مه‌سعوود بارزانی و کارێ تیرۆرستیێ
Tuesday, 11/05/2010, 12:00
1617 بینراوە
مه‌سعوود بارزانی و کارێ تیرۆرستیێ
زێره‌ڤان
ئه‌گه‌ر که‌سه‌ك به‌رپه‌ڕێن دیرۆکا ژیانا مه‌سعوود بارزانی یا بۆری ڤه‌دت و به‌رێ خۆ بدتێ و بخوینت ، راستیا ڤی کابرایی بۆ وی باش دێ دیار بت و دێ زانت کا چ ماله ! ئو دێ زانت کو هه‌ر کاره‌کێ تیرۆرستی یێ کو ل کوردستانێ دژی خه‌باتکه‌ر و راستیبێژا تێت کرن ، ده‌ستێ مه‌سعوود بارزانی د ناڤ دا یه.
ئه‌م هه‌می باش دزانین کو مه‌سعوود ل ده‌مێ شۆڕه‌شا ئه‌یلۆلێ به‌رپرسێ (پاراستن) ێ بوو. وی و هه‌می سیخوڕێن وی ده‌زگه‌هێ ناڤنۆ (سیئ السمعه) ل به‌ر ده‌ستێ مۆسادا ئیسرائیلێ ده‌رس خواندنه و هه‌ر ئێك ژ وان چه‌ند جاره‌کا چوو بوو ئیسرائیلێ کو ده‌رسێن موخابه‌رات و سیخوڕیێ ل وێرێ فێر ببن.
وه‌کی تێت زانین کو موخابه‌رات و سیخوڕی پیسترین کاره کو که‌سه‌ك پێ رادبت و هه‌ر که‌سێ کو که‌ت تۆڕا وێ ژ هه‌می تشتی تێت شووشتن. تیرۆرکرن و بێ به‌ختی و بێ وژدانی و بێ سنجی بنسترێن (أساس) کارێ سیخوڕیێ یێن ئێکجار گرنگن. ئو ژبۆ ب ده‌ست ڤه ئینانا ئارمانجا خۆ ، ره‌شه‌کێن وێ به‌رهه‌ڤن کو که‌ر کاره‌کی بکن ، هه‌تا ئه‌گه‌ر ب کورشتن و ژناڤ برنا ب سه‌دان خه‌لکێ بێگه‌نه‌هـ و هه‌ژار بت.
ڤێجا ئه‌ڤرۆ ئه‌ڤ سیخوڕ بوویه سه‌رۆکێ هه‌رێما کوردستانێ. ئه‌رێ حالێ هه‌رێمێ و مله‌تی د ده‌ستێ وی دا دێ چاوا بت ؟ چه‌وا دان و ستاندنێ دێ ل گه‌ل خه‌لکی کت ؟ یان مه چ هیڤی دێ ژ ڤی سه‌رۆکێ سیخوڕ هه‌بت ، ژبلی کوشتن و سه‌ربڕین و سه‌رهنداکرنێ ؟
له‌وا ره‌ڤاندن و تیرۆرکرنا رۆژنامه‌نڤیسه‌کێ وه‌کی سه‌رده‌شت ئۆسمانی و شه‌هید بوونا ئازادهزره‌کێ ل بن ده‌ستهه‌لاتداریا سه‌رۆکێ سیخوڕ نه تشته‌کێ سه‌یره. ئه‌ڤه نه ئێکه‌مین که‌سه کو ب ده‌ستێ ره‌شه‌کێن مه‌سعوودێ سیخوڕ تێت تیرۆر کرن و نه یێ دوماهیکێ یه ژی. مه‌سعوود ب عه‌قلیه‌تا سیخوڕیێ هزر دکت ، له‌وما وی دڤێت کو ب ڤێ چه‌ندێ رۆژنامه‌نڤیسا لغاڤ بکت و هزروبیرێن ئازادهزرا قفل بکت دا کو که‌سه‌ك نه ئازادانه بنڤیست و نه ئازادانه هزر بکت. ئو دا کو به‌س ده‌نگێ وی بێت بهیستن و به‌س ئه‌و نڤیسین بێن خواندن یێن کو هنده‌ك که‌سێن کو خوه وه‌کی قه‌ره‌چا لێ کرنه و قه‌له‌مێن خوه وه‌کی ته‌مبوورا وان و ب به‌ژن و بالا مه‌سعوودێ سیخوڕ دبێژن.
به‌لێ ئه‌و ب ڤی کارێ خۆ یێ تیرۆرستیێ دێ گه‌هینت کیڤه ؟ دێ شێت کو هه‌ر بمینت ؟ دێ شێت کو رێکێ ل خودانێن هزروبیرێن ئازاد و قه‌له‌مێن ئازاد بگرت ؟ یان دێ شێت کو ته‌ڤگه‌را مله‌تی یا به‌ر ب پێش ڤه راوه‌ستینت ؟ نه‌خێر و سه‌د جارێن دی ژی نه خێر.
ئه‌م دبێژین کو مه‌سعوود ژی وه‌کی هه‌می هه‌ڤالێن خوه یێن دکتاتۆر دێ چت گیفانکێ دیرۆکێ و سه‌د تف و رت (له‌عنه‌ت) دێ لێ ئێن باراندن.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
