Thursday, 29/07/2010, 12:00
1289 بینراوە
بێن بۆ شاری هه‌زار جار هه‌ڵکه‌نراو و ناو ته‌پ و تۆز و خۆڵ؟ یان بۆ شاری پیه‌س و پۆخڵ و زه‌رد هه‌ڵگه‌راو به پوش و دڕك خاشاک و سه‌حرا ئاسا؟ یان بێن سه‌یری ئۆتۆ بان و های وه‌ی و شه‌قامی پان و به‌رین و بێ تاسه و چاڵ و چۆڵی و قیری ساف جوان که‌ن ؟ یان بێنه سه‌یری پرد و نه‌فه‌قی چه‌ند قات و پێچاوپێچ و میترۆ و شه‌مه‌نه‌فه‌ر و ترام و گه‌شتی ناو ده‌ریا و روبار بکه‌ن؟ بۆ کوێ بێن، بۆ کام ده‌ر‌یاچه و گازینۆی ره‌نگاو ره‌نگ؟ بۆ سه‌ر کام بیلاج و به‌حر؟ بۆ شرم الشیخ و عه‌قه‌به و غه‌رده‌قه‌که‌ی دوکان و ده‌ربه‌ند...؟!! یان بۆ شاخی ئه‌زمه‌ری رووت و ره‌جاڵ و وشك و برنگ و زه‌رد هه‌ڵگه‌راو به پوش و په‌ڵاش؟ بێن فێری چی بن، کاره‌با بڕان چیه و چۆنه له قرچه‌ی گه‌رمادا؟ یان فێرببن چۆن چۆنی جۆزه‌ی موه‌لیده هه‌ڵده‌نه‌وه به دار و ماسحه...؟!!!! بێن بۆ سه‌یری کام مۆزه‌خانه و شوینه‌وار و جێگای ئه‌سه‌ری سه‌ره‌نج راکێش؟ هیچ جێگایه‌ك هه‌یه جوان و رێك وپێك کرا بێت و خه‌لك تامه‌زرۆ بێت بیبینێت؟ گه‌شتیار بێت چی بکات؟ له بازارێکی پیسدا شتی ئێرانی و تورکی و ێینی عادی و بێ که‌ڵك بکرێت؟ یان ته‌ماشای مۆڵ و سوپه‌رمارکێتی ناشرین بکه‌ن؟ ئازیزان ئاخر خه‌ڵك گه‌شت ئه‌کات تا شتی تازه و جوان ببینێت ، شتێك فێر بێت، دیمه‌نی تازه و وێنه‌یه‌کی نوێ و نه‌بینراو سه‌یر بکات....ره‌مزی تایبه‌تی ئه‌و ناوچه و هه‌رێم و شاره ببینن، ئاده‌ی پێم ناڵێن ره‌مزێك تایبه‌ت بێت به سلێمانی؟ کامه‌یه؟ کوا مۆرکی تایبه‌ت به خۆی که له هیچ جێگایه‌کی تر نه‌بێت؟ گه‌شتیار یان دێت بۆ بینینی جوانی سروشت و باخی جوان و سه‌وزایی زۆر و سه‌ر ده‌ریا ،یاخود هیچ نه‌بێت که‌ش و هه‌وایه‌کی پاك و له‌بار و فێنك و ته‌ندروست (که خوا ئه‌مه‌شی پێ ڕه‌وا نه‌بینیوین)، یان بۆ جێگای ئه‌سه‌ری و کۆن و مۆزه‌خانه، یان بۆ بازاری راقی و جوان پڕ له شت و کاڵای مارکه و باش، یان بۆ خزمه‌تی ته‌ندروستی زۆر مۆدێرن و پێشکه‌وتوو ، یان بۆ شاری پاك و خاوێن و جوان، یان بۆ سه‌یری هونه‌ری پیش که‌وتوو و به‌رز و شانۆی ڕاقی و ئۆپێرا و ڤتستیڤاڵی فیلم و گۆرانی و سه‌ما و بالیه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
