شەڕی تورکیای فاشیست دژی هەرێمی کوردستان

چەند مانگێکە خاکی هەرێمی کوردستانی عیراق رووبەرووی هێرشی بەردەوامی فرۆکە درۆنەکانی تورکیای فاشیزم دەبێتەوە  بە رادەیەک رەنگە رۆژ نەبێ ناوچەیەکی هەرێم یاخود کەسایەتیەکی نەیاری ئەم دەوڵەتە بۆردومان نەکرێ .

تورکیا لەرێگەی ئەم فرۆکانەوە بە چاوساغی جاسوسەکانی لەهەرێم و تەنانەت بە رێنیشاندانی چەکدارانی پارتی تا ئێستا دەیان گەریلاو پێشمەرگەی کوردستانی تیرۆر کردووە .

 هەڵبەت لەهەر جەنگێکی عەسکەریدا جەهدی ئیستخباری رۆڵێکی گرنگی هەیە لەچاوساغیکردن بۆ هێزی دوژمن ئەویش بە دەستنیشانکردنی ئەو شوێنانەی مەبەست لێی کوشتنی کەسایەتیەکانە . لێرەشدا جاسوسەکانی پارتی رۆڵێکی گەورە دەبینن لەرێنیشاندنی فرۆکەکانی تورکیا بۆ لەناوبردنی نەیارەکانی خۆی لەناو خاکی هەرێمی کوردستان .

ئەوەی ئێستا تورکیای فاشیزم لەناو خاکی هەرێم دەیکات جەنگێکی ئاشکراو راگەیەندراوە ، چونکە شەڕ بۆ خۆی بریتیە لە لەشکرکێشی سوپا و بۆردومانی فرۆکەو تۆپباران ، ئەمانەش هەموویان ئێستا لەلایەن تورکیاوە لەناو خاکی هەرێم ئەنجامدەدرێن ، کەواتە بەبێ هیچ گومانێک هەرێمی کوردستانی عیراق ئـیستا لەناو جەنگێکی ئیقلیمدایە لەگەڵ تورکیا .

هیچ بە دووریشی نازانم ئەم شەڕە وێرانکەرەی تورکیا دژی هەرێم بگاتە ئاستی ( شەڕی بە وەکالەت ) لەلایەن هێزەکانی پارتی دیموکراتی کوردستان کە ئێستا ئاماژەکانی زۆر بە روونی بەدیار کەوتوون .

لەمڕۆژانەدا بینیمان چەکدارەکانی پارتی لەژێر ئاڵای عیراقی فیدراڵ و بەناوی پاسەوانی سنوور هەڵمەتیان بردە سەر ناوچەکانی پارتی کرێکارانی کوردستان لەناوچەکانی سیدەکان وبرادۆست ، کە ئەمەش سەرەتای شەڕی بە وەکالەتە پارتی دیموکراتی کوردستان لەبەرژەوەندی تورکیای فاشیزم دژی پەکەکە دەیکات .

هەڵبەت رێکەوتنی پەنجا ساڵەی نەوتی هەرێمی کوردستان بە ئیمزای سەرانی پارتی دیموکراتی کوردستان لەگەڵ تورکیا چەند لایەنێکی ئەمنی و هاوکاری عەسکەریشی تێدایە کە تا ئـیستا بۆ رای گشتی ئاشکرا نەبووە . گومانی تێدا نیە تورکیا لەبەرامبەر پشتگییریکردنی پارتی بۆ دزینی سامانی نەوتی هەرێم دڵنیایی لەو حزبە وەرگرتووە بۆ هاوکاری کردنی تورکیا لەشەڕی دژی پەکەکە . هەروەها پارتیش لەبەرامبەردا دڵنیایی لەتورکیا وەرگرتووە لەکاتی هەڵگییرسانی هەر ناڕەزایی و هەڕەشە لەسەر لەدەستچوونی دەسەڵاتەکەی لەهەرێم هانا بۆ تورکیا ببات پاڵپشتی بکات و نەیارەکانی پارتی لەناو بباتو پارێزگاری لەدەسەڵاتەکەی پارتی بکات . بۆیە هەموو بەرژەوەندیەکانی هەردوولا گرێدراوی یەکترن ئەمەش گەورەترین هەڕەشەیە لەسەر ئاییندەی هەرێمی کوردستان .

حکومەتی ئیتحادی بەغداش تا ئێستا ئەو هێزەی نیە بتوانێ بەرامبەر بە هەڕەشەکانی تورکیا بووەستێتەوە ، بۆیە لەدەرکردنی بەیاناتی ناڕەزایی زیاتر هیچی پێناکرێ ، بەڵام ئێستا لەرێگەی جۆرەها فشاری یاسایی ودەستووری و لەرێگەی دادگای باڵای فیدراڵی عیراق و دادگاکانی نێودەوڵەتی هەوڵی فشاری خۆی دەدات بۆ سزادانو لاوازکردنی دەسەڵاتی پارتی لەهەرێمی کوردستان .

بە کورتی ئەم رووداوانەی ئێستا لەهەرێم روو ئەدەن و هەڕەشە لە قەوارەی هەرێم ئەکەن هۆکارە سەرەکیەکەی پارتی دیموکراتی کوردستان و دەوڵەتی تورکیای فاشیزمە کە بەرژەوەندییەکانیان گرێدراوی یەکترە .

ئێستا هەرێمی کوردستان ئەو شوێنە ئارامە نیە کە خەڵک بتوانن بە ئاسایی ژیان ببەن بەڕێوە ، چونکى لەهەر ئانوساتێکدا هەموو مرۆڤێکی نیشتمانپەروەرو دژ بە داگییرکاری تورکیا رووبەرووی هەڕەشەی لەناوبردن دەبن بە درۆنی تورکی و بە چاوساغی دەزگای ئەمنی پارتی دیموکراتی کوردستان( پاراستن ) کە پەیوەندییەکی زۆر بەهێزی لەگەڵ دەزگای موخابەراتی تورکیا ( میت ) هەیە و پێکەوە کار دەکەن بۆ لەناوبردنی هەر نەیارێکی تورکیای فاشیزم لەناو خاکی هەرێم .