ئایە رەجەب تەیب ئەردۆگان لەبەردەم بەهاری تورکی دایە ؟
Tuesday, 04/06/2013, 12:00
1753 بینراوە
ئەگەر بڵێسەی شۆرشی تونس بە زلەیەکی دەستی فادیە حەمدی هەڵگیرساو بو عەزیزیش بوە یەکەم جەستەی گرگرتووی ئەو ئاگرەی کە هەموو ووڵاتی گرتەوەو بوە یەکەم چەخماخەوبڵێسەو دەست پێکردن و هەڵگیرسانی شۆرشێکی سەرتاسەری لە ووڵات و ناوچەکە بە گشتی ،ئەوا لەوانەیە یەکەم برینی دارێکی باخچەیەك لە تەقسیمی شاری ئەستەمبوڵ ببێتە ئەو گرەی هەموو تورکیا بگرێتەوە . دوا بەدوای بریاری تێکدانی باخچەیەك و برینەوەی دارەکانی و کردنی بە مۆڵ و کۆمەڵگەی بازرگانی ، شەقامەکانی زۆر بەی زۆری شارەکانی تورکیا لە خەڵکی نارەزا جمەیان هات و پۆلیسیش بەو پەری توندو تیژی بەرپەرچی خۆپیشاندەرانی دانەوە و کاربەدەستان و کارگێران و حوکمرانان بە تایبەتی ئەردۆگان ،وەك پیشەی هەموو حوکمرانانی ناوچەکە ،بە خۆپیشاندەرانیان بە، گێرەشێوێن و ئاژاوەگێر وبەکرێگیراوو هتد ،،، ناوزەند کرد . لەوانەیە تا ئێرە لە چیرۆکێكی زۆر ئاسایی بچێ لەو چیرۆکانەیکە لە زۆربەی زۆری ووڵاتانی ناوچەی رۆژهەڵاتی ناوێن و مەیل تاکرەوەکاندا هەیە .لەگەڵ ئەوەی ،لە پشتی دەنگی نارەزا و تورە لە سیستمی حوکمرانی ووڵاتدا ، لایەنێکی ئاراستە کراوو هەیە و هەوڵی قۆستنەوەی ئەو هەلەیە کە لە میانەی هەڵەیەکەوە هاتۆتەئاراوە ، بەڵام ئەم کۆ دەنگی یە ئەوە ناگەیەنێ کە شەقام بە زۆرینەی رەهاوە بێزاری خۆی لەوە زیاتر خەفە بکات و بشارێتەوە، کە بەرامبەر بە پارتی داد و گەشەپێدان و بە تایبەتی بە رامبەر ئەردۆگان هەیانە . ئەردۆگان ئەگەر نەکەوێتە خۆی و سینارێویەکی گونجاو دورست نەکات ، ئەستێرەی بەختی هەر بە گەشاوەیی نامێنێتەوەو هەر زوو وەك دەیان ئیسلامیستی پێشووی خۆی قوت دەدرێ . رەنگە لە پاڵ ئەو کێشە زۆرانەی کە پارتەکەی ئەردۆگان دورستی کردوە بۆ نەتەوەی تورك ، مەسەلەی ئاشتیوانی لە گەڵ کورد ، گرنگ ترین مەسەلە بێت کە توركەکان وەك کەسانێکی نەژاد پەرست لە بەرامبەر ئەردگان راست بکاتەوە و بیزاری خۆیان بەرویدا پیشان بدەن . ئەم نارازایەتییە ئەو گریمانەیە ئەسەلمێنێ ، کە رەنگە بۆ عەرەب و فارسیش هەر گونجاو بێ ئەویش ، هیچ کات تورك ئەرکی ئاینی و پەیوەست بونی پێوەیی ناخاتە پێش بەرەگەز بوونی و نەتەوە پەرستیی خۆیەوە ،،،، نەك هەر ئەرکی ئاینی بەڵکو سەرچەم بەهاکانی تری مرۆیی و پایەکانی ئازادیش . هەر بۆ نمونە لە ساڵی ٢٠٠٨ وە بە پێی چەند یاسایەك چەندین سایت و مەڵپەری ئەنتەرنێتی لە تورکیا قەدەغەی لەسەرەو لە ژێر چاودێری توندی دەوڵەتدایە چونکە ، لە یوتۆبدا بە حسابی خۆیان سوکایەتیان بە ئەتاتورك کردبوو ؟ ئەم بەر بەستانە لە سەر ئازدی تاکە کەس و بیر و بۆچوون ، بووە مایەی ئەوەی بەندیخانەکانی تورکیا بە دەیان هەزار کەس پربکرێتەوەو، کەسانی بیر و بۆچوون جیاواز و ئازادی خواز و نارەزا ،بەرامبەر توندوتیژی پۆلیس و جەندرمەودەیان جۆری پۆلیسی نهێنی ببنەوە .ئەوەی سەیرە لەم هاوکێشەیەدا ،ئەوەیە ، میلەتی تورك جودا لە میلەتانی تر لە سەر رووی زەوی زیاتر متمانەیان بە سەرکردەو رابەرو سوڵتانەکانیانە ، بەڵام ئەم جارە جودا لە هەر جارێکی دی ،،بە شێوەیەك لە شێوەکان هاوکێشەکان هەڵگەراونەتەوە ...لەگەڵ ئەوەی کە کلیچدار ئۆغڵو ، سەرۆکی پارتی گەل بە پێێ ئەوبەڵگانەی ئەردۆگان بە قولی تێوەگلاوە لە کردەوە تیرۆریستیەکەی ریحانی و ئەردۆگان زۆر بەتوندی بەرەو روویان بووەوە تانەی لێدان ،گوایە کە ئەوانە ناحەزی ئاشتین و ئەیانەوێ هەلی ئاشتیوانی نێوان کورد و تورك لە بار بەرن ، بەڵام پارتی گەل و لایەنگرانی و رەگز پەرستەکانیش لەگەڵ یەکەم هەلی گونجاودا کاتێ مەسەلەی تێکدانی باخچەکە هاتە کایەوە ،دەستەوەستان نەوەستان و کۆشەشیان دا بۆ ئەوەی هەموو دەنگۆکان لەسەر خۆیان لابەن و ئاراستەی سەرۆك وەزیران و پارتەکەی بکەن . ئەم سیناریۆیە هەرچەند ئاراستەکراوەو ئەشکراشە کە کێ لە پشتێوەیە ، بەڵام ئەگەرێکی گەورەشە بۆ گۆرینی سیستمی حوکمرانی لە تەواوی تورکیا و وەدەرپەراندنی ئیسلامی سیاسی لە پنچینەوە ،، بە گۆرینی ئەو جۆرە حوکمرانییەش ، زۆر هاوکێشەو لە رۆژهەڵاتی ناوێن دەگۆرێ وزۆر پارت و لایەن لە کوردستانیش بێ سەرپرشتیار دەمێننەوە .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
