پانزەى تەباخ و گوڵە هەناسەكانى گەلاوێژ
Sunday, 08/08/2010, 12:00
1535 بینراوە
سەردار قادر
ئەی ئەو وەرزەی كە ساتەكانت گڕى لە خۆ بەرداوە
چاوەڕوانی كام ڕێژنە بارانی
زەوی عەشقت بنوسێتەوە بە دەڤەرێك لە
گوڵە نێرگز
بەرلەوەی سكڵى سووری خۆر
لە ژێر سێبەری ساراتا تاوێرەكان پڕ كا لە نور
ڕۆژێك وەك ساتەكانی نەورۆز لە هەناوتا داگیرسێنە
چونكە تۆ لەو ئەوینە دەچی
كە لە ڕەنگی ئاسۆدا سەرت دەرهێناوە
تۆ بە ساوایش
كانیلە چۆڕ چۆڕ ئاوی سازگاری پێ نۆش كردی
داربەڕووەكان نەیانهێشت تەنیا بی
ئەوە تۆو لوتكەی سەركەش بوون
ئاسمانی پڕ لە ئەستێرەتان لە بێدەنگی شەودا لە ئامێز گرت
كلوی بەفرو بارانی بەخوڕ
سروەو شەماڵ
پڕن لە بۆنی تۆ
ئەمێستا ئەم دەڤەرە
بیرەوەریەكانت پڕ بە مانای ژیان دەنووسێتەوە
تۆ چیت ئەی شا وەرز
ئەم زەوی یە سەراپا وابۆت هەژاوە
لەمەودای ئەم عەشقە گەرمەدا
دارو دەوەن، جۆگەلەو ڕووبار، كەفرو تاوێر
سروەو شنەی با، مانگە شەوو خوڕەی تاڤگە
باست دەكا باست دەكا باس
ئەی گوڵە هەناسەكانی گەلاوێژو
هەناوی خۆرێكی كڵًپە كردو
قەندیل پڕكە لە كیژى هەور ڕەنگو
ئاسمان لە هێشووە ئەستێرەی پرشنگدار
لاوانی ماردینو ئامەد لە گیانی ئیرادەو بڕوا
تۆ لە شەپۆلە سپیەكانی دەریای وان سەركێشتریت
مەراقی ڕەش لە سنوورتا ڕادەماڵى
دە هەستە سەرپێ دە هەستە سەرپێ
كڵپەی وڵاتی كڵپە
دیسانەوە هەڤاڵ عەگید بۆ ئامێزی چیا خۆی سازداوە
ئەوەتا سەردەستەی كاروانێكە
ئەوین لە ڕۆحیانا وەك خۆرێك هەڵدێ
بڕیار وایە بۆ دیداری شەمزینان
هەر ئەمشەو لەم مەڵبەندەوە دەستە دەستە بكەونە ڕێ
چ قەڵەم بازێكە لەم وەرزەدا سرووشت هەتاوی گرتووە
هێندەی نەماوە دڵى زەوی بە بوركانێك ڕاچەنێ
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
