بەسەرهاتى من و وەزیر و ژنەكە....

Sunday, 19/01/2014, 12:00

1636 بینراوە

دنیا وای لێهاتووە ئەگەر بمەوێ هەنجەتت پێبگرم، بیست و یەك پاساو بۆ ئەو هەنجەتەم دەدۆزمەوە بێ ئەوەى هیچ لەو پاساوانە لەجێی خۆیانبن.

ئێوارەیەكیان دایكى منداڵان بە پەرۆشەوە پێى وتم:(پیاوەكە خۆت لەبەر ئاوێنە دیوە، چیت لێهاتووە؟ بڕوام پێبكە لەناخەوە بۆ حاڵت پەرێشانم و وەكو بەو شێوەیەت دەبینم گریانم بۆت دێ.. فەرموو خۆت ببینە بەقەد چنگێكت لێماوەتەوە، بێ ئەوەى بەخۆت بزانی ڕۆژ لەدوای ڕۆژ لە كورتی دەدەی.. ئەو قسەیە زۆر ڕاستە كە دەڵێ: كرێكارى پیاو لەبن دێنێ، لەشى مرۆڤ دادەڕزێنێ و دونیاش ئەوەندە ناهێنێَ خۆتی بۆ بكەیتە گیسكی قوربانی و خۆتی بۆ وشك بكەیتەوە..بۆچى مشوورێك لەخۆت ناخۆی بچی وەكو ئەو خەڵكە عەریزەیەك بدەى؟ بزانە ئەوە خوایە قەت لێرەو لەوێ حكومەت زگی پێتناسوتێ لە سەر ئیشێك، لە شوێنێكت دامەزرێنێ؟).

قسەكەیم بێ بیركردنەوە، بەبێ كوڵاندن چووە ئەقڵ و ڕەزامەندی خۆمم لەو ڕووەوە نیشاندا: ( قسەكەت زۆر تەواوە، دوو ئەقڵ لە ئەقڵێك باشترە، قسەكەت لێوەردەگرم و لێتیدەكڕم، قەت لەسبەی زووتر نییە دەچم داواكارییەك دەنووسم و پێشكەشی دەكەم، لەوەشدا ئەگەر قسمەت هەڵسا و هەڵقەنا، بێ دوودڵی كارەكەم بۆ ڕایی دەبێ و لە سەر ئیشێك دادەمەزرێم).

ڕۆژى پاشتر چوومە لای عەریزەنووسێك و لەچەند دێڕێكا داواكاریەكم نووسى، هەرچەندە سەرەتا بە گومانەوە بۆ ئەو كارە چوومە پێش، لەوەشدا ناهەقم نەبوو گومان ببەم، هەزاران گومان، چونكەدامەزراندن لەم مەملەكەتەى ئێمە گشتى بووەتە واسیتەو واسیتەكارى، تۆ ئەگەر یەكێك نەناسى و لەتەكدا حزبێكی باڵا دەست پشتگیریت نەكا، با هەر زیرەكبی و بەهرەت تێدابێ ، چما سەریشت لە بەردى ئەلحەد بدەی، كەس ڕێى حەمامت نیشاندەدا؟ كەس داتدەمەزرێنێ؟.

كاتێك بەخۆ و دەستى داواكارییەوە سەرم بەو دایەرە داگرت كە بۆى ڕۆیشتم، لە یەكەم ژوورى پێشەوە بێ لە دەرگادان ملمنا، منێكی فوول عەشایەر نازانم و فێر نەكراوم بۆ چوونە ئەو شوێنانە بە ئەدەبەوە لەدەرگا بدەم و هەر بە ئەدەبەوە دەرگاكە بخەمە سەر گازەرای پشت..چ ببینم؟ تەماشا دەكەم ئەوە كوڕو كچێكى تازە هەڵچوو لەتەك یەك لە كۆمپیوتەرەكانى ئەو ژوورە تەبگیان كردووە، كوڕەى بەستەزمان بە ئیشتیاوە دەمى ناوەتە دەمى و عەیب نەبى زۆر بێئەدەبانە دەستى بە شوێنە قەدەغەكراوەكانى دادێنا... ئەوەیە شەڕە و یەخەی گرتووی ئەگەر نەیكەی خوا دەتگرێ، بەو دیمەنە وەكو شێر مرخە مرخێكم لێوە هات، مرخە مرخێك چۆن شێر دادەڕسێ و خۆی بۆ پەلاماردانی نێچیرێك ئامادە دەكات، وا هاتە سەرم حەیا و حەوسەتیان ببەم، سفت و سۆیان بشكێنم و ئەو دایەرەیان بەسەر وەركەم، كارێكی وایان پێبكم با بە دەواری شڕی نەكردبێ، كەچی هۆپێكم لەخۆم زانی و وەكو ئاگری ئاو پێداكراوم لێهات، زوو سارد بوومەوە و دانم بەخۆما گرت، لە دەروونەوە وتم: ئاگرە سوورە، لەمن دوورە.. خۆ من نەبوومەتە سەگی هار بچم بەگژیانا، بەس ئەوەندە دەڵێم: دەك ئافەرین بۆ ئەو دایك و باوكەی منداڵەكەى ئاوا پەروەردە دەكات.

لە جێوە تەریق بوومەوە، بوومە دڵۆپێ ئاو، توند دەستم بە چاومەوە گرت و بەدەنگێكى كرخنەوە زمانم گەڕاند:(ئیستەغفیروڵڵا ، ببوورن خەجاڵەت دەكێشم وا بەم ناوەختە هاتم).

هەردووكیان شڵەژان، كوڕەكە بەپەلە وەكو خێرایی بروسكەى هەور ئاسا، خۆى لە كچەكە دوورخستەوە و بەهەناسەى سوارەوە وتی: (دە.. دە..دەى وا بزانە هیچ نەبووە، ئەمركە قوربان، با خزمەتتكەم).

لێی چوومە پێش و لەبەردەم مێزەكەیدا وەستام، چاوێكی بە مەغزام تێبڕی و بە دەستێكی لەرزۆكەوە عەریزەكەم بۆى ڕاگرت، ئەویش بە هەناسەی سوارەوە عەریزەكەی لەدەست وەرگرتم و بە دیقەتەوە كەوتە خوێندنەوەى...كە لە خوێندنەوەى بۆوە، كاتێ عەریزەكەى بۆ گەڕاندمەوە، بەسەرو زمانێكی شیرینەوە دەتوت شەكرە و نوقڵی لێدەبارێ، پێیوتم:(براگیان بەو خوایە ئەو ئیشەى تۆ پەیوەندى بەمن و بەم ژوورەوە نییە دەنە بەسەرچاو، بەسەرسەر هیچ تڕومنەتێكی تێدا نەبوو، بەس تۆ دەزانی چیم بۆبكە؟ بڕۆ عەریزەكەت ببە ئەو ژوورەى تەنیشتمان، بزانە ئەوان چى دەڵێن ؟ ڕێنماییەكان زیاتر لاى ئەوانە و هەر شتێك پەیوەندى بەم ژوورەوە بوو، یەكسەر وەرەوە لای برای بچووكت ،لە خزمەتام، هەقت بەسەر هیچەوە نەبێ، باشە براكەم؟).

* من مەمنوونم.

دەڵێن: قسەى خۆش لەبەهەشتەوە هاتووە.. پیاو ئەگەر ڕووى خۆش بوو ئیشێكت كەوتەلای، ئەگەر ئیشەكەیشی بۆت نەكرد، مادام قسەى خۆشە، هیچت لەبەردڵ نابێتە گرێ و گۆڵ، هیچ لەبەردڵ ناگری.سوپاسی ئەو هەڵوێستەیم كردو بۆ ئەم ژوورەى تەنیشتیان پێمهەڵێنا ، دیسان بۆ ئەوێش بێ لە دەرگادان ملم نا، ئەوجارەیان چ ببینم؟ هەر خۆزگەم بەو ژوورەیتر، وەك تەماشا دەكەم ئەوە كوڕێك دەستى خستۆتە نێو بەرۆكى كچێك و گەمە بە هەردوو شەمامەى دەكات...دەوەرە بەو بەیانییە تووشی چی هاتووم؟ سەرم بادا، دەستم بە دەممەوە گرت و نەرمە كۆخەیەكم بۆ دەرپەڕاندن:(ئیستەغفیروڵڵا، ببوورن خەجاڵەت دەكێشم، وا بەم ناوەختە هاتم).

كوڕەى ئاگر تێبەربوو، لە جێی خۆی بووە بتێكی بێگیان، ڕەنگێكى هێنا و برد، ڕەنگى دەم و چاوى وەكو پەلكە پیاز زەرد هەڵگەڕا، بەدەنگێكى پچڕ پچڕەوە دەمی هەڵێنا:(د..دە..دە..دەى، دەى وا بزانە هیچ نەبووە، ئەمركە قوربان، با خزمەتتكەم).

بە دەستێكی لەرزۆكەوە لێی چوومە پێش و عەریزەكەم بۆى ڕاگرت، ئەویش عەریزەكەی لەدەست وەرگرتم، كە چاویلكە پزیشكیەكەى بەر باخەڵی دەرێنا و نایە چاوی، كەوتە خوێندنەوەی دێڕ بە دێڕی داواكاریەكە و لەو سەروبەندەدا ژنێكى كامڵى پڕو بەخۆ پەیدابوو، كوڕەكە چونكە بەو هاتنە كت و پڕەی من بێ لەدەرگەدان و بەسەر ئەو تەشكیلاتەی بەسەریان هات، كێچی بێزاری فوول و میزاجی تەواو تێكچووبوو، لەگەڵ ئەوەشدا نەیوێرا دەرهەق بەمن لاتجمێ و قسەیەكی ناشیرین بكات، یا كف و كوڵی خۆی بەمن دابمركێنێتەوە، سەری هەڵبڕی و كە چاوى بە ژنەكە زاخاودا، بۆ تەقینەوەی ناخی خۆی، لە دوورەوە دەنگی دایێ:(هاااااااا پیرێژن، خێرە بەم بەیانییە زووە هێشتا خێرو شەڕ دابەشنەكراوە، لێرە چی دەكەی؟ ناكا تۆش بۆ دامەزراندن هاتبێتیە ئێرە؟).

ژنەكە بە بیستنی وشەی(پیرێژن) چ خەنجەرێكت لێدایە، چ ئەو قسەیەت پێبوتبایە وەكو یەك وابوو، لچێكى لێ هەڵێناو چاوێكی پڕ تووڕەیی دایێ، كە دەستی هەڕەشەی لێ ڕاشەقاند، بە ڕق و قینەوە زمانى گەڕاند:(سەگ بە سەگاتی خۆی بە ژن ناوەڕێ، ئەوجارە ئەو گووەت خوارد، هەڵنەخەڵەتێی جارێكیتر ئەو گووە نەخۆیەوە بەمن بڵێی پیرێژن، دایكت پیرێژنە.. تۆ كێى؟ناتناسم؟ بۆ چما لەجێى مودیرەكەشت لێرەم دانێن، ئەو ئیشە دەكەم؟).

كوڕەكە بەو قسانە تەقەی سەری هات، خۆی تێكنەدا، هەر بۆ فشقیات، بەدەم پێكەنینەوە پێیوت:(ئەى كەوایە بۆ ناچیە بەغدا ببى بە وەزیر؟).

ژنەكە هێندەى دیكە ڕقى لێداگرت،چاوی لێ سووركردەوە و بەناوچەوانێكی گرژ و مۆنەوە پێى وت:(چما شار بێحاكمە ئەو قسە هەلەق و بەلەق و قۆڕانە دەكەیت؟ بەقوربانی خوایبم، دەوەرە كێ مۆزەفە؟ فەرموو پارە لەم حوكمەتە وەردەگرێ و كەچی گاڵتەشی پێدەكا، من بەس ئەوەندەت پێدەڵێم: تا سەرت ڕەحەتبێ، ئاگات لە زمانتبێ و زمانی خۆت بگرە، ئەو زمانەت سەرت دەتخوا، سەرت بە فەتارەت دەبا، ئەوە من ڕۆیشتم و دواتر خۆت دەبینیەوە).

ژنەكە ئاگری دەكردەوە، بە تووڕەیی ڕووى وەرچەرخاند، پشتی تێكرد و چووە دەرەوە، كوڕەكە دەتوت هەستی كرد هەڵەیەكی گەورەی كردووە و نەدەبوو بەو زمانە زبرە بدوێ، نەختێ حەپەسا، ئاهێكى قووڵى هەڵكێشا، كە دووبارە چاوێكى دیكەى بە عەریزەكەدا گێڕایەوە، سەری هەڵبڕی و وتی:(قوربان ئەگەر زەحمەت نەبێ ئەو عەریزە ببە لاى مودیر عام، ئەگەر ئەو موافەقەى لەسەر كرد، بینەوە لاى برات وابێ دەم ودەست نووسراوت بۆ وەزارەت بۆ بكەم).

سوپاسیم كرد...وردە وردە بەرەو ژووری مودیرعام ڕۆیشتم، لەوێش دواى كەمێك چاوەڕوانى لە ژووری سكرتێرەكەیدا، ئەوجا ڕێیاندا بچمە لاى...كە چوومە ژوورەوە، دیقەتمدا و سەیرمكرد ئەوە ئەو ژنە كامڵەى ئەو بەیانییە لەگەڵ ئەو كوڕەی كەوتبوونە بەر یەك، وا لەتەنیشت مودیر عام خانم و خاتوون دانیشتووە و قاچى ناوەتە سەریەك و بە پۆزەوە تەماشاى ئەو كوڕە دەكات كە پێى وتبوو:(ئەى كە وایە بۆ ناچیە بەغدا ببى بە وەزیر؟).

ئەوەی من لە بنكڕ و دوا دواكەی پێڕاگەیشتم ئەوەبوو مودیر عامەكە بە كوڕەكەى وت:(ئەوەندە چیڕەی مەدەیێ هەی چیڕە درێژ، دەمت داخە، یەك قسەت لێوەرناگرم و لەسەر ئەو ناماقوڵییەى كردووتە، چونكە هیچ شتێك لەنانبڕین ناخۆشتر نییە، قەینا فەسڵت ناكەم، بەڵام تۆ بەكەڵكى ئێرە نایەى، ئەمڕۆ هیچ، سبەى دێیەوە فەرمانى گواستنەوەت وەردەگرى و دەچییە ئەوێ، دەى بۆ دەرەوە).

كوڕەكە دەتوت گیانی لەبەردا نییە، بێ ئەوەى ورتەى لە دەمەوە دەرچێ، بە هێواشى ڕووی وەرگێڕا و چووە دەرەوە.

لەو سەروحەدە كابرایەكی پووت و چرچ و ڕەقەڵەى نە زۆر كورت و نە زۆر درێژ بە ژووركەوت و لە پێش منەوە عەریزەیەكی بە دەستەوە بوو، بە هێواشی لەبەردەم مودیر عامی دانا و بە نەزاكەتەوە وتى:(قوربان كاك(......)سڵاو و ریَِزى بۆت هەبوو، وتى: چی دەوێ، بۆى بكە).

بە بیستنى وشەى (كاك......) لەبەرى هەڵسا، وێڕای تەوقەو چاك و چۆنی، بە گەرمییەوە فەرمووى دانیشتنى لێكرد، ئەوجا زەنگی لێدا و بانگى كرد قاوەیان بۆ بێ.. كاتێكیش ڕووى لەمن كرد:(كاكە فەرموو).

بەدەم دەربڕینی: (ساحێب فەرمووبی). عەریزەكەم خستە پێشى، ئەویش دەستی گەیاندێ، چاوێكى خێراى پێداگێڕاو عەریزەكەى بۆ گەڕاندمەوە:(بابە دامەزراندن نییە، خواحافیزت بێ).

قسە لە قوڕگم گیربوو، هیچم بۆ نەوترا دەریببڕم، بە عێدزى ڕووم وەرگێڕا، هەنگاومنا بچمە دەرەوە، پڕتاو هەڵوەستەیەكم كرد، بیرۆكەیەكم وەكو چەخماخە بە خەیاڵ داهات:(دەى چى دەبێ خۆ نامكوژێ ئەگەر درۆیەكی زل و زەبەلاحی بۆ بكەم؟ دنیا واى لێهاوە بتەوێ ئیشێكت لەبەر بڕوا، دەبێ پاساو بێنیەوە، پاساوهێنانەوە، واتە: درۆ..دەبا بچمەوە لای، وەكو ئەو كابرایە لەخۆمەوە بڵێم (كاك.....) سڵاو و ڕێزى بۆت هەبوو وتى: چى دەوێ، بۆى بكە).

نەختێ خۆم گنخاند تا ئیشی كابرای ڕواند، كاتێ كابرا هەڵسا و ڕۆیشت، بەئەسپایی گەڕامەوە لاى و عەریزەكەم خستەوە پێش دەمى، كە چاوی دامێ و بە توڕەییەوە وتى:(كاكە بۆ تێناگەى؟من دەڵێم نێرە و تۆش دەڵێی بیدۆشە.. من نەموت دامەزراندن نییە؟).

بەهەستێكی پڕ لە زەلیلیەوە وتم: (قوربان حەزمكرد بەتەنیا قسەت لەگەڵ بكەم، كاك(.....)سڵاو و ڕێزى هەبوو، وتى: چى دەوێ، بۆى بكە).

بەو چەند وشەیە، جەنابی مودیر عام وەكو ئاگرى ئاو پێداكراوى لێهات، فس بۆوە، لەبەرم هەڵسا، چ جاى تەوقەو چاك و چۆنى و چەند جار داوای لێبوردن و بەخشین، دەستی دانیشتنی بۆ درێژكردم و وتى :(فەرموو فەرموو قوربان، خەجاڵەت دەكێشم بۆ یەكسەر خۆت نەناساند و نەتوت ئەو منى ناردوە، یا خوا بەخێربێی سەرسەر و سەرچاوان).

دەستى بە پلاكی زەنگەكەوەنا، بانگیكرد قاوەیان لەبەر دەمم دانا.. كە وتى:(ئەمركە با خزمەتتكەم، حەزت لە كوێیە دەوامكەى؟).

هەر بۆ فشە وتم:(حەزم لاى وەزیرە).

وتی: (بەسەرچاو.. وەزیر، وەزیر).

هامشێكى سێ دێڕی لەسەر عەریزەكەم نووسى و بە سكرتێرەكەى ڕاگەیاند دەم و دەست، بێ دواكەوتن نووسراوەكە تەواوكەن....پێنج دەقەى نەبرد نووسراوەكەم تەواوكرا و وەرمگرتەوەو بردمە وەزارەت، لەوێش هێندەى نەبرد فەرمانیان پێ دەركرد، بوومە چایچى وەزیر...واى لەوێ بەقەد مودیر عامێك دەستم دەڕۆیشت، بە دەیان كەس بۆ واسیتەو واسیتەكارى سەریان پێدادەگرتم و ڕوویان لێدەنام، شەو نەبوو ئەم و ئەو نێیەتە سەردانیم، وەلێ دواجار ژنێكی ساقیتی شۆخ و شەنگ سەرى بەفەتارەتدام و سەریخواردم، كاتێ هاتە وەزارەت و سكرتێرەكە پێى وت:(ببوورە جەنابى وەزیر تەلەفۆنى لەگەڵە ئەگەر نەختێ چاوەڕوانكەی).

بە لەخۆبایی و پۆزێكەوە وتى :(وەزیر كێیە؟ ئێستا دەچم لە پێش چاوت گوێى دەگرم و لەسەر كورسییەكەشى لادەدەم، تێگەیشتی؟).بەڕاستی زمانێكی تیژی وەكو چەقۆی هەبوو، زۆر بێباك ، هیچ حسێبی بۆ سكرتێرەكە نەكرد و بێڕوخسەت وەرگرتن چووە ژوورەوە، منیش وەكو پیشەكەم، چووم چایەكم لەبەر دەمى دانا، گوێم لێبوو بە وەزیرى دەوت:(ئەوجارەیان یەكێكى فستەقیم بۆت دۆزیوەتەوە، كەى دەڵێى بۆتى بێنم؟ بەڵام دەبێ لە شوێنێ دایبمەزرێنى و دەوام نەكات).

جەنابى وەزیریش پێیوت:(تۆ بیهێنە با خەمى دەوامى نەبێت، بایی هێندە جێگە هەیە وەكو پەنا دیوار لەشوێنێكی دانێم).

لە نیوەڕۆیەكى درەنگدا، دەوام بەرەو تەواو بوون دەچوو، هەر ئەو ژنە شۆخ و شەنگە هاتە لاى وەزیر، چام بۆى دانا و قاوەم دایێ، وەزیر بە هەڵپەیەكەوە بەمنى وت بچم هێندێ مۆز و سێوی بۆ بكڕم وابێ لەگەڵ خۆیدا بیباتەوە ماڵ..منیش لەسەر ئاو و ئاگر بووم تا زوو بچمەوە ماڵ، خۆم بگۆڕم و بەو تازیەیە ڕابگەم كە لە شارۆچكەی(كفری) دواڕۆژى بوو.. بە پەلە شتەكانم لە دوكانێكی ئەو نزیكانە كڕى و هەر بە ڕاكردن گەڕامەوە وەزارەت، بە پێی سروشتى ئیشەكەشم چونكە چایچی بووم، بەردەوام پێیەكم لە ژوورى وەزیرو ئەوەى تر لە دەرەوە بوو، بۆیە بۆ من وەكو خەڵكیتر لە دەرگادان نەبوو، كاتێك شتەكانم لە ژوورى سكرتێرەكە دانا و ویستم لەوێوە بچمەوە لای جەنابی وەزیر، چ ببینم؟وەكو تەماشا دەكەم ئەوە جەنابیان ئەو ژنەى لەسەر تاقمى قەنەفە درێژ كردووەوكەوتۆتە سەرى، توند چاوى خۆم گرت و وتم:(ئیستەغفیروڵڵا، ببوورن خەجاڵەت دەكێشم). بە ڕاكردن چوومە دەرەوە... چارەگێكى نەبرد، زەنگێكى بۆ لێدام، چوومە ژوورەوە، وەلێ ژنەكە لە دەرگاكەی دیكەوە ڕۆیشتبوو..جەنابی وەزیر نەرمی نواند و زۆر بە شێنەیى پێى وتم:(حەز ناكەم كەس بەم كەین و بەینە بزانێ، جا بەینى خۆمانبێ ئەو ژنە تازە لە دەرەوەی وڵات گەڕاوەتەوە، پیاوەكەى بە نیازە تەڵاقیدات، منیش چونكە بێ حەد خۆشم دەوێ، نیازم و ایە كەى تەڵاقیدا، ئەو وەختە لەخۆمى مارەكەم و بیهێنم).

منیش هاتە سەر زمانم تا پێی بڵێم:(قوربان هەر تۆ سواریبی لە یەكێكى تر باشترە). باشبوو زوو قسەكەم قوتدایەوە، وتم:(قوربان هەر تۆ بیهێنى لە یەكێكى تر باشترە).

لەو ڕۆژەوە وەزیر لێم بووە قیڕ و بنێشت، لێمكەوتە بۆسە تا بەهەر پاساوێكەوەبێت هەنجەتم پێ بگرێ و لەو شوێنەم نەهێڵێ و دەرمكات.. بەیانییەكیان كاتێك هاتە ژوورەوە، یەكسەر بانگى كردم و وتى:(ئەو هەمووە تۆزە لەسەر ئەو مێزە چییە ؟ بۆچی سەر ئەو مێزەت بەجوانی پاك نەكردۆتەوە؟).

وتم:(قوربان جوان سەیركە دەڵێی ئاوێنەیە، ئەوەى تۆزە لەسەر ئەو مێزە نایبینى، ئەو بەیانییە جوان جوان بە پەڕۆ و موعجیزەم سڕیوەتەوە).

دەتوت دەمێكە لە چاوەڕوانى قسەیەكى وادایە، لەجێوە ڕاستبۆوە ، بە تووڕەیى بەسەرمیدا نەڕاند و وتى:(وەى وەى، بەڕاستی تەواومانكرد... چما من درۆ دەكەم؟ ئەمن درۆزنم؟ بەخوای چاویشت كز بووە و كەڵكی ئێرەت نەماوە، ئەوەیە: ڕێوی دەمی نەدەگەیشە ترێ، دەیوت: ترشە).

بۆ دامركاندنەوەی كوڵی خۆی، تا مورتاحبێ و چیتر چاوی بە چاوم نەكەوێتەوە، هەر ئەو ڕۆژە بە نووسراویێك منى بۆ یەكێك لە دایەرەكانى سەر بەو وەزارەتە گواستەوە.