پارتی و چاڵهەکەندن بۆ خۆپاراستن لە کورد؟!

Sunday, 13/04/2014, 12:00

2058 بینراوە

پارتی بەرامبەر بە سنوری رۆژئاوای کوردستان دەستی بە هەڵکەندنی چاڵ کردووە؟! چاڵ بەرامبەر کێ و بۆچێ؟ تورکیا دیوار لەسەر سنورەکانی رۆژئاوای کوردستان دروست دەکات، چونکە ئەو وەکو وڵاتێکی داگیرکەر ئازادی کوردەکان لە رۆژئاوا بە مەترسی لەسەر ئاسایشی نەتەوەیی خۆیدا دەبینیت. پەکەکە و پەیەد هەرەشەن بۆسەر بەرژەوەندی رەگەزپەرستانەی تورکان، چونکە داوای ئازادی کورد لەو بەشانەدا دەکەن و لەئەگەری ئازادی کورداندا کوردەکان دەبنە هێزێکی گرنگ و خاوەن سەنگایی لەناوچەکەدا، ئەوەش دژی بەرژەوەندی ناسیونالیستانەی تورکیایە. بەڵام پارتی بۆ؟ پارتی وەکو بڵێی تورکیای ئاغای فەرمانی پێداوە! ئایا رێکەوتنەکانی نێوان بنەماڵەی بارزانی و تورکیا گەیشتۆتە ئەو ئاستە ئیتر هەنگاوەکانی تورک و ئەوان لێکجیانەکرێنەوە؟ ئایا بەرژەوەندی تورکیا و پارتی یەکسانن و بەرژەوەندیەکان لەیەک سەرچاوە دەکەنەوە؟ ئایا بنەماڵەی بارزانی بڕیاریان داوە کوردستان بکەنە میرنشینێکی سەربە تورکیا و خەونی ئۆردۆگان لە زیندووکردنەوەی میراتی عوسمانی بهێننەدەی (وەکو هەندێ ئاماژەی بۆ دەکەن)؟ کۆمەڵێ پرسیاری تر هەن دەکرێ لێردا بکرێن.
پارتی بۆ چال هەڵدەکنێت؟ چاڵهەڵکەندن دادی رژێمی بەعسی نەدا و لە مەترسیەکان رزگاریان نەکرد، پێشمەرگە لە رۆژانی سەختی خەباتدا بەسەر ئەو چاڵانەی دەوری شاردا تێدەپەرین و چاڵاکی خۆیان ئەنجام دەدا و دەگەڕانەوە ناوچە ئازادکراوەکان. ئایا مەترسی هەرەشەکانی پەیەد و یەپەگە هێندە مەترسیدارن کە پارتی ناچارە چاڵ هەڵکەنێت؟ ئایا پەیەد و پەکەکە مەترسین لەسەر کورد یا بەرژەوەندیەکانی بنەماڵەی بارزانی؟
سنورەسەپێندراوەکانی کوردستان خەڵکی کوردستانیان پارچە پارچە کردووە و هۆکارێکی کاریگەری لێکترازانی گەلی کوردە. ئایا لەیەکیتردابڕاندنی زیاتری گەلی کورد جگە لە زیان چ سوودێکی بۆ گەلی کورد هەیە؟ ئەگەر پەکەکە یا پەیەد جۆری بیرکردنەوە و ئایدۆلۆژیایان بەدڵی پارتیش نەبێت، ئایا نەدەکرا لە رێگەی دایەلۆگ و بیروراگۆڕینەوە پەیوەندیەکی گونجاوی بەرپرسیارانە لە نێوانیاندا دروستبکرێت؟ ئایا نەدەکرا لەبری دژایەتی هاوکاری یەکتر بکەن و پشتگیری یەکتر بکەن؟ ئایا لەسەر لایەنە کوردیەکان نییە هاوکاری و پشتگیری یەکتر بکەن؟ ئایا دەستکەوتی هەر پارچەیەکی کوردستان هی هەموو گەلی کوردستان نییە؟ دەمی هەر یەکێک لە بەرپرسان دەکەیتەوە گوتن لەسەر پێویستیی یەکگرتوویی و یەکدەنگی دەکاتەوە! بەڵام گوتن و کردارەکان بەداخەوە ئاسمان و رێسمانیان نێوانە.
پارتی بۆ چاڵ هەڵدەکەنێ و بە بڕیاری کێ؟ لە سیستەمێکی دیموکراسیدا دەکرا پەرلەمان بە زۆرینەی رەهای دەنگەکان بڕیارێکی لەو شیوەیە بدات و حکومەت جێبەجێی بکات. لە باشوری کوردستاندا نەپەرلەمان هەیە و نەحکومەت کە لە چوارچێوەیەکی گونجاودا هەبن و پیادەی دەسەڵاتەکانی خۆیان بکەن. ئەو حکومەتە کاتییەی ئێستا هەیە ئەو دەسەڵات و رەوایەتییەی نییە بتوانێ بڕیاری لەو شێوەیە بدات، جگەلەوەی بەبێ رەزامەندی پەرلەمان (ئەگەر ئێستا دەستبەکار بوایە) بۆی نییە بڕیاری لەو شێوەیە بدات. دیارە پەرلەمان لاواز و بێتوانایە لە کوردستاندا، هەروەکو زۆر لە ئەندامانی پەرلەمان نوێنەری راستەقینەی گەل نین و بە میتۆد و رێگەی نارەواوە لەژێرناوی هەڵبژاردندا هاتوونەتە پەرلەمان. وەکو دیارە وەکو هەر هەنگاوێکی دیکەیان بنەماڵەی بارزانی بڕیارەکەیان بەپێی بەرژەوەندی تایبەتی خۆیان داوە. ئایا ئەو کارەی بنەماڵەی بارزانی دژی بەرژەوەندی ناسیونالیستانەی کورد نییە؟
لەناو هەر گەلێکدا پرسە گرنگ و چارەنوسسازەکان هەستیارن و کەس و بنەماڵە یا پارتی رامیاری ئەو دەسەڵاتەیان نییە سەربەخۆ و بێگوێدانە بەرژەوەندی گەل بڕیار لەسەر ئەو پرسانە بدەن یا هەڵسوکەوت بە بابەتە هەستیارەکان بکەن. چونکە ئەو پڕس و بابەتانە راستەوخۆ پەیوەندیان بە ئاسایشی نەتەوەیی، سەروەری و بەرژەوەندی ناسیونالیستانەی وڵاتەوە هەیە. بەمجۆرە دروستکردنی چال یا دیوار بەدرێژایی سنور لەدەسەڵاتی پارت و بنەماڵەدا نییە، بەڵکو تەنها دەزگایەکی دەسەڵاتداری وەکو پەرلەمانی خاوەن دەسەڵات (کارتۆنی نا) بە زۆرینەی ڕەهای دەنگەکانی ئەندامانی دەکرێ بتوانێ بڕیاری لەو شێوەیە دەربکات، کە لەو بارەدا دەبێ روونکردنەوە و بەلگەی گونجاوی بۆ بڕیارەکەی هەبێت. بڕیاری تاکڕەوانە لەمبارەیەوە بەپێی بەرژەوەندی سەرۆک و بنەماڵە یا پارتی دەسەڵاتدار، پێشێلکارییە لە سەروەری گەل و وڵات. ئەوەش دەچێتە خانەی ناپاکی لەگەل و وڵات.
لەکاتێکدا کە دەسەڵاتی بنەماڵەیی و میلیتسگەرا لە وڵاتێکدا فەرمانرەوابن، چەمک و دامەزراوە دیموکراسیەکان واتایەکیان نامێنێ و ئەگەر دامەزراوەکان بۆدیەکانیان هەبن، ئەوە تەنها بەناو هەن. لەمبارەدا سەرۆک و بنەماڵەی دەسەڵاتدار خۆیان خاوەن بڕیاری یەکەم و یەکلاکەرەوەن لە هەر پرسێکی هەستیار و چارەنوسسازدا. بۆنمونە بڕیاری هێنانی سوپای سەدام حوسێن لە لە ٣١ ئابی ١٩٩٦ دا بەپێی بەرژەوەندییە تایبەتەکانی سەرۆک و بنەماڵەی بارزانی بوو و ئەوان لەو رێگەیەوە خۆیان و پارتەکەیان لە شکست و لەناوچوون ڕزگارکرد. دیارە ئەوسا باشوری کوردستان لەژێر ئاگری شەری ناوخۆییەوە دەیناڵاند، نە پەرلەمان هەبوو و نەحکومەت، بنەماڵە و پارتی خاوەن میلیتس فەرمانرەوا بوون.
ئەگەرچی ئێستا گوایە دامەزراوەکانی وەکو پەرلەمان و حکومەت هەن، گوایە دەسەڵاتێک بەناوی حکومەتی هەرێمی کوردستان هەیە، بەڵام بنەماڵەی بارزانی وەکو ٩٦ لەسەر هەنگاوە تاکڕەو و داسەپێنەرەکانیان بەردەوامن. چونکە ئەوان توانیویانە زۆر لەو میتۆد و میکانیزمانە پیادەبکەن کە مسۆگەری ئەو دەسەڵاتە رەهایەیان لەژێرناوی دیموکراسیدا دەکات. دیارە لەناوچەی سەوزیشدا یەکێتی درێغی لە قۆرغکردنی دەسەڵاتدا نەکردووە، کە ئێستا تووشی شکست بووە. لە باشوری کوردستاندا دەسەڵاتێکی دیموکراسی بوونی نییە، چونکە باشوری کوردستان هەرگیز دیموکراتیزە نەکراوە. لە باشوری کوردستاندا سیستەمی بنەماڵەیی مافیایی و میلیتسگەرایی لەئارادایە.
ئەو هەنگاوەی ئێستای بنەماڵەی بارزانی هەنگاوێکی دیکەی تاکڕەوانەیە، بەپێی بەرژەوەندی تایبەتی بنەماڵەی بارزانی دراوە، بۆیە بڕیارێکە گوێ ناداتە پرەنسیپەکانی بڕیاردان لەسەر پرس و بابەتە چارەنوسسازەکاندا، بەمجۆرە بەپێویستی نابینێ بۆ گەل بگەڕیتەوە و رەوایەتی بڕیارەکەی لە چوارچێوەیەکی دیموکراسیانەدا لە نوێنەرانی گەلەوە بەدەستبهێنیت، هەروەکو لە کوردستاندا ئەو دامەزراوانە وەکو بۆدی هەن بەڵام لەئاست بنەماڵەی دەسەڵاتداردا لاواز و بێدەسەڵاتن.
بەپێی چاڵهەکەندنەکە بەرامبەر بە سنوری رۆژئاوا واپێدەچی ئەوان مەترسی لەسەر بەرژەوەندیەکانی خۆیاندا دەبینن وهەنگاوی پێشکات دەهاوێن، یا بەرژەوەندییە هاوبەشەکانی خۆیان و تورکیا ئێستا ئەوە دەخوازێ کە ئەو هەنگاوە بنێن، بەبێ گوێدانە بەرژەوەندیەکانی کوردستان. ئەو هەنگاوە و هەنگاوەکانی دیکەیان ئەوە پیشان دەدەن کە ئەوان وەکو بنەماڵەی دەسەڵاتدار بڕوایان بە پرەنسیپە دیموکراسیەکان نییە و خۆیان لەسەرووی ئەو دەسەڵات و دامەزراوانەوە دەبینن. ئەوان خۆیان وەکو تاکە دەمڕاست و خاوەن بڕیار دەبینن و بەرژەوەندی گەل و نیشتیمان لە دیدی بەرژەوەندیەکانی خۆیانەوە دەبینن. هەروەکو ئەوان ئەو کارانە لەژێرناوی بەرژەوەندی گەلدا و پاراستنی ئاسایشی نەتەوەیی وڵاتدا ئەنجام دەدەن، ئەوەش نمونەیەکی دووبارەیە و خاڵێکی هاوبەشە لە تایبەتمەندیەکانی سەرۆک و بنەماڵە دیکتاتۆرەکاندا.