ئه‌و کوردانه کێن که ده‌چنه ڕیزی جه‌بهه‌ی نووسره‌وه ؟
Sunday, 15/12/2013, 12:00
2176 بینراوە
له سه‌ره‌تای ڕووداوه‌کانی سوریاوه کۆمه‌ڵانێکی زۆر له که‌سانی بیانی ڕوویان کرده سوریا بۆ به‌شداری کردن له جه‌نگ دژ به ڕژێمی به‌شار ئه‌سه‌د ، هه‌ندێکیان به پاڵنه‌رێکی مرۆڤایه‌تی و به‌شێکی زۆریشیان چه‌ندین ده‌وڵه‌ت پاڵنه‌ریان بون.
به‌شێکی زۆری دیشیان پاڵنه‌ری ئایدۆلۆجی و دینی پاڵی پێوه نان بۆ چون بۆ سوریا ، ئه‌مانه له هه‌مو سوچێکی گۆی زه‌ویه‌وه ڕوویان کرده سوریا ، ناوچه‌ی کوردستانیش که ماوه‌یه‌کی زۆره مۆڵگه‌ی چه‌ندین گروپی ئوسوڵی دینیه بۆ سه‌رچاوه‌یه‌کی یارمه‌تی مرۆیی به‌ڵام بۆ هاوکاری کوردانی ڕۆژئاوا نا ، به پێچه‌وانه‌وه بۆ پشتگیری ئه‌وانه‌ی دژی کورد ده‌جه‌نگن (مه‌به‌ست داعش و نوێره و سوپای ئازاد)ه.
له کاتێکدا زیاد له ٢٣٥ هه‌زار کوردی ڕۆژئاوا په‌نایان هێناوه بۆ باشوری کوردستان ، ژماره‌یه‌کی زۆر کوردی باشور ده‌چنه ناو سوریا بۆ جیهاد ! ئه‌م ڕاپۆرته‌ی کوردستان تریبیون تیشك ده‌خاته سه‌ر سه‌ره‌تاکانی په‌ڕینه‌وه بۆ سوریا و چۆنێتی ته‌جنید کردن و ڕێگاکانی گواستنه‌وه‌ی ئه‌و تیرۆریستانه بۆ ناو سوریا بۆ ناو ڕیزه‌کانی داعش و نوێره.
بۆ ئه‌وه‌ی تێ بگه‌ین له‌م ڕوداوانه پێویسته که‌مێك بگه‌ڕێینه‌وه بۆ دواوه ، ، ساڵی ١٩٩٩ گروپێکی ئیسلامی به ناوی ڕاپه‌ڕین هاوپه‌یمانیه‌کی دروست کرد له‌گه‌ڵ گروپێکی دی به ناوی یه‌کبون که مه‌لا عه‌لی عه‌بدولعه‌زیز ئه‌میریان بو ، یه‌کبون خاوه‌نی ٨٠٠٠ چه‌کدار بو له ناوچه‌ی هه‌ڵه‌بجه ، خۆیان دابه‌شی ١٨ مه‌جموعه کرد ، ساڵی ٢٠٠١ عه‌لی باپیر خۆی جیا کرده‌وه له یه‌کبون و ١٥ به‌شی له یه‌کبون له‌گه‌ڵ خۆی برده ناو پارتێکی ئیسلامی نوێ به ناوی کۆمه‌ڵی ئیسلامی ! . پاشان ئه‌و ٣ به‌شه‌ی مابۆوه به جیا سێ گروپی ئیسلامی جیاوازیان دامه‌زراند که ئه‌مانه بون :
١- یه‌کێتی ئیسلامی به سه‌رۆکایه‌تی مه‌لا عه‌لی و منداڵه‌کانی ، عیرفان که بۆوه جێگره‌وه‌ی باوکی ، محه‌مه‌د و ه ته‌حسین که په‌یوه‌ندی کرد به قاعیده‌وه له ئه‌فغانستان و له پاکستان کوژرا وه سامان که له دوای ٢٠٠٣ وه چۆته ئێران و زانیاری زۆر له‌سه‌ر شوێنی نیه.
تێبینی : نازانم مه‌به‌ستیان له یه‌کێتی ئیسلامی هه‌ر بزوتنه‌وه‌ی ئیسلامیه یان نا .
٢- گروپی ئیسڵاح به سه‌رکردایه‌تی مه‌لا کرێکار ، که ئێستا له نه‌رویج به‌ندکراوه .
٣- گروپی هێزی سۆران به سه‌رکردایه‌تی ئاسۆ محه‌مه‌د حه‌سه‌ن که خه‌ڵکی هه‌ولێره و ساڵی ١٩٦٢ له‌دایك بوه ، ساڵی ٢٠٠٥ ده‌ستگیر کراوه و ڕه‌نگه له به‌ندیخانه‌ی سوسێ سجن بێت ، ئه‌م هێزی سۆرانه له هێزه‌کانی دی توندڕه‌وتر ناسراوه..
دوو گروپی دیش هه‌بون که گروپی بچوك به‌ڵام کاریگه‌ر بون (به سه‌رپه‌رشتی عومه‌ر بازیانی و ته‌وحید به سه‌رپه‌رشتی حه‌سه‌ن سۆفی که ساڵی ٢٠٠٠ کوژرا ، پاشان ساڵی ٢٠٠١ هێزی سۆران له‌گه‌ڵ دوو گروپی دی یه‌کیان گرت و گروپی تیرۆریستی جوندول ئیسلامیان پێك هێنا به سه‌رۆکایه‌تی ئه‌بو عه‌بدوڵای شافیعی ، دوای حه‌وت مانگ به یه‌کگرتنی جنودول ئیسلام و ئیسڵاح گروپی تیرۆریستی ئه‌نسارول ئیسلامیان پێك هێنا به سه‌رۆکایه‌تی مه‌لا کرێکار.
گروپی ئه‌نسار پێك هاتبو له ٥٠٠ چه‌کداری زۆر توندڕه‌وی پڕچه‌ک و باش مه‌شق پێکراو ، له ناوچه دوره‌کانی هه‌ورامان گیرسانه‌وه ، به تایبه‌تی بیاره و گوڵپ و سه‌رگه‌ت ، له ڕێگای که‌سێکی به ڕه‌گه‌ز عه‌ره‌ب به ناوی ئه‌بو وائیل (أبو وائل) په‌یوه‌ندیان له گه‌ڵ قاعیده ڕێکخستبو ، له ڕێگای ئێرانه‌وه ئه‌چونه ئه‌فغانستان به مه‌به‌ستی مه‌شق، گروپه‌که‌ی بازیانی ساڵی ٢٠٠٢ گه‌ڕانه‌وه هه‌ورامان. شایه‌نی باسه بازیانی له فه‌لوجه کوژرا پاشتر .
شه‌وی ٢٠٠٣/٢/٢٢ هێزه‌کانی ئه‌مریکا گورزێکی موشه‌کیان له ئه‌نسار وه‌شاند به ١٠١ موشه‌کی تۆماهۆك ،که له ده‌ریای سوره‌وه وه‌شێندران ، ئه‌م مه‌وجه‌ی موشه‌که هاوکات هێرشێکی گه‌وره‌ی هێزه‌کانی یه‌کێتی نیشتیمانی به دوادا هات که بۆ هۆی ئیفلیج کردنی ئه‌نسار و کوژرانی زۆربه‌ی زۆری کادره توندڕه‌وه‌کانی ، ئه‌وه‌ی مایه‌وه یان گیرا یان ڕای کرد بۆ ئێران ، کۆمه‌ڵی ئیسلامیش له‌م شاڵاوه موشه‌کیه‌دا به‌رکه‌وت و ٤٣ ئه‌ندامی کوژرا و ٥٠ یان بریندار بون.
سه‌رچاوه‌کان پێیان وایه ئه‌نسار له‌م چه‌ند ساڵه‌دا خۆی کۆکردۆته‌وه و به نهێنی که‌وتونه‌ته‌وه کار به تایبه‌تی پاش گه‌ڕانه‌وه‌ی هه‌ندێ له سه‌رکرده‌کانیان له ئێران (ڕه‌نگه مه‌به‌ستیان که‌سانی وه‌ك له که‌سانی وه‌ك دڵشاد گه‌رمیانی بێت) ه.ئه‌مانه ده‌ستیان کردوه به ته‌جنید کردنی لاوانی نێوان ته‌مه‌نی ١٧-٢٥ ، له مزگه‌وته‌کان ته‌جنیدیان ده‌که‌ن و دابه‌شیان کردونه‌ته سه‌ر گروپی ٨ که‌سی و غه‌سل ده‌ماغیان بۆ ئه‌که‌ن و پاشان له ڕێگای تورکیاوه ده‌یاننێرن بۆ سوریا بۆ ڕیزه‌کانی قاعیده (دیاره ئاسایش و پاراستن و زانیاری یان له گوێی گادا نوستون یان ئه‌وه‌تا ژێر به ژێر چاوپۆشی ئه‌که‌ن له‌م کاره ترسناکه بۆسه‌ر داهاتوی کورد و کوردستان) ه.
زۆربه‌ی ئه‌م تیرۆریسته کوردانه‌ی ئێستا له سوریان له ڕێگای تۆڕه کۆمه‌ڵایه‌تیه‌کانه‌وه په‌یوه‌ندیان له‌گه‌ڵ هاوڕێ و خزمانیان هه‌یه ، له ساڵی ٢٠١١ وه ئه‌م کۆچه‌ی لاوانی کورد ده‌ستی پێ کردوه و له ساڵی ٢٠١٣ دا گه‌یشتۆته لوتکه ، سه‌رچاوه‌کان ئه‌وه ده‌رده‌خه‌ن که چه‌ند که‌سێکی تورك که به ناوی بازرگانیه‌وه له کوردستانن ده‌ستێکی باڵایان هه‌یه له ته‌جنید کردنی لاوانی کورد و ناردنیان بۆ سوریا (کوردستان له سایه‌ی پارتی و یه‌کێتیدا بۆته لانکه‌ی میت و جاسوسه‌کانی ئیخوان و فه‌تحوڵا گویله‌ن) ه.
************
ناوی کۆمه‌ڵێك له‌و تیرۆریسته کوردانەی له سوریا کوژراون له‌گه‌ڵ زانیاری له‌سه‌ریان
هاوکار محه‌مه‌د :
له دایك بوی ساڵی ١٩٩٤ه ، دوای ئه‌وه‌ی نه‌یتوانیوه خوێندن له بواری فیزیادا ته‌واو بکات چۆته هندستان بۆ خوێندنی ده‌رمانسازی ، هاوڕێکانی به که‌سێکی ڕووخۆش و توندڕه‌و له دینداریدا باسی ده‌که‌ن ، زۆربه‌ی کات خه‌ریکی کاری ئاینی بوه ، سه‌ردانی مزگه‌وتی کردوه له هندستان ، له‌وێ ئاشنا بوه به کتێبه‌کانی مه‌نهه‌جی ئیبن ته‌یمیه (باوکی ڕۆحی فیکری ته‌کفیری و تیرۆریستیه ئه‌م ئیبن ته‌یمیه‌یه) که گه‌ڕاوه‌ته‌وه له سلێمانی ده‌ستگیرکراوه به تۆمه‌تی بڵاوکردنه‌وه‌ی دیڤیدی و سیدی هاندان بۆ توندڕه‌وی . شه‌ش مانگ به‌ند بوه ، پاش به‌ربونی چۆته تورکیا و له‌وێوه بۆ سوریا ، له هێرشێکدا بۆ سه‌ر فڕۆکه‌خانه‌ی حه‌له‌ب کوژراوه له ساڵی ٢٠١٢.
عوسمان حه‌مه تۆفیق بانیشاری:
ساڵی ١٩٩٣ له‌دایك بوه ، وازی له خوێندن هێناوه ، زۆر توندڕوه بوه له دینداریدا ، عاشقی سه‌ید قوگب بوه ، ناوی خۆشی ناوه ئیبنول ته‌یمیه (ناو بڕاوه) له مزگه‌وتێکی سلێمانی ده‌رسی دینی به منداڵان وتۆته‌وه (قوڕ به‌سه‌ر ئه‌و منداڵه‌ی ئه‌مه فێری دینی بکات) له مزگه‌وتی بێخود و نور ، پاشان چۆته سوریا و له ساڵی ٢٠١٣ له‌وێ کوژراوه.
زانا ڕگار:
خه‌ڵکی کفریه و ساڵی ١٩٩١ له‌دایك بوه ، وازی له خوێندن هێناوه و چۆته سوریا و له‌وێ کوژراوه.
که‌یوان محه‌مه‌د:
ساڵی ١٩٨٩ له ته‌وێڵه له‌دایك بوه ، زانکۆی هه‌ڵه‌بجه‌ی ته‌واو کردوه ، یاریزان بوه (تۆپی پێ) ده‌رسی دینیشی به منداڵان وتۆته‌وه ، له ژێڕ چاودێری به‌رده‌وامی ده‌زگا ئه‌منیه‌کاندا بوه ، پاشان چۆته سوریا و له‌وێ کوژراوه ، پێش کوژرانی له فه‌یسبوك کۆمه‌ڵێ قسه‌ی بێ سه‌ره‌وبه‌ره‌ی نوسیوه که هێرشه بۆ سه‌ر کوردانی ڕۆژئاوای کوردان ، نوسیویه‌تی (ئێمه بۆ جه‌نگان دژی زوڵم ئه‌چینه جیهاد له سوریا ، ئه‌وانه‌ی ڕه‌خنه‌مان لێده‌گرن بۆ جه‌نگانمان دژی کوردانی ڕۆژئاوا ده‌بێ بزانن ئێمه‌ی خه‌ڵکی هه‌له‌بجه له هه‌مو که‌س زیاتر مانای کوردایه‌تی ده‌زانین ، ئه‌گه‌ر کۆمه‌ڵێك کورد هاوپه‌یمانی ئه‌سه‌د بن ، دیاره مه‌به‌ستی په‌یه‌ده‌یه ، ئه‌وا ئه‌وانه نه کوردن و نه په‌یوه‌ندیان به کوردایه‌تیه‌وه هه‌یه ،) ه
نه‌به‌ز سدیق:
ناسراو به ئه‌بو قه‌تاده! ساڵی ١٩٩٣ له‌دایك بوه و له مزگه‌وتی دارۆغا ده‌رسی دینی خوێندوه له سلێمانی ، په‌یوه‌ندی کردوه به جه‌بهه‌ی نوێروه و له سوریا کوژراوه.
ئیحسان عه‌بدولره‌حمان:
له‌دایکبوی ١٩٨٦ ه له هه‌ڵه‌بجه ، زانکۆی هه‌ڵه‌بجه‌ی ته‌واو کردوه ، په‌یوه‌ندی کردوه به نوێره‌وه و له سوریا کوژراوه.
که‌نعان عه‌بدولکه‌ریم:
ناسراو به عه‌بدولمه‌نێوری عێڕاقی له‌دایکبوی هه‌ڵه‌بجه‌یه و له سوریا کوژراوه.
عوسمان عه‌بدوڵا نێرگزه‌چاڕی:
له‌دایكبوی ساڵی ١٩٨٧ ی هه‌ڵه‌بجه ، له سوریا بریندار کراوه و براوه‌ته تورکیا بۆ چاره‌سه‌ر و له‌وێ مردوه.
ڕابه‌ر گاریق :
له‌دایکبوی ١٩٨٩ ی هه‌ڵه‌بجه ، له مزگه‌وت خوێندویه‌تی و چۆته سوریا و له‌وێ کوژراوه .
ساماڵ عوسمان: له دایك بوی ساڵی ١٩٩٤ ، له سوریا کوژراوه
***********************
ئه‌وه‌ی جێی سه‌رنجه ئه‌وه‌یه ئه‌و گه‌نجانه خه‌ڵکی ناوچه‌یه‌کی دیاری کراوه که ناوچه‌ی هه‌ڵه‌بجه و هه‌ورامانه ، سه‌رجه‌میان له مزگه‌وته‌کانه‌وه به لاڕێدا براون ، وه کۆمپانیا و که‌سانی تورك ئازادانه لاوانی کورد به‌ن لاڕێدا ده‌به‌ن له ڕێگای سه‌دان خوێندنگا و زانکۆی تورکیه‌وه و به‌ناو حکومه‌ته‌که‌مان و ئۆپۆزسیۆنه‌که‌شمان که شه‌و و ڕۆژ خه‌یاڵی لای بوجه‌یه ، ئه‌م کاره‌ساته له به‌ر چاویاندا ڕوو ده‌دات و که‌چی هیچ هه‌ڵوێستیان نیه ، گه‌ر ئه‌مڕۆ ئه‌و گه‌نجانه له سوریا کوردی ڕۆژئاوا ده‌کوژن و ده‌کوژرێن ، ئه‌وا سبه‌ینێ دور نیه له سلێمانی و هه‌ولێر و هه‌ڵه‌بجه خه‌ڵك بکوژن و ته‌قینه‌وه ئه‌نجام بده‌ن ، ئه‌و کاته کاره‌ساته‌که زۆر گه‌وره‌تر ده‌بێت
لینکی بابه‌ت :
http://kurdistantribune.com/2013/how-do-kurds-join-al-nusrah-syria-who-are-they/.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
