بەرەو كاروان

دەبو لقێك لە درەختى سەوزى بنارى قەندیل بام
نەك وێڵى ئەشقێكى ئەفسانەیى لە خەیاڵى بێ هودەمدا
دەبوو قەڵغانێ بم لە ئاست رمى دوژمنانمدا
سەنگەرێ بم لە ئیرادەو گیان بازێ بم لە گۆڕەپانی خەباتدا
لە شاكارى شۆڕشمدا دەبوو شۆرەسواری داستانێك بم
ئاوزەنگ بدەم تا بە ئاواتی ئەم گەلەم دەگەم
نوسینەوەو داگیرسانی زاپێكی تر بم لە توڕەبونی بەفردا
نەك خولیایى ساكارە خەونێك لە سەرابی تەمتوماندا
دەبو منیش لەگەڵ گەریلادا هاوسۆزو هاوڕێ بم
تا چنگ لە خۆرى ئازادى گیركەم
دەبو هەرچى خۆشبەختییە بەلای وەنێم
خاكی بریندارو زەوی ئازارستانم هەتوان كەم
لە مەودای بینینا سنور سەراپا پڕ لە مەعشوقە
تۆ تەماشا كۆڕى خەبات چەندە گەرمە
خۆرەتاو كڕنوشیان بۆ دەبات
منیش بە چەپكێ گوڵەوە عەشقی كوردانەم باران ئاسا دا دەكات
بە دڵو گیان ئارەزومە بۆ لاى ئەوان بكەومە ڕێ
پڕ بە دڵ بۆن و بەرامەى گەردنى كەڤرو چیا بە ڕۆحی خۆمدا كەم
گەلێ ئاواتە خوازم لەگەڵ ئەواندا هەور ماچ كەم
بە رۆحى كوردانەوە دەست لە مل گەریلا كەم
واهاتم من لە ئێستاوە پەناگاى عەشقم هەر ئێوەن
تا لە ڕێى نیشتماندا بمرم
داری ئازادی بە خوێنم ئاو دەم
مێژوویەك جێهێڵم پڕاو پڕتر لە سەروەری
پیرۆزترین شەهیدبوون لەو ڕێگایەدا تۆمار بكەم
من لە مەڵبەندى چیادا چەند خۆشە بۆنى ئێوەم لێ بێ
ئەی نیشتمان
تەنیا گیانی خۆم شك دەبەم
گەر دەتەوێ لە پێناوی تۆدا دەیدەم
ناگەڕێمەوە تا گوڵى سەركەوتن بۆن نەكەم
ئەمە ئەوینى خوێنمە
ئەمە كەیلى باوەڕمە
دەسا كوڕگەل لەگەڵ مندا كاروان، كاروان بكەونە رێ
ئەم شۆڕشە بازووى پۆڵاینى وەك ئێوەشى حەتمەن دەوێ