی کەسوکاری قایمقامی مەڵبەندی سلێمانی داوای پشکنین و شیکاری تەندروستی تەرمی ناوبراو لە بەغداد دەکەن، ئەو ڕاستیە بەرجەستە دەکاتەوە کە هیچ باوەرێک بەو دەسەڵاتە نیە بۆ ئەوەی ئەم تاوانەش دیزە بە دەرخونە نەکات، ناردنی نوێنەر لەلایەن تاڵەبانی و پەلە کردن لە ناشتنی تەرمی (زانا حەمە ساڵح) هاوشێوەی تەقاندنەوەی ئەو بۆمبە کیمییاویە بوو کە ساڵی پار لە هەڵەبجە دۆزرایەیەوەو بە کفرەکونێک بۆ شاردنەوەی زۆر ڕاستی تەقێنرایەوە ، (بۆمبەکەی هەڵەبجە و زانا حەمە ساڵح) لەبەر نەبوونی سەرەتایترین مۆراڵێ ئینسانی و سیاسی و کۆمەڵایەتی لەلایەن دەسەڵاتدارانی کوردستانەوە هەمان چارەنوسیان هەبوو، تەقاندنەوە و مەرگ بۆ ئەم دەسەڵاتە دوو فریادڕەسی درێژ کردنەوەی تەمەنی بازرگانی کردنیانە.
دەبوایە دەسەڵاتدارانی کوردستان بەو پەڕی وریایی و ئاسایشەوە ژیانی (زانا حەمەساڵح)یان بپاراستایە، ئەگەر ئەم بەرپرسە ئیداریە گەندەڵی کردبوو ئەوا بەپێی پێوەرێکی یاسایی و ئینسانی سزای خۆی وەربگرتایە، ئەگەریش بێ تاوان دەرچوو ئازاد بکرایە.
دەکرا دوای دەیان وەعدە و بەڵێنەی سەوز و زەردی (سەرۆکی هەرێم، سەرۆکی حکومەت، سەرۆکی کۆمار، یەکێتی و پارتی) بۆ چاکسازی و وەستانەوە لە دژی گەندەڵی، ئەم دۆسیەیە وەک نمونەیەکی زیندو گرنگ بەدەستەوە بگیرایە، بەڵام مەرگی قایمقامی مەڵبەندی سلێمانی ئەو پەیامەمان پێ دەڵێت کە: دەسەڵاتدارانی کوردستان شەڕی گەندەڵێ بە کوشتنی ئینسان و پاراستنی سەری گەورەی گەندەڵکاران دەکەن، ئەم دەسەڵاتە ئامادەیە سیناریۆی گەورەترین شانۆگەری دابڕێژێت بۆ درێژەدان بە گەندەڵی و بەتاڵان بردنی سەرەوەت و سامانی کۆمەڵایەتی خەڵکی کوردستان، لەمبارەوە نە کورتیان هێناوە و نە دەستپارێزی دەکەن، تۆڕی ڕاوە ماسی ئەم دەسەڵاتە زۆر سەیرە، وەک شێرکۆ بێکەس دەڵێت: ماسی بچوک دەگرێت و ماسییە گەورەکان لێی دەردەچن.
ئەم دۆسییە پێمان دەڵێت ئەوەی نوزەی چاکسازی و ڕیفۆرم بێت لەم دەسەڵاتدا وجوی نیە، هەر هێز و لایەنێک خەڵکی کوردستان بەوە فریو بدات کە لەڕێگای چاکسازیەوە ئەم دەسەڵاتە دەبێتە دەسەڵاتێکی مەدەنی و خاوەن مۆراڵ، ئەوە هەوڵێکە بۆ هێشتنەوەی ئەم واقیعە تاڵە وەکو خۆی و شەریک بوونە لە تاوانەکان، ئەم دەسەڵاتە لە بری چاکسازی چاڵسازی دەکات، ئەم دەسەڵاتە دەبێت بڕوات و لەکۆڵ خەڵکی کوردستان بێتەوە.