دژاتی د ناڤبه‌را نێچیرڤان بارزانی و مه‌سعوود بارزانی دا
Friday, 26/03/2010, 12:00
1728 بینراوە
نه تشته‌کێ ڤه‌شارتیه کو دژاتیه‌کا دژوار د ناڤبه‌را نێچیرڤان بارزانی و مه‌سعوود بارزانی دا هه‌یه. ئه‌ڤ دژاتیا وان ژی ل سه‌ر کورسیکێ یه. هه‌رچه‌ند هه‌ر دوکا هه‌تا نۆکه به‌رگه‌ڕهان دکر کو ئه‌ڤ دژاتی و هه‌ڤڕکاتیا وان ئاشکرا نه‌بت ، به‌لێ یا گه‌هشتی هندێ کو کون ژ پاگه‌یی مه‌زنتر لێ هاتیه و ئێدی ب چ ئاوایا نایێت ڤه‌شارتن.
ئه‌ڤ دژاتی نه یا ڤان چه‌ند ساله‌کا یه ، لێ به‌لێ که‌ڤنه و ڤه‌دگه‌ڕت بۆ سه‌ر زه‌مانێ ئیدریس بارزانی ، ده‌مێ کو هه‌ڤڕکاتی د ناڤبه‌را وی و مه‌سعوود بارزانی دا ل سه‌ر ده‌ستهه‌لاتێ په‌یدا بوویه ، کا کی ژ وان پشتی بابێ خۆ مه‌لا مسگه‌فایی دێ بت سه‌رۆکێ پارتی ؟ هندێ ئیدریس بوو ، خوه ددیت کو برایێ مه‌زن و سکرتێرێ بابێ خۆ بوو ، له‌وا دڤیا کو ئه‌و جهێ بابێ خۆ بگرت. لێ هه‌رچه‌ند مه‌سعوود نه ژ ئیدریسی زیره‌کتر بوو ، به‌لێ پا واسگه‌کا گه‌له‌ك بهێز هه‌بوو ، ئه‌و ژی ده‌یکا وی بوو.
ژ نشکه‌کێ ڤه ، ئیدریسی هند خۆ دیت کو ژده‌رڤه‌یی مه‌یدانێ یه و مه‌سعوود بوو میراتخوه‌رێ بابێ خوه و بوو سه‌رۆکێ پارتی و ئیدریس بوو پالێ پووشی ! ئیدریسی ڤیا کو ب رێکه‌کا دی ئه‌ڤی مافێ خوه یێ خواری ب ده‌ست خوه ڤه بینت ، ئه‌و ژی ب رێکا پارتی ، له‌وا ژ دل و جان د ناڤ رێزێن پارتی دا دخه‌بتی کو ده‌ستێ خوه ده‌ینت سه‌ر پارتی و ب ڤێ رێکێ ده‌ستهه‌لاتا کو ژ ده‌ست چووبوو ، ڤه‌گه‌ڕینت و مه‌سعوودی بدت ره‌خه‌کی. به‌لێ پا مرنا ژنشکه‌کێ ڤه و ب گومان رێ نه دایێ.
بڕاستی مرنا ئیدریس بارزانی یا ژنشکه‌کێ ڤه ، ژ وێ رۆژی و هه‌تا ئه‌ڤرۆ جهێ گۆمانێ یه ، ژبه‌ر کو ل رۆژا کو تێ دا مری ژ گه‌هرانێ هاتبوو. ئیڤاری گه‌هشت و پشتی رۆژئاڤا بوون و شیڤ خوارنێ ل مالا مه‌سعوود بارزانی ، گۆتن کو ئیدریس بارزانی مر ؟! که‌نگی گه‌هشت و که‌نگی مر ؟! وه‌ختێ که‌تی ژی ئێکسه‌ر نه برن نه‌خۆشخانێ ، به‌لێ هاتن د دیڤ برینپێچێ مه‌کته‌با سیاسی را کو ببن سه‌ر که‌له‌خێ وی کو چاره بکت ؟! ئه‌رێ ما شۆلێن وه‌سا یێ برینپێچینه یان یێن هندێ نه کو ببن نه‌خۆشخانێ و نۆشدارێن پسپۆر چاره بکن ؟ ئه‌رێ بۆ چی ژ سه‌عه‌ته‌کێ پتر گیرۆ کرن و نه برن نه‌خۆشخانێ ل باژێڕێ ئۆرمیێ ؟! باژێڕ چارێکه‌کا سه‌عه‌تێ ب گرمبێلێ ژ مالا مه‌سعوود بارزانی دوور بوو. بۆچی هه‌تا کو مر پاشێ برن ؟! وه‌کی دیار ده‌مێ کو ل سه‌عه‌ت هه‌شتێ شه‌ڤێ ل برینپێچێ مه‌کته‌ب سیاسی دگه‌ڕان کو ببن سه‌ر گه‌رمێ ئیدریس بارزانی ، هه‌ر بۆ هندێ بوو کو بێژن ئیدریس بارزانی نه‌ساخ بوو ! ژبلی ڤێ چه‌ندێ ژی ، ئه‌و چه‌ند وه‌خته‌کێ کێم بوو کو مه‌سعوود چووبوو سه‌ره‌دانا له‌قا ئێك یا پارتی ، دا کو چ توهمه نه چن سه‌ر.
ژ ره‌خه‌کێ دی ڤه ، رۆژا کو ئیدریس بارزانی مری ، ئاخفتن د ناڤ خه‌لکی دا به‌لاڤ بوو کو ده‌سته‌ك ل پشت مرنا وی هه‌بوو. ئو ده‌مێ کو مرۆڤ کاودانێن مرنا وی دده‌ینت به‌ر چاڤێن خوه ، ئه‌و باوه‌ری چێ دبت کو راستیه‌ك بۆ ئاخفتنا خه‌لکی هه‌بوو و ئه‌و ئاخفتن نه ژ قه‌ستی هاتبوو کرن.
ڤێجا نه دووره کو ئه‌ڤ ئاخفتن گه‌هشتبت گوهێ نێچیرڤان بارزانی ژی ، ئو دڤێت کو تۆلا بابێ خوه ڤه‌کت و مافێ وی یێ کو هاتیه خوارن ، جاره‌کا دی بزڤڕینت ، ڤێجا ئه‌ڤه بوویه سه‌ده‌ما په‌یدابوونا دژاتی و هه‌ڤڕکاتیێ د ناڤبه‌را وی مه‌سعوودی دا.
مه‌سعوود بارزانی ژ لایێ خۆ ڤه به‌رگه‌ڕها کو ڤێ دژاتیێ نه‌هێلت. پشتی هزره‌کا دوور و درێژ گه‌هشته وێ باوه‌ریێ کو باشترین چاره ئه‌وه کو کچا خۆ بدت نێچیریڤانی ، به‌لکی ب ڤێ چه‌ندێ بێ ده‌نگ ببت !
لێ به‌لێ ڤی ده‌رمانی ده‌رد ده‌رمان نه‌کر ، ژبه‌ر کو نێچیرڤان رژد بوو ل سه‌ر هه‌لویستێ خوه و بۆ خوه گه‌له‌ك هه‌ڤال د ناڤ رێزێن پارتی دا چێ کرنه ، نه‌خاسمه ل جهێن به‌رپسیاریێ ، له‌وا مه‌سعوودی ده‌ست بر به‌رگه‌ڕهانه‌کا دی.
به‌رگه‌ڕهانا مه‌سعوودی یا ڤێ جارێ ئه‌و بوو کو کوڕێ خوه مه‌سروور وه‌کی به‌ڤله‌کێ بۆ نێچیرڤانی ئینا مه‌یدانێ و هه‌می ده‌زگه‌هێن ئاسایش و پاراستن و تایبه‌تی و هه‌می ده‌زگه‌هێن سیخوڕا کرن د ده‌ستێ وی دا کو ببت سکره‌ك ل پێشیا نێچیرڤانی و ته‌ڤگه‌رێن وی.
مه‌سعوود بارزانی بۆ پرسێن موخابه‌راتێ شه‌هره‌زایه ، ژبه‌ر کو بابێ وی ل ده‌مێ شۆڕه‌شا ئه‌یلۆلێ ئه‌و کر بوو به‌رپرسێ پاراستنێ. ئو هه‌ر ب ڤێ رێکێ شیا بوو کو به‌ڕکێ ژ بن پیێن ئیدریسی بکێشت.
پسیار ل ڤێرێ ئه‌وه ، ئه‌رێ مه‌سروورێ کوڕێ مه‌سعوود بارزانی هند شه‌هره‌زا یه کو بشێت هه‌ڤسارێ نێچیرڤان بارزانی بگرت و نه‌هێلت کو لۆت بدت ؟
ئه‌رێ ئه‌و ژی دێ شێت نێچیرڤان بارزانی ژ پێشیا خۆ راکت هه‌روه‌کی بابێ وی ئیدریس بارزانی ژ پێشیا خۆ راکری و پاشی هنارتیه گۆڕێ ؟
ئه‌م غارێ ل گه‌ل وه‌ختی ناکین. بلا ئه‌و خه‌م بۆ وی ده‌می بت. یان نێچیرڤان دێ تۆلا بابێ خوه ڤه‌کت و مافێ وی یێ کو هاتیه خوارن ، دێ ڤه‌گه‌ڕینت ، یان ژی مه‌سروور دێ نێچیرڤانی ب رێکا بابێ وی ڤه هنێرت ؟
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
