مژده، مژده، بکوژانی شه‌هید سه‌رده‌شت ئاشکرا ده‌بن ،،، به‌ڵام چۆن ؟؟؟؟
Tuesday, 18/05/2010, 12:00
1319 بینراوە
دوای ئه‌وه‌ی ئاسایشی گشتی (هه‌ولێر) به هاوکاری و به‌هۆی زانیاری ووردی ده‌زگای پاراستنی هه‌رێم توانی سه‌ره‌داوی چۆنیه‌تی شه‌هیدکردنی سه‌رده‌شت عوسمان به‌ده‌ست بێنێت ، ئه‌مڕۆ .../.../..... هێزێکی چاوکراوه‌ی ده‌زگای پاراستن و ئاسایش ، به‌مه‌به‌ستی ده‌ستگیرکردنیان هه‌ڵیان کوتایه سه‌ر ئه‌و ماڵه‌ی ئه‌و تاقمه خۆیان تێدا حه‌شار دابوو ، به‌ڵام به‌هۆی ئه‌وه‌ی که ئاماده نه‌بوون خۆیان به‌ده‌سته‌وه بده‌ن و که‌وتنه ته‌قه کردن له قاره‌مانه‌کانی ده‌زگای پاراستن و ئاسایش و ئه‌وانیش دوای ئه‌وه‌ی له خۆ ته‌سلیم کردنی ئه‌و یاخی بووانه بێ هیوا بوون ، ناچار ته‌قه‌یان لێ کردن و دوای ڕووبه‌ڕوو بوونه‌وه‌یه‌کی نیو سه‌عاتی سه‌رجه‌م ئه‌و تاوانبارانه که ژماره‌یان 4 که‌س بوو
کوژران و جگه له لاشه‌کانیان به‌ڵگه‌ی زۆریش که‌وته ده‌ست هێزه‌کانمان ، که هه‌مووی
سه‌لمێنه‌ری ئه‌وه‌ن که ئه‌وانه بکوژی کاکه سه‌رده‌شت بوون....
خوێنه‌ری به‌ڕێز ئه‌مه‌ی سه‌ره‌وه له ئێستادا هه‌واڵێکی ڕاست نیه به‌ڵام ئه‌گه‌رێکی زۆری
ئه‌وه هه‌یه ، ئه‌گه‌ر له ژێر فشاری زۆری خه‌ڵکی به‌شه‌ره‌فی کوردستان دا ده‌سه‌ڵات له هه‌ولێر ناچار بێت ئه‌و پیاوکوژانه‌ی خۆی ئاشکرا بکات ، یاخود له ترسی ئاشکرابوونی
ئه‌و پیاوکوژانه به‌هه‌ر هۆیه‌کی تره‌وه ، ئه‌وا به‌دڵنیاییه‌وه ، پێش ئه‌وه‌ی ده‌سگیر بکرێن و ببنه هۆی ئاشکرا کردنی داڕێژه‌رانی ئه‌و پیلانه گڵاوه‌ی پاراستن و له‌سه‌روو هه‌موویانه‌وه مه‌سروری كوڕی دیکتاتۆره‌که‌ی سه‌ری ڕه‌ش ، ئه‌وا هه‌مان ده‌زگای سیخوڕی پاراستن ، پیاوکوژه‌کانی خۆی له سیناریۆیه‌کی ئاوادا ده‌کوژێت ، به مه‌به‌ستی ئه‌وه‌ی هه‌م بۆ هه‌تا هه‌تایه تاونبارانی ڕاسته‌قینه وون بکرێن و هه‌م له لایه‌کی تره‌وه
بیکه‌ن به منه‌ت به‌سه‌ر که‌س و کاری شه‌هید سه‌رده‌شت و هه‌موو خه‌ڵکی کوردستانه‌وه و
خۆشیان به ووریا و قاره‌مان بده‌نه قه‌ڵه‌م ،،.
پێویسته خه‌ڵکی کوردستان زۆر چاوکراوه بگه‌ڕێن به دوای ئه‌و تاوانبارانه‌دا ، به‌ڵام پێویستیشه گیانیان بپارێزرێت ، بۆ ئه‌وه‌ی ببنه شاهیدی ڕاسته‌قینه له‌سه‌ر به‌شێکی که‌م له تاوانه‌کانی بنه‌ماڵه‌ی ئاشبه‌تاڵ به‌رامبه‌ر خه‌ڵکی کوردستان ،پاشانیش له دادگایه‌کی
دادپه‌روه‌رانه‌دا خۆشیان سزای یاسایی تاوانه‌که‌یان وه‌رگرن
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
