کوردستان دۆزه‌خێك بۆ ئازادی خوازان . به‌هه‌شتێك بۆ فس فس پاڵه‌وانه‌کان
Monday, 16/11/2009, 12:00
1564 بینراوە
پێشکه‌شه به گیانی پاکی (ئیحسانی فه‌تاحیان)
ئه‌م کوردستانه‌ی من خاوه‌نی هه‌زاران شۆڕه‌سواری به ئاوات نه‌گه‌یشتوه. ئه‌م کوردستانه‌ی من باخێكه بۆ هه‌ڵوه‌رینی هه‌زاران گوڵ به خونچه‌یی. شنه‌بای ئه‌م کوردستانه‌ی من هه‌ناسه‌ی هه‌ڵپڕوزکاوی هه‌زاران دایکو خوشکی ڕه‌شپۆش و جگه‌ر سوتاوه . په‌ڵه هه و‌ری ئاسمانی نیشتمانی من پێکاهاته‌یه‌که له هه‌ناسه‌ی ساردی باوکان و دڵۆپ دڵۆپی بارانیشی ئه‌شکی چاوی جگه‌ر گۆشه‌و دایکو خوشکی شه‌هیده. جوامێرانی نیشتمانی من له پێناوی گه‌یشتن به ئازادی و سه‌رفرازیدا ئاشقی په‌تی سێداره ئه‌بن و بۆ گه‌یشتن به جێژوانی ئازادی چاو بڕکێ له‌گه‌ڵ مه‌رگدا ئه‌که‌ن . هه‌ر کات له شاخ و دۆڵ و ئه‌شکه‌وت و دارو ده‌وه‌ن و بن هه‌ر گاشه به‌ردێكی ئه‌م کوردستانه‌ی من بپرسی به‌هه‌زاران چیرۆکی مه‌ردایه‌تی و شۆڕه سوارانی کوردایه‌تیت وه‌ك شه‌هید مامه ڕیشه‌و ئارام و جه‌مال عه‌لی باپیرو هاوڕێ جه‌بار و شێرکۆ و جه‌زای عه‌لی کاتب و ئیحسانی فه‌تاحیان و هه‌زاران هه‌زار پۆ‌له شه‌هیدی ڕێبازی مه‌ردایه‌تیت بۆ ئه‌گێڕێته‌وه. ئه‌م نیشتمانه‌ی من لاشه‌ی به تیغی شومی دوژمنان و کاسه لێسو خۆفرۆشان ونجڕ ونجر بوه. له‌ڕۆژهه‌ڵاتی نیشتمانی مندا ئاخوندی شوم و شه‌مشه‌مه کوێره‌کانی ڕوناکی له ژێرپه‌رده‌ی ئایندا به بڕو بیانوی بێ به‌ها. کوێرانه که‌وتونه‌ته وێزه‌ی ڕۆڵه‌کانی نیشتمانم ئه‌و ئاخوندانه ئه‌وه‌نده شومن عیزرائیلش ناچار ده‌که‌ن هه‌ر ڕۆژ ناڕۆژێ دابه‌زێت و ڕۆح له جه‌سته‌ی پۆلێك په‌پوله‌ی هه‌ڵوه‌داو مه‌ستی ئازادی به‌بێ بێگوناه بکێشێ.. ئه‌مانه چ ئه‌هیرمه‌نێکن..؟ شه‌وێك نیه ئه‌م ده‌جاڵو ئه‌هریمه‌نانه‌ی دوژمنی ئازادی ومافی مرۆڤ ده‌ستیان بۆ ئاسمانی کوردستانم درێژ نه‌که‌ن و پۆلێك ئه‌ستێره‌ی لێ نه‌کوژێننه‌وه تا تاریکو تاریکتر بێ و شه‌مشه‌مه کوێره ئاسا ته‌راتێنی تیا بکه‌ن. که‌چی هه‌ر له باشوری ئه‌م نیشتمانه‌ی مندا له‌سه‌ر خوێنی ئه‌و ڕۆڵه قاره‌مانانه ده‌یان فس فس پاڵه‌وانی نا به‌رپرس و گرگن په‌ڕژه‌وه‌ند په‌رست تیایدا لافی کوردایه‌تی و لێده‌ده‌ن و خۆیان به سوارچاکی نه‌به‌ردی و کوردایه‌تی ئه‌ده‌نه قه‌ڵه‌م و که‌چی له ئاست ئه‌و هه‌مو تاوانه نامرۆڤانه‌ی ڕۆژانه ده‌ره‌هه‌ق به لاوانی کوردستانه‌که‌م ئه‌کرێ نه‌عامه ئاسا سه‌ریان کردوه به ژێر گڵه‌وه زمانیان لاڵ بوه‌و ته‌نها ناڕه‌زایه‌تیه‌کیش ده‌رنابڕن سه‌رگه‌رمی نه‌وت و هه‌ڵچنینی دۆلارن . ئه‌وه چ فس فس پاڵه‌وانێکه به خۆی ئه‌ڵێ سه‌رۆکی هه‌رێمی کوردستانم ..؟ . ئه‌ی کوا بۆ بێده‌نگه و سه‌ری شۆڕی له‌ناو گه‌ڵیدا حه‌شار داوه. نه‌حله‌ت له‌وه‌ش مه‌سعود به‌سه‌رۆکی کوردستان ناو ئه‌باو به پێشمه‌رگه‌و قاره‌مانی هه‌مو سه‌رده‌مێك ئه‌یشوبهێنێ. سه‌رۆك ئه‌بێت هه‌میشه له‌ناو هزرو بیرو ئه‌ندێشه‌و خه‌م و ئازارو فرمێسکه‌کانی تاکی وڵاته‌که‌ی بێت. نه‌ك له‌سه‌ر خوێنی هه‌زاران هه‌زار شه‌هیدی ئه‌م نیشتمانه سه‌رگه‌رمی کۆکردنه‌وه‌ی سه‌روه‌تو سامان و هه‌ڵ لوشینی ژێرخانی وڵاته‌که‌ی بێت. سه‌رۆکی هه‌رێمێك که به درێژای 18 ساڵ نه‌توانێ تۆپباران و هێرشی ئاگرو ئاسن و په‌تو سێداره بۆ سه‌ر لاشه‌ی ئه‌م نیشتمانه‌و ڕۆله‌کانی ڕابگرێ بێگومان خۆفرۆشه‌و دارده‌ستی دوژمنانه و ئابڕو تکاوو سه‌رشۆڕه. دیاریشه سه‌رۆکی هه‌ر وڵاتێك ته‌نها له خه‌می چنینه‌وه‌ی سه‌روه‌تو سامان و پۆست و دۆلاردا بێت هه‌رگیز ناتوانێ سه‌ری به به‌رزی ڕابگرێت. هه‌میشه سه‌ر شۆڕه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
