[ كارەساتى جێمسییە سوورەكەى یەكێتى و كڵاو سەوزەكان لەهەڵەبجە ]

Friday, 29/05/2009, 12:00

3692 بینراوە

لەپاڵ هەموو شارێكدا گۆڕستانێكى پڕ كوژراوتان خولقاند
لەگەڵ هەموو پێكەنینێكى سەرمێزى شەرابتاندا مرۆڤێكتان تاساند
لەپاڵ هەموو باڵەخانەى جەلادێكتاندا هەژارێكتان زیندەبەچاڵ كرد
كەناڵى كوردساتى زمانحاڵى (ى.ن.ك) وەك هەموو كەناڵە حیزبییەكانى تر لەپاڵ پیشاندانى هەموو دیمەنێكى جواندا، شمشاڵیكى نەرمدا ، وێنەیەكى ئاوەدانیدا، گۆرانییەكى بێتام یان تامداردا ، لەپاڵ هەموو گرێبەستێكى كۆمپانیاكانى دنیادا كەلەپێناوى بەرژەوەندى سەرانى دەسەڵاتى حیزبدا ئەنجام دەدرێت . لەپاڵ لێدوان و بریارە بێ ئەنجامەكانى سەرانى حیزبدا دەیان وێنە و ڕووداوى ڕاستى وڵات دەشارێنەوە . دەبووایە كەناڵی ئاسمانى كوردسات ڕووداوەكانى كوردستانى پیشانى هاوڵاتیان بدایە ، بۆنموونە وێنەى وێرانكراوى ساڵى 1991 ى هەڵەبجە باس دەكەین كە چۆن لەپێناوى بەرژەوەندى حیزبدا بڵاوى دەكاتەوە هەمان كات وێنەى هەڵەبجەى 2009 بەئاوەدانكراوەیی بڵاودەكاتەوە لێرەدا دەبووایە ماوەى نێوان 1991 و 2009 ى بڵاوبكردایەتەوە كەلێوان لێوە لەشەڕى ماڵە و ماڵى ناوخۆی كورد بۆ ئەوەى نەوەى 1990 بەدواوە ڕاستییەكانى ناوخۆی كوردستان بزانێت كە تائێستا بۆنى خوێنى رژاوى گەنجەكانى وڵات و كوچە و كۆڵانەكان و پێدەشت و شاخەكانى كوردستان بەرنادات ، دیسان بۆ نموونە ئەكرا كەناڵی كوردسات قەتڵ و عامى ڕۆژى 5/5 /1994 ى پیشانى هاوڵاتیان بدایە كە جیمسى یە سورەكەى یەكێتى و كڵاوسەوزەكان چ دۆزەخێكیان بۆ گەنجانى هەڵەبجە خولقاند ،دۆڵى بێ مەحكەمەیان بۆ گولەبارانكردنى كەنجانی بى دیفاع لە دەشتی شارەزور دامەزراند جیمسیە سورەكەى یەكیەتى و كڵاوسەوزەكان لەشكرى مەرگ هینەرو تابوتێك بون گەنجەكانى شاریان بەزیندویى دەبردو خەڵكی بەكوژراوى دەیانهێنانەوە ئەم جەریمەیە كەلەپێدەشتە چۆلەكاندا ئەنجام درا كۆتایى نەهات بەڵكو بەشێوازى نوێ ترولەپێشچاوى كامێراكانى دونیادالە 16/ 3/ 2006 دا دووبارەكرایەوە و خوێنى (كاكە كوردە) ڕژایە سەر شەقامەكان . جارێكى تر نەشتەر بوو خرایە سەر گەردنى شارو گەنجیان تێدا دەكردە قوربانى ، ئەو گۆڕانەى لە 1994وە بۆ 2009 ڕوویدابێت لەلەشكرى جەلادەكاندا جێمسییە سوورەكە گۆڕابوو بەڕیزێك پاترۆڵى بێ ڕەقەم ، ئەم دەسەڵاتە كارێك كە لەسەرى بڕوات لەبیربردنەوەى شەڕی ناوخۆیە ، كە ئەم وڵاتەى كردە خۆڵە مێش و ئێستاش دەیدەن بەدەم باوە . ئەمە نموونەیەكى بچوكە لەخەرمانى سوتێنراوى ئەم وڵاتە ، بۆیە بە گەنجان دەڵێم دەنگدان بەم دەسەڵاتە دەنگدانە بەكوشتارى دەستە جەمعى لەپێشچاوى دایك و باوكیاندا ، دەنگدانە بەهێنانە دەرەوەى گەنجەكان لەماڵ و كوشتنیان بەشێوازى نوێتر ...