وێنه‌ی مه‌لا مسته‌فا له په‌رله‌مان تۆڕده‌ن .
Saturday, 26/06/2010, 12:00
1656 بینراوە
ڕۆژی هه‌ینی 25/6 په‌یکه‌ری گه‌وره دیکتاتۆری ڕوسیا،جۆزێف ستالین(1879-1953) به‌بڕیاری ده‌سه‌ڵاتدارانی ئێستای وڵاتی جۆرجیا لابرا. وه له‌جیاتی ئه‌م په‌یکه‌ره بڕیار درا په‌یکه‌رێك بۆ قوربانیانی جه‌نگی ساڵی 2008 دژ به‌ڕوسیا هه‌ڵبواسرێ. وه‌ك ئاشکرایه دیکتاتۆره‌کان به‌زۆر وێنه‌و په‌یکه‌ری خۆیان له‌شوێنه گشتیه‌کان و تایبه‌تیه‌کاندا هه‌ڵئه‌واسن، سه‌دام یه‌کێ بوو له‌و دیکتاتۆرانه‌ی که ئه‌بوو وێنه‌که‌ی له‌هه‌موو ماڵێکدا هه‌لبواسرێ، وه له‌زۆربه‌ی کاتدا وێنه‌و په‌یکه‌ری دیکتاتۆر له‌زۆر شتی تر گرنگ تر بوه‌و پاره‌و پولی میله‌تی له‌سه‌ر دانراوه. لابردنی په‌یکه‌ری ستالین له‌ناوه‌ڕاستی شاری (گۆری) ئه‌گه‌ر چی ستالین وه‌ك پاڵه‌وانی جه‌نگی جهیانی دووه‌م لای ڕوسیه‌کان ناسرابو،به‌وه‌ی توانی نازیه‌کان له‌وڵاته‌که‌ی ڕاوبنێ و دواتر کۆتایی به‌ژیانی دیکتاتۆرێکی وه‌ك (هتله‌ر)یش بێنێ و توانی له‌و کاته‌ی ده‌سه‌ڵاتی گرته ده‌ست له‌ساڵی 1924 وه وڵاتی به‌ره‌و لوتکه‌ی پیشه‌سازی بردو خستیه ئاستێکی به‌رزه‌وه، لێ کوشتنی زیاتر له 12 ملێۆن کرێکاری ڕووسی و له‌سه‌ر هه‌موشیانه‌وه گه‌وره‌ترین نه‌یاری(تروتسکی)، ئه‌م دیکتاتۆره‌ی له‌وه ڕزگار نه‌کرد له ئێستا وا له‌گه‌لی جۆرجیا بکه‌ن بیر له‌توڕدانی په‌یکه‌ره‌ی بکه‌ن .
مه‌لا مسته‌فا جگه له‌وه‌ی که به‌چاره‌کی دیکتاتۆرێکی وه‌ك ستالینی نه‌کردوه بۆ میله‌ته‌که‌ی که‌چی ئێستا له‌زۆربه‌ی شوێنه‌کاندا وێنه‌ی گه‌وره‌ی ئه‌بینرێ و له‌سه‌ر بودجه‌ی خه‌ڵکی کوردوستان مانگانه ڕه‌شکه‌یه‌ك دۆلاری شه‌هیدانه‌ی بۆ بڕدراوه‌ته‌وه. کێ هه‌یه بتوانێ نکۆڵی له‌وه بکا، که‌مه‌لا مسته‌فا جگه له‌نه‌هامه‌تی و براکوژی و ئاشبه‌تاڵ چی دی بۆ میله‌تی کورد نه‌کردوه!! که‌چی ماستاوچیان و زوڕناژه‌نانی بنه‌ماڵه فه‌رهه‌نگی شووره‌یی و دۆڕاندنیان ئاوه‌ژوو کردۆته‌وه‌و لێیان کردوین به باوکی ڕوحی کوردو له‌لوبنان و چه‌ندین شوێنی تر په‌یکه‌ری بۆ دروست کراوه‌و مانگانه پاره‌ی ئه‌م میله‌ته ئه‌کرێ به‌قوڕکی قووڵی ئه‌م بنه‌مه‌ڵه‌یه.
په‌رله‌مانتارانی به‌ره‌ی ئۆپۆزیسێۆن له‌پێش هه‌مویانه‌وه لیستی گۆڕان پێوسته کۆتایی به‌و مه‌هزه‌له‌یه بێنن له‌نێو په‌رله‌مانداو به‌وه‌ی که وێنه‌یه‌کی گه‌وره‌ی مه‌لا مسته‌فایان له‌پشت خۆیانه‌وه داناوه. ئه‌بێ ڕه‌وایه‌تی بۆ په‌رله‌مان و ده‌نگی خه‌ڵکی کوردوستان بهێننه‌وه، کێ ڕێگای پێداون ئه‌و وێنه‌یه له‌و شوێنه هه‌ڵبواسرێ؟؟
ئه‌و کاته‌ی ئه‌م وێنه‌یه‌ی نێو په‌رله‌مان لابرا، ئه‌وا ئه‌کرێ له‌جیاتی ئه‌و وێنه گه‌وره به‌زۆر سه‌پێنراوه، وێنه‌یه‌کی شکۆمه‌ندی شێخی نه‌مر وه‌یان قازی پێشه‌وا هه‌ڵبواسرێ.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
