کەرکوک، دێتە دەنگ
Monday, 27/06/2016, 20:23
2156 بینراوە
ئەمڕۆ بە ژمارە، هەشتاو نۆ ساڵە
هەنگوینی شانە، لە دەمما تاڵە
گڕو ئاگرێ بەربۆتە جەستم
هەمیشە خەستەم
بوم بە کورەی جۆش
بۆخۆم بێ بۆن و بۆ نەیار بۆنخۆش
تیشکی ئاگرم ئەبەخشم بە دور
کەچی لەلای خۆم،رۆژ،شەوی دەیجور
نەدارو بێ بەش
لەکنخۆم کارگەو کانی زێڕی رەش
چەندین پزیشکم وەبەرهێناوە
بۆ من بەبێ سوت
لەڕو لاوازو پشتم چەماوە
وەکو سڵقی روت
ئێستا پزیشکێ لە ئەمریکاوە
ئەڵێ: چاوەکەم دنیا گۆڕاوە
من چارەسازم
من بەردەبازم
ئەتکەم بە هەرێم، شاری رازاوە
ئەتدەم بە دەستی زریان و باوە
بێ ئیستۆپ و رۆت
خۆت و بەختی خۆت
یا رانکوچۆغە ئەکرێ بەبەرتا
یا چەفتەوعەگاڵ لەتەوقی سەرتا!!
------------
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
