٭ مەرگی ژینا ئەمینی، بنەمای سەرهەڵدانێکی شکۆدار

Friday, 07/10/2022, 0:11

1223 بینراوە


٭ پانۆڕامای خۆپیشاندانەکانی خۆرهەڵاتی کوردستان

من هەرچییەک دەنووسم دژی هێڵە خراپ و ناتەندروستییەکانی میللەتەکەمە، دژی ناپاکی و خۆخۆری و خۆبەبچوکزانی و پاشکەوتووییە، تێکۆشانی من تا ئەو کاتەیە بەرخۆدانێکی میللەتەکەم دەگاتە ئازادیی نەتەوەیی، دواتر دەبمە ڕەخنەگرێکی ئەو دەسەڵات و خۆبەڕێوەبەرییە کوردییە.
ژینا ئەمینی، كچە كوردی 22 ساڵەی خەڵكی سەقز، لە سەرەتایی مانگی (9)ی ساڵی 2022 دا لەگەڵ خانەوادەکەی دا بۆ گەشت و دیدار لەگەڵ خزمەکانیان چووبوونە تاران. ئەو کیژە کوردە، دوای ئەوەی لە لایەن هێزەکانی(پۆلیسی ڕێنوێنی ئاینی) (پۆلیسی ئاكاری تاران)ەوە، دەستگیر کرا و بۆ گرتووخانەی "وزەرا" گوزرابووەوە، دوای ئەشکەنجەیەکی زۆری جەستەیی بەهۆی نەپۆشینی حیجابی زۆرەملێوە، دواتر لە نەخۆشخانەیەکی تاران گیانی لە دەست دا.

دوای گیان لە دەستدانی ژینا ئەمینی

ناڕەزایەتی سەراسەری بەرفراوانی لە ئێران لێكەوتەوە كە ئەو ناڕەزایەتییانە پشتیوانییەكی بەرچاوییان لەسەر ئاستی جیهان بەدەستهێنا، خۆپیشاندانی گەورە و فراوان لەلایەن کورد و خەڵکی ئێران لە ئەمریکا و ئەوروپا دژی کۆماری ئیسلامی ئێران بەڕێوەچوو. 
لە شار و شارۆچکەکانی  خۆرهەڵاتی کوردستان و ئێران سەریهەڵدا، خۆپیشاندەران هەڵیان دەکوتایە سەر هێزە ئەمنییەکان و ئۆتۆمبێلەکانیان دەسوتاند.
خۆپیشاندان و نارەزایی جەماوەری لە ئێران بەڕێوچوو و هێزە ئەمنییەکانیش بۆ بڵاوەپێکردنی خۆپیشاندەران گازی فرمێسکڕێژیان بەکارهێنا. 
مەرگ و پرچی ژینا ئەمینی، تەنها بیانوویەک بوو بۆ تەقینەوەی ناڕەزایەتی خەڵک دژی ڕژێمی داپڵۆسێنەر و چەوسێنەری ئاخوندەکانی ئێران.
 مەرگی ژینا ئەمینی تەنها توڕەیی بەشێکی زۆری شارەکانی ئێرانی بەدوای خۆیدا نەهێنا، بەڵکو پرسگەلێکی دیکەی لە ئێران وروژاند لەوانە سنووردارکردنی ئازادییە کەسییەکان لە ئێران، یاسای توندی پۆشینی جلوبەرگ بۆ ژنان و ئابوورییەک کە بەهۆی سزاکانەوە بەرەو داڕمان دەچێت.
پرسی كورد لەناو ناڕەزایەتییەكەدا، پرسێكی گرنگە، تەنانەت كچە كوردێك بووەتە داینەمۆی ناڕەزایەتییەكە و لەهەمان كاتدا، دروشمی تەواوی شارەكان بووە بەو دروشمەی، لە بیرۆكەی بەڕێز ئاپۆوە هاتوەتە دەر.(ژن، ژیان، ئازادی) كورد لە گۆشە نیگایەكی دیكەوە تەماشای ناڕەزایەتییەكان دەكات، چونكە گەلێكی ژێردەستەیە، زمانەكەی لەژێر هەڕەشەی سیستەمە ئاخوندییەكەدایە. شوشناسەكەی و جوگرافیاكەی داگیركراون و، هەوڵی گۆڕینی كولتوورەكەی دەدرێت. 

٭مەرگی ژینا ئەمینیی، پارتە سیاسییەکانی خۆرهەڵاتی لەدەوری یەک کۆکردەوە

دوای چەندین ساڵ ناکۆکی نێوان پارتە سیاسییەکانی خۆرهەڵاتی کوردستان، هەر یەک لەنوێنەرایەتی حیزبی دیموکراتی کوردستانی ئێران، پارتی ژیانی ئازاد (پژاک)، کۆمەڵەی زەحمەتکێشانی کوردستان، سازمانی خەباتی کوردستانی ئێران، کۆمەڵەی زەحمەتکێشانی کوردستانی ئێران، پارتی ئازادی کوردستان (پاک)، کۆمەڵە ڕێکخراوی کوردستانی حیزبی کۆمۆنیستی ئێران، بۆ یەکەم جار لەئۆسلۆ کۆدەبنەوە.
ڕەخنە و بێزارییەکانی کوردان لەپەرشوبڵاوی و نەبوونی کاری هاوبەش، فشاری زۆری لەسەر لایەنەکان داناوە، یەکێک لەئامانجەکانی کۆبوونەوەکە یەکڕیزی و کاری هاوبەش بو
دوای ئەو خۆپیشاندان و ناڕەزایەتییە فراوانەی خۆرهەڵاتی کوردستان و ئێرانی گرتەوە دژی ڕژێمی ئاخوندەکان، کۆماری ئیسلامی ئێران کەوتە بۆردومانکردنی سنورەکانی باشوری کوردستان، لەلایەکی دیکەشەوە بە فەرمی حکومەتی هەرێمی باشوری کوردستان و یەکێتی نیشتیمانی کوردستان و پارتی دیموکراتی کوردستانی ئاگادارکردەوە کە ڕێگە بە چالاکی چەکداری ئۆپۆزسیۆنی ئێرانی (پارتە کوردییەکانی خۆرهەڵاتی کوردستان کە بنکە و بارەگاکانیان لە هەرێمە) نەدەن لە ناو خاکی هەرێمی کوردستانەوە
لە وەڵامدانەوەی ئاگادرییەکەی ئێران دا پارتی دیموكراتی كوردستان شەوی 27/9/2022 ئاگاداری هێزی پێشمەرگەی سێ حزبەكەی كوردستانی ئێران (كۆمەڵەی زەحمەتكێشانی كوردستان، كۆمەڵەی شۆڕشگێری زەحمەتكێشانی كوردستانی ئێران و حزبی دیموكراتی كوردستانی ئێران) بەپەلە بارەگاكانیان لە باڵەكایەتی و سیدەكان چۆڵبكەن و بیگوازنەوە بۆ زڕگوێزو كۆیە، ئەگەرنا ناچار دەبن بەهێز ناوچەكەیان پێچۆڵبكەن.

٭ هێرشی موشەکی ئێران

ڕۆژی چوارشەممە 28ی ئەیلوولی 2022 کاتژمێر 10:15ی پێشنیوەڕۆ، سوپای پاسدارانی کۆماری ئیسلامیی ئێران بە چوار قۆناغ زنجیرە هێرشێکی لە ڕێگەی مووشەکی بالیستیکی و فڕۆکەی بێفڕۆکەوانی بۆمبڕێژکراوەوە بۆ سەر هەریەکە لە بارەگاکانی پارتی ئازادیی کوردستان لە پردێ، پژاک- پارتی ژیانی ئازاد کوردستان لە ماوەت، قەڵای دیموکراتی حیزبی دیموکراتی کوردستانی ئێران لە شاری کۆیە، بارەگای کۆمەڵەی زەحمەتکێشانی کوردستانی ئێران و کۆمەڵەی شۆڕشگێری زەحمەتکێشانی کوردستانی ئێران لە زڕگوێز لە سلێمانی، کەمپەکانی نیشتەجێبوونی کوردەکانی خۆرهەڵات لە زڕگوێز، زڕگوێزەڵە و بانەگەورە لە پارێزگای سلێمانی و کەمپەکانی ئازادی و قەڵا و ئەمیرییە لە کۆیەی کردە ئامانج.
لە هێرشەکان دا زیاتر لە 70 مووشەکی بالیستیکی جۆری فاتح و فڕۆکەی بێفڕۆکەوانی بۆمبڕێژکراو لەناو خاکی ئێرانەوە بە چوار قۆناغ ئاراستە کران، قۆناغی یەکەم، تەنها لە رێگەی مووشەکی بالیستیکی، قۆناغی دووەم، ‌‌بە مووشەکیی بالیستیکی و فڕۆکەی بێفڕۆکەوانی بۆمبڕێژکراو، قۆناغی سێیەم‌، مووشەکی بالیستیکی بە هاوکاری فڕۆکەی بێفڕۆکەوانی چاودێری و قۆناغی چوارەم تەنیا لە ڕێگەی مووشەکی بالیستیکییەوە بووە.
هێرشەکان لە ناوچەی سەلاسی باوەجان لە پارێزگای کرماشانی هاوسنووری پارێزگای هەڵەبجە، ناوچەی سەردەشت لە پارێزگای ئازەربایجانی خۆرئاوای هاوسنوور لەگەڵ ئیدارەی ڕاپەڕینەوە ئاراستە کراون و تێیدا شوێنە گشتییەکانی وەک باخچەی ساوایان، قوتابخانە، بنکەی تەندروستی، نەخۆشخانە، هۆڵی بۆنە و ئاهەنگ و ئۆتۆمبێلی خزمەتگوزاری و ماڵی هاووڵاتییانی سڤیل کراوەتە ئامانج.
بەهۆی ئەو هێرشانەوە 13 کەس شەهید بوون، 58 کەسی دیکەش برینداربوون کە زۆرینەیان هاووڵاتیی سڤیلن و لەنێویاندا منداڵی خوار تەمەن 10 ساڵ و قوتابی و مامۆستا و ڕۆژنامەوان هەبوون.
شەهیدەكانی حزبی دیموكراتی لە شاری كۆیە ئەمانە بوون: " محەمەد خەلیلی، میلا پیرساحێب، رەیحان كەنعانی، هاجەر كەریمی، شێركۆ بەرتانی) هەروەها(18) كەسی دیكە لە كۆیە برینداربوون.

شەهیدەکانی (پارتی ئازادی كوردستان) لە پردێ

(5) شەهید و (14) بریندار. کۆمەڵەی زەحمەتکێشانی کوردستان لە زڕگوێز،(3) پێشمەرگەیان برینداربوو.
لە هێرشەکانی ئێران دا بۆ سەر کۆیە، ژنێکی دووگیان بەهۆی بۆردوومانەکەوە بە ناوی (رێحان کەنعانی) شەهیدبوو و منداڵەکەی کە بڕیاربوو دوو هەفتەی دیکە لەدایک ببێت، لەکاتی مردنی دایکی دا بە نەشتەرگەری لەدایکبوو. دوای مانەوەی لە ژێر چاودێری پزیشکی دا بۆ زیاتر لە 24 کاتژمێر منداڵەکەش مرد.
هەر هەمان ڕۆژ (محەمەد پاکپور) فەرماندەی هێزەکانی زەمینی سوپای پاسداران وتی: "تا ئێستا (73) موشەکی زەمین بە زەمین، دەیان فرۆکەی بێ فڕۆکەوان، بە وردی بارەگاکانی گروپەكانمان لە باکوری عێراق دا کردووەتە ئامانج و خاپوری کردون. لە قۆناغی نوێی پرۆسەکەدا، (42) بنکەی جیابەجیا کە ماوەی نێوانیان (400) کیلۆمەتر بووە، وێرانکراوە. ئەم پرۆسەیەی جەنگاوەرانی ئیسلام تا چەکداماڵینی تەواوی گروپەکان لە باکوری عێراق بەردەوام دەبێت".
قەرارگای حەمزەی هێزی وشکانیی سوپای پاسدارانی ئێران دەڵێت کە بنکەکەی لە شاری ورمێیە لە راگەیێندراوێکدا دەڵێت: "لەو هێرشەدا سوودی لە مووشەکی جۆری 360ی هێزی وشکانیی سوپای پاسداران و فڕۆکەی بێفڕۆکەوانی بۆمبڕێژکراو وەرگرتووە.
لەبارەی ئۆپەراسیۆنەکەوە پەیامێک ئاراستەی بەرپرسانی هەرێمی کوردستان دەکات و دەڵێت: "تاوەکو نەهێشتنی هەڕەشەی ئەم هێزانە و هەنگاوی کاریگەریی بەرپرسانی هەرێمی کوردستان نەبینین بۆ جێبەجێکردنی پابەندی و بەرپرسیارێتی خۆیان ئەم ئۆپەراسیۆنە بەردەوام دەبێت".

٭ ڕاگەیاندراوی سکرتاریەتی کۆمەڵەی زەحمەتکێشانی کوردستان

خەڵکی ئازادیخوازی کوردستان!

دۆستان و دڵسۆزانی کۆمەڵە و بزووتنەوەی رزگاریخوازی کوردستان!
بەمجۆرە ئاگادارتان دەکەینەوە کە کاتژمێر 10:15ی سەرلەبەیانی چوارشەممە 28/9/202 ناوەندی سەرکردایەتی کۆمەڵە کرایە ئامانجی هێرشی سپای پاسداران و لە رێگای 11ی فرۆکەی خۆتەقێنەوە ناوەندی سەرکردایەتی کۆمەڵەی بۆردمان کرد.
لێرەوە ئاگادارتان دەکەینەوە کە لە ئاکامی ئەم بۆردمانانەدا سەرەرای زیانی ماڵی، دوو کەس لە هاورێیانی پێشمەرگە بریندارن کە چارەسەری سەرەتاییان بۆ کراوە و رەوانەی نەخۆشخانەکانی شاری سلێمانی کراون.

٭ ڕاگەیاندراوی حیزبی دیموکراتی کوردستان (حدکا)

حیزبی دیموکراتی کوردستانی ئێران لەبارەی بۆردوومانەکانی سوپای پاسداران بۆسەر بنکە و بارەگاکانیان راگەیێندراوێکی بڵاوکردەوە ڕایانگەیاند: "ئەوان هەرگیز ناتوانن ئیرادەی رزگاری و ئازادییخوازیی ئێمە لە ناو ببەن.
 لەبەشێکی دیکەی راگەیێندراوەکەیدا، داوای کرد کە خەڵك تووڕەیی خۆیان لە شەقامەکانی کوردستاندا پێشان بدەن و جارێکیتر بیسەلمێنن کە ئەوەی ناتوانێ کوردستان بە چۆکدا بێنێ، هێرش و سەرکوتی داوا ڕەواکانمانە. ئیرادەی ئێوە چۆک بە هەموو دیکتاتۆرێک دادێنێ".
 1ـی تشرینی یەکەمی 2022، بەرپرسانی ئێرانی بە میدیاکانی وڵاتی خۆیان ڕاگەیاند، بەر لە سێ‌ رۆژ لە ئەنجامدانی هێرشەكە سەركردایەتی پارتی و یەكێتی و پارێزگاری سلێمانی و هەولێریان ئاگادار كردوەتەوە لە ئەنجامدانی هێرشەكان.
هەروەها ئاشکراشیانکردووە، هێرشەكەی ئەم دواییە بە ئاگاداری حكومەتی هەرێمی كوردستان بووە و لە چوارچێوەی رێكەوتنێكی ئەمنیدا بووە كە پێشتر بەناوی حكومەتی هەرێمەوە لە تاران لەگەڵ رێبەر ئەحمەد، وەزیری ناوخۆی هەرێم ئیمزا كراوە.
رێبەر ئەحمەد، وەزیری ناوخۆی حكومەتی هەرێم لە ناوەراستی مانگی ئایاری ساڵی 2022 دا سەردانی تارانی كردووە و لەو سەردانەدا رێكکەوتنێكی ئەمنیی لەگەڵ ئێرانیەكان واژۆ كردوە، كە بەپێی رێكکەوتنەكە حكومەتی هەرێم دەبێت رێگە لە هەر جموجوڵ و مەترسییەك بگرێت كە لە هەولێرەوە دژی ئێران ئەنجام بدرێت، هەروەها دەستی بەرپرسانی باڵای ئێرانیش واڵا دەكات كە راستەوخۆ روبەروی هەر هێرش و مەترسیەك ببنەوە كە لە هەرێمەوە ئاراستەی ئێران بكرێت.
هەر لەو چوارچێوەیەشدا وەزیرەكەی هەرێم بەڵێنی سنورداركردنی چالاكیی حیزبە ئۆپۆزسیۆنەكانی ئێرانی دا بوو، تەنانەت بەڵێنی ئەوەش دراوە كە رێگە لە بەكارهێنانی كردەی چەكداری ئەو حیزبانە بگیرێت لە ناوچە سنورییەكانی هەرێمی كوردستانەوە.
سوپایی پاسدارانی كۆماری ئیسلامی ئێران په‌یامێكی تازه‌ی ئاڕاسته‌ی پارتی و یه‌كێتی كردووه‌ و تێیدا هه‌ڕه‌شه‌ی به‌ ئامانجگرتنی ناو شاری سلێمانی و هه‌ولێری كردووه‌.
له‌ په‌یامه‌كه‌دا سوپای پاسداران به‌ پارتی و یه‌كێتی ڕاگه‌یاندووه‌، سه‌رجه‌م ماڵی سه‌ركرده‌كانی كۆمه‌ڵه‌ و دیموكرات و بنكه‌ و باره‌گاكانیان له‌ ناو شاری هه‌ولێر و سلێمانی به‌ وردیی دیاریكراون، لەبەرئەوە ئه‌مجاره‌ له‌ڕێی موشه‌ك و درۆنی خۆته‌قێنه‌ره‌وه‌ (پهپاد انتحاری) ده‌كرێنه‌ ئامانج ئه‌گه‌ر بێت و وازنه‌هێنن له‌ هاندان و ده‌ستێوه‌ردان له‌ خۆپیشاندانه‌كانی خۆرهه‌ڵاتی كوردستان یان ڕێكخستن و مه‌فره‌زه‌ی چه‌كدار ره‌وانه‌ی ئه‌ودیو سنور بكه‌ن.
پارتى دیموكراتى كوردستان گه‌مارۆیه‌كى توند و سه‌ختی خستۆتە سه‌ر هێزه‌كانى خۆرهه‌ڵات له‌هه‌رێمى كوردستان‌ و ڕێگه‌ نادات خۆراك‌ و هێزى پشتیوانیان پێبگات، سه‌رچاوه‌یه‌كیش له‌ڕێگه‌ى شارپرێسه‌وه‌ زانیاریی گرنگ ئاشكراده‌كات.
تەنانەت هێزەکانی پارتی لەناوچەکە بۆ ماوەی یەک ڕۆژ ڕێگه‌یان نەداوە ئەو پێشمەرگانەی کە بریندارن بۆ چارەسەری پزیشکی ببرێنە نەخۆشخانەکان‌و چارەسەربکرێن، بۆیە بەناچاریی لەلایەن تیمە تەندروستیەکانی خۆیانەوە لەگوند و سەرچیاکان چارەسەرکراون و دواتر لەسەر ئاستی باڵا داوا لە پارتی کراوە ریگرییەکان هەڵبگرێت و  ئابڵوقەکە شکێنراوە".

٭ كاردانەوەی حزب‌ و كارەكتەرە سیاسییەكانی باشوری کوردستان

هێرشەكانی كۆماری ئیسلامی ئێران بۆسەر بارەگای پارتەكانی خۆرهەڵاتی كوردستان لە هەرێمی كوردستان، لەناو بەرپرس‌ و لایەنەكانی كورد دا كاردانەوەی جۆراوجۆری دروستكرد. هەندێك بەتوندی ئیدانەیان كرد، هەندێكی تر ئیدانەیان كرد، بەڵام بەهانەیان بە كۆماری ئیسلامی داوە هێرش بكات، هەندێكی تر بێدەنگییان هەڵبژاردووە بەمشێوەیە:
حکومەتی هەرێمی کوردستان لە بەیاننامەیەکدا ئیدانەی هێرشەکانی کرد و رایگەیاند: بەزاندن و پێشێلکردنی چەندبارەی سەروەریی خاکی هەرێمی کوردستان بە مووشەکباران، بە تووندی سەرکۆنە دەکەین.
ئاماژەی بەوەشكردوە، بۆردوومانکردنی بنکەکانی ئۆپۆزیسیۆن بە مووشەک لەلایەن کۆماری ئیسلامیی ئێرانەوە بە هەر پاساوێک، هەڵوێستێکی ناڕاست و بەلاڕێدابردنی رەوتی رووداوەکانە و جێگای سەرسوڕمانە. ئەم جۆرە هێرشانە، کە بەردەوام دەکرێنە سەر خاکمان و بەو هۆیەوە، خەڵکی سیڤیلیش دەبنە قوربانی، شەرمەزار دەکەین و پێویستە کۆتایی بەم دەستدرێژییانە بهێنرێت.
مەسعود بارزانی سەرۆکی پارتی دیموکراتی کوردستان وتی: "ئەوە تاوانكارییە.. هەرێمی كوردستان نەكرێت بە گۆڕەپانی یەكلاكردنەوەی ناكۆكی ناوخۆیی وڵاتانی دراوسێ".
بافڵ تاڵەبانی سەرۆکی یەکێتی نیشتیمانی کوردستان وتی: "رشتنی خوێنی خەڵكەكەمان لەبیرناچێتەوە".
لاهور شێخ جەنگیی هاوسەرۆکی دروخراوەی یەکێتی وتی: "خوای گەورە ئێمەی لەسەر ئەم خاكە داناوە و هیچ كەس‌ و لایەنێك بە كوشتن‌ و بڕین جێگەمان پێ لەق ناكات".
شاسوار عەبدولواحید سەرۆکی جوڵانەوەی نەوەی نوێ وتی: "ئیدانەی دەكەین.. ئێمە لەگەڵ خەڵكداین".
بەرهەم ساڵح سەرۆك كۆماری عێراق هیچ راگەیەندراوێكی لەبارەی هێرشەكانەوە بڵاونەكردە.
فوئاد حسێن وەزیری دەرەوەی عێراق وتی: "بە توندترین شێوە ئیدانەی دەكەین.. ئەم كارە تاكلایەنە ئاڵۆزی لەناوچەكە زیاتر دەكات".
فراكسیۆنی گۆڕان لە پەرلەمانی كوردستان وتی: "بەتوندی ئیدانە و سەركۆنەی دەكەین".
محەمەدی حاجی مەحمود سەرۆکی پارتی سۆسیالیستی کوردستان وتی: "بەنیگەرانییەوە ئەڕوانینە بۆردومانەكانی كۆماری ئیسلامی".
كۆمەڵی دادگەریی کوردستان لە ڕاگەیاندراێک دا ڕایگەیاند: ئیدانەی هەر بۆردومانێك دەكەین.. هێزە ئۆپۆزسیۆنەكانی ئێران بارەگاكانیان لەناوچەی نیشتەجێبوون دوربخەوە".
یەكگرتووی ئیسلامی کوردستان ڕیگەیاند: "ئیدانەی ئەو هێرشانە دەكەین، بەڵام دژی ئەوەین هەرێمی كوردستان بكرێت بە سەرچاوەی هەڕەشە لە وڵاتانی دراوسێ".
 سێ پارتە چەپەكە (حیزبی شیوعی کوردستان+ حیزبی زەحمەتكێشانی کوردستان+ بزوتنەوەی دیموكراتی کوردستن) ڕاگەیاندراوێکیان بڵاوکردەوە و ڕایانگەیاند کە ئیدانەی دەستدرێژی ئێران دەكەین.. حكومەتی عێراق لە ئەنجومەنی ئاسایشی نێودەوڵەتی سكاڵا تۆماربكات.
بزوتنەوەی ئیسلامی کوردستان هیچ ڕاگەیاندراوێکی بڵاونەکردەوە. 
سەرۆكایەتی هەرێم‌ و حكومەت بە راگەیەندراو ئیدانەیان كرد. سەرۆكایەتی پەرلەمان بەزارەكی ئیدانەی كرد‌ و راگەیەندراوی بڵاونەكردەوە.

(كۆنگره‌ى نه‌ته‌وه‌یی كوردستان - كه‌نه‌كه‌) كۆنگره‌یه‌كى ڕۆژنامه‌وانیان ئه‌نجامداو ڕایانگه‌یاند: "ڕژێمى كۆمارى ئیسلامى ئێران وێڕاى سه‌ركوتكردنى گه‌لانى ئێران، به‌بیانوى بونى حزبه‌كانى خۆرهه‌ڵات ته‌جاوزى سه‌ر باشورى كوردستانیش كرد، هه‌ردوو كرداره‌كه‌ى ئێران له‌ناوخۆو ده‌ره‌وه‌ ئیدانه‌ده‌كه‌ین و پشتیوانى له‌گه‌لانى بنده‌ستى ئێران ده‌كه‌ین‌ و داواش له‌حزبه‌كانى باشورى كوردستان‌ و حكومه‌تى هه‌رێم‌ و عێراق ده‌كه‌ین هه‌ڵوێستى  جدیان هه‌بێت.

٭ کاردانەوە دەرەکییەکان

٭ ئەمەریکا

هەر هەمان ڕۆژ وەزارەتی دەرەوەی ئەمریکا سەبارەت بە هێرشی ئێران بۆ سەر هەرێمی کوردستان ڕاگەیاندراێکی بڵاوکردەوە وتێیدا هاتبوو "هێرشی ئێران بۆ سەر هەرێمی کوردستان 
بە توندی پەنابردنی ئێران بۆ بەکارهێنانی موشەکی بالیستی و هێرشکردن لە رێی درۆنەوە کە دژی هەرێمی کوردستانی عێراق ئەنجامیدان ئیدانە دەکەین، چونکە پێشێلکاریەکی بێپاساوی سەروەری و خاکی عێراقە. هەروەها ئاگاداری ئەو هەواڵانەین کە باس لە زیانی گیانیی هاووڵاتیانی مەدەنی دەکەن و بە توندی ناڕەزایەتی خۆمان دەردەبڕین بەرامبەر هەر حاڵەتێکی گیان لە دەستدان لە دەرئەنجامی هێرشەکەی ئەمڕۆدا. لەگەڵ ئەوەشدا، ئیدانەی زیاتری وتەکانی حکومەتی ئێران دەکەین کە باس لە هەڕەشەی هێرشی زیاتر دەکات دژی عێراق. شان بە شانی خەڵک و حکومەتی عێراق دەوەستین دژی ئەم هێرشە بێشەرمانە بۆ سەر سەررەوەریان".

  ٭ بەریتانیا

دەیڤد هەنت، کونسوڵی گشتی بەریتانیا لە هەولێر لە تویتێک دا لەبارەی هێرشەکانەوە نوسیویەتی: "بەریتانیا ئیدانەی هێرشە بەردەوامەکانی ئێران دەکات بۆ سەر هەرێمی کوردستان کە پێشێلکارییەکی بێ پاساوی سەروەری عێراقە. بۆ گیان لەدەستدانی هاووڵاتیانی سڤیل بەداخین، بەریتانیا بەردەوامە لە پشتیوانیکردن لە سەروەری و ئاسایشی عێراق و هەرێمی کوردستان".

٭ ئەڵمانیا 

هاوکات کونسوڵخانەی گشتیی ئەڵمانیا لە هەولێر، لە تویتێکدا نوسیویەتی، "نیگەرانین لە هێرشە بەردەوامەکانی ئێران بۆ سەر هەرێمی کوردستان. بەداخەوەین بۆ قوربانیانی مەدەنیی بێتاوان. هێرشەکان پێشێلکارییەکی بێ پاساوی سەروەری و یەکپارچەیی خاکی عێراقن. داوا لە ئێران دەکەین دەستبەجێ هێرشەکان بوەستێنێت".

٭ یۆنامی

نوێنه‌رایه‌تی نه‌ته‌وه‌ یه‌كگرتووه‌كان له‌ عێراق ناسراو بە (یۆنامی)، ئیدانه‌ی تۆپبارانه‌كانی ئێران بۆ سه‌ر ناوچه‌كانی هه‌رێمی كوردستان کرد، لە پەیامەکەی یۆنامی دا هاتبوو: "یۆنامی تۆپبارانه‌كانی ئێران بۆ سه‌ر ناوچه‌ جیاوازه‌كانی هه‌رێمی كوردستان، به‌ پێشێڵكردنی ئاشكرای سه‌روه‌ری عێراق وه‌سف كرد و داوای ده‌ستبه‌جێ راگرتنی تۆپبارانه‌كان ده‌كات. دیپلۆماسیه‌تی رۆكێت، كارێكی بێباكانه‌یه‌ و ده‌رئه‌نجامه‌كانی وێرانكه‌رانه‌ ده‌بێت".

سەبارەت بە هێرشەکانی ئێران بۆسەر حیزبەکانی خۆرهەڵاتی کوردستان لە هەرێمی کوردستان، ناسر کەنعانی وتەبێژی وەزارەتی دەرەوەی ئێران لە کۆنگرەیەکی رۆژنامەوانی دا رایگەیاند: "کۆماری ئیسلامیی ئێران بە گرنگ و پێویستی دەزانێت خاکی وڵاتانی دراوسێی. بۆ ناوەندی هەڕەشەکردن لە ئێران نەگۆڕدرێن؛ ئەو بابەتە بەردەوام بە حکومەتی ناوەندیی عێراق و هەروەها حکومەت و بەرپرسانی هەرێمی کوردستان راگەیێندراوە و ئاگادارکراونەتەوە.
بەڵام بە داخەوە چەندین ساڵە لە هەندێ ناوچەی هەرێمی کوردستانی عێراق گرووپی چەکداریی جوداخواز و تیرۆریست هەن کە لەوێ بارەگا و بنکەیان هەیە و چەندین جار هەڕەشەیان لە ئاسایشی کۆماری ئیسلامیی ئێران کردووە." هەروەها وتی، لەم رۆژانەی دواییدا گفتوگۆی باشیان لەگەڵ بەرپرسانی حکومەتی عێراق و هەرێمی کوردستان هەبووە. وتیشی: "بەرپرسانی عێراق و هەرێمی کوردستان چەند بەڵێنێکیان پێداوین."

ڕۆژی 2/10/2022 لە میانەی بەشداریکردنی لە نمایشێکی سەربازی سوپایی پاسداران دا (عەلی خامنەیی) رابەری باڵای كۆماری ئیسلامی لەبارەی كوژرانی (ژینا ئەمینی)ەوە وتی: "ئەگەر بابەتی ئەو كچە گەنجەش نەبوایە بەهانەی تریان دەدۆزییەوە تاوەكو لەسەرەتای مانگی (مهر)دا نائارامیی‌ و ئاژاوە دروستبكەن. بەراشكاوی دەڵێم ئەم ئاژاوەگێڕی‌ و نائارامییانە، كاری ئەمریكا و رژێمی ساختەی ئیسرائیلە‌ و هەندێك ئێرانی ناپاكی دەرەوەی وڵاتیش یارمەتییان داون. هەندێك كەس سەبارەت بەوەی دەوترێت فڵانە رووداو كاری دوژمن بووە، هەستیارن‌ و سنگیان دەكەن بە قەڵغان بۆ بەرگریی لە رێكخراوە سیخوڕییەكانی ئەمریكا‌ و ئیسرائیل‌ و جۆرەها شیكاریی‌ و قسەی پڕ لە هەڵە دەكەن تاوەكو بڵێن كاری بیانییەكان نییە. لە جیهاندا ئاژاوەگێڕی زۆر روودەدات، لە ئەوروپا بەتایبەتی لە فەرەنسا‌ و پاریس ماوە لەدوای ماوە جارێك ئاژاوەگێڕیی روودەدات، بەڵام ئایا تائێستا رویداوە سەرۆكی ئەمریكا‌ و كۆنگرێسی ئەمریكا پشتیوانی لەو كارە ئاژاوەگێڕیانە بكەن‌ و راگەیەندراو دەربكەن. ئایا رویداوە میدیاكانی سەربە سەرمایەداری ئەمریكا و بەكرێگیراوانی ئەوان لەنمونەی هەندێك وڵاتانی ناوچەكە لەوانە سعودیە پشتیوان لە ئاژەوەگێڕییەكان لەو وڵاتانە بكەن. ئایا رویداوە ئەمریكییەكان بڵێن ئێمە ئینتەرنێت فەراهەم دەكەین بۆ ئاژاوەگێڕان بۆ ئەوەی بە ئاسانی پەیوەندی بكەن؟ بەڵام ئەم جۆرە پارێزگارییە چەندینجار لە ئێران رویداوە، چۆنە هەندێك كەس دەستی دەرەكی نابینن؟ چۆنە مرۆڤی هۆشیار هەست ناكات لەپشتی ئەم رووداوانەوە دەستی تر هەیە؟ خەمباری ئەمریكا بۆ مردنی كچێك درۆیە‌ و ئەوان بەپێچەوانەی ئەوەی لەڕواڵەتدا دەیڵێن خۆشحاڵن بەوەی بەهانەیەكیان دەستكەوتووە بۆ ئەوەی رووداو بخولقێنن. بەرپرسانی هەرسێ دەسەڵاتەكە (دەسەڵاتی یاسادانان، جێبەجێكردن، دادوەریی) خەمباری خۆیان راگەیاندووە‌ و دەسەڵاتی دادوەریی بەڵێنی داوە تا كۆتایی بەدوای بابەتەكەدا (كوژرانی ژینا ئەمینی) بڕوات تاوەكو دەستنیشان بكرێت كەمتەرخەمیی هەبووە یان نا، ئەوەی كەمتەرخەم  بووە كێیە؟ ئەمە بەواتای لێكۆڵینەوە دێت. چۆن دەبێت رێكخراوێكی گەورەی خزمەتكار بە هەڵەیەك تۆمەتبار بكرێت، هیچ لۆژیكێك لە پشتی ئەم كارەوە نییە، هیچ نییە جگە لە كاری دەزگا سیخوڕییەكان. پاڵنەری وڵاتانی دەرەكی بۆ دروستكردنی ئاژاوە و نائارامیی لە ئێران چییە؟ ئەوان دەزانن وڵات لە هەموو روویەكەوە بەرەوپێشچوون بەخۆوە دەبینێت‌ و ناتوانن بەرگەی ئەمە بگرن".

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست