جه‌ژن، شه‌هید، یه‌كێتی نه‌ته‌وه‌یی و خاكیبوون
Monday, 05/09/2011, 12:00
1456 بینراوە
30\8 یه‌كه‌م ڕۆژی مه‌راسیمی جه‌ژنی ڕه‌مه‌زانی پیرۆز له‌سه‌رانسه‌ری كوردستان به‌ڕێوه‌چوو، ئه‌مساڵ جیاواز له ساڵه‌كانی تر خه‌ڵكی گه‌رموگوڕتر به‌شدارییان له مه‌راسیمی جه‌ژن و نوێژه‌كاندا كردو مزگه‌وته‌كانی هه‌ولێر و سلێمانی دهۆك و شاره‌كانی تری كوردستان قه‌ره‌باڵغیه‌كی زۆریان به‌خۆوه بینی و مامۆستایانی ئاینیش زیاتر باسیان له فه‌لسه‌فه‌ی جه‌ژن له ئیسلامدا كرد كه زیاتر خۆی له به‌هێزكردنی ڕایه‌ڵه‌كانی په‌یوه‌ندی كۆمه‌ڵایه‌تی و نه‌توه‌یی ده‌بینێته‌وه، هه‌روه‌ها مامۆستایان داوایان كرد كه یه‌كێتی نه‌ته‌وه‌یی به‌هێز بكرێت و زیاتر په‌ره به ئاشتی بدرێت..
جه‌ژنی ئه‌مساڵ هاوكاته له‌گه‌ڵ تێپه‌ڕبوونی ماوه‌یه‌ك به‌سه‌ر خۆپێشاندانه‌كانی كوردستان كه تێیدا خه‌ڵكی بۆ ده‌ربڕینی ناڕه‌زایی پرۆتستۆكردنی نادادگه‌ری ڕژانه سه‌ر شه‌قام و چه‌ندین كه‌سیش شه‌هید و بریندار بوو، سه‌ره‌ڕای ئه‌وه گه‌له‌گۆمه‌یه‌كی نێوده‌ولی و پلانێك له‌دژی كوردان به تایبه‌تی له باكور به‌ڕیوه‌چوو به‌و هۆیه‌شه‌وه ناوچه سنورریه‌كان و بناری قه‌ندیل به خه‌ستی بۆمباران كران.
ئه‌وه‌ی له‌و جه‌ژنه‌دا گرنگه ئه‌وه‌یه كه هه‌موو پارته‌كانی كوردستان به ده‌سه‌ڵات و ئۆپۆزیسیۆنه‌وه پێویسته له‌مه‌ودوا زیاتر بیر له به‌رژه‌وه‌ندی گشتی و پیكه‌وه ژیان و به‌هێزكردنی یه‌كێتی نه‌ته‌وه‌یی بكه‌نه‌وه.
پێویسته ده‌سه‌ڵاتداران چیتر بیر له به‌رژه‌وه‌ندیه‌كانی خۆیان نه‌كه‌نه‌وه‌و به‌رژه‌وه‌ندی گشتی میللی و نه‌ته‌وه‌یی و خاكی نه‌كه قوربانی مه‌رام و به‌رژه‌وه‌ندی خۆیان.
زیاتر له‌وانه پێویسته بیر له‌دروستكردنی په‌رله‌مانێكی گه‌وره‌ی پێكهاتوو له هه‌ر چوار پارچه‌ی كوردستان بكرێته‌وه‌و كار بۆ به‌هێزكردنی كه‌لتور و بابه‌ته نه‌ته‌وه‌یه‌كان بكرێت و هه‌وڵ بدرێت ڕوحی ئینتیمای خاكی بگه‌ڕێنرێته‌وه.
ئه‌وه‌ی له‌سه‌ر ده‌سه‌ڵات و ئۆپۆزیسیۆن گرنگه پێویسته به‌رنامه و ئه‌دای كاریان بخه‌نه گه‌ڕ و بێكاری و قه‌یرانی لاوان چاره‌سه‌ر بكه‌ن، پێویسته بواره پیشه‌یه‌كان و كه‌رتی كشتوكاڵ و پیشه‌سازی زیاتر پێشبخرێت و ده‌رفه‌تی كار فراوانتر بكرێت، وه پێویسته روانگه‌و لایه‌نه‌كان و بیئه‌ی كوردستانیش له ڕووی زانستیه‌وه به‌ره‌و پێشه‌وه بچێت زیاتر خوێندن به كرداری بكرێت.
[email protected]
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
