ئەگەر بوم بە سەرۆک

 رێکارە بەپەلەکانم:

1- سەرەتا ئەبم بەدیکتاتۆرێکی نیشتمانی. دوای 5 ساڵ، پرسی سەرۆکایەتی ئەسپێرم بە رای نەتەوە.

2-بێ مۆڵەت و بێ گشتپرسی، سەربەخۆیی کوردستان رائەگەیەنم و ئەوی بێتە رێم، بەرەنگاری ئەبمەوەو لەرێی لۆبیەکی ئاگرینەوە، ئارامی لەپایتەختی دژکارانا ناهێڵم. 

2-دیموکراسی توڕئەدەم هەتا ئەو کاتەی زانیاریی نەتەوە ئەگاتە ئاستی دیموکراسی.

3-سیستمی ئەو پارتایەتیە ناهێڵم کە بەشەبوجەکەیان لەموچەی فەرمانبەران زیاتربوەو سەرچاوەی گەندەڵی و دوبەرەکی و شەرو پشێویی ناوخۆبون و باڵیان بەدەستی نەیارانەوەبوە.  

4-هەڵبژاردنی پەرلەمان ئەکەم بە شێوازی بازنەیی و بڕوانامەی پەرلەمانکار لە کۆلێج کەمترنەبێ.

5-هێزێکی سەربازیی و پۆلیسیی و ئاسایشی باوەڕدار لەهەردو رەگەز بۆ سەرتاسەری کوردستان، هەر بەناوی پێشمەرگەوە، دائەمەزرێنم و بژێوییان لەئاستێکی بەرزدا دابینئەکەم و لەتەمەنی 18ساڵیدا مەشقی سەربازی بە هەمو گەنجێک، نێرو مێ، ئەکەم بۆ ماوەی 3 مانگ .

6-بەژمێرەو بوجەی گشتیی هەمو ساڵەکانی دوای راپەڕیندا ئەچمەوەو دوا فلسی دزراو لە گەندەڵکاران ئەسەنمەوەو بە سزای یاساییان ئەگەیەنم.   

7-سامانی ژێر زەوی تەرخانئەکەم بۆ مەبەستی (بەرگری و هێرش) و ئەوەی ئەمێنێتەوە، وەک ماڵی سپی هەڵیئەگرم بۆ رۆژی رەش و تەنیا بەباج و رەسم و گومرگ و کرێ و داهاتی گشتی، دەزگاکانی میری و پرۆژۆکان بەتێروتەسەلی ئەبەمبەڕێوە.   

8-زەوی خۆماڵی (تامیم) ئەکەم و بە گرێبەستی درێژخایەن ئەیدەم بە کرێ بە کەرتی تایبەت و بە کۆمپانیای بیانی، بۆ مەبەستی پیشەسازی و کشتوکاڵی و گەشتیاری و خزمەتگوزاریی گشتی و هەلی گەشەدانیان بۆئەڕەخسێنم و هاوردەو هەناردە ئازاد ئەکەم بۆ هەموان و بۆکەرتی گشتی و کەرتی تایبەتیش.

9-فەرمانگەکان لەنوکەوە، لەسەر سیستمی رۆژئاوایی دائەمەزرێنمەوەو رۆتین ناهێڵم و تەنیا ٢٥% فەرمانبەرانی بەتوانا، بە موچەیەکی تێروتەسەلەوە، ئەهێلمەوەو هەلی کار بۆ ٧٥% ەکەیتری لەکەرتی تایبەت ئەڕەخسێنم و بوار بەکرێکاری بیانی نادەم. گەندەڵیش بەهەمو جۆرەکانیەوە، تاوانێکی نیشتمانی ئەبێ.

10-تەنیا یەک زانکۆ، لەئاستێکی بەرزدا، ئەهێڵمەوە بۆ دەرچوانی زۆر باش. خوێنکارانیتر بۆ پەیمانگەکان، یا رو بکەنە کەرتی تایبەت.. 

11-بیمەی رادەی کەمی ژیان، بە پەککەوتوانی بێ داهات، ئەبەخشم.

12-دڵنیایی تەندروستی بۆ هاولاتیان دابینئەکەم و پەرە بە نەخۆشخانە گشتییەکان ئەدەم و نۆڕینگەو ئەزمونگەو دەرمانخانە تایبەتەکان ناهێڵم و موچەی پزیشک و ئەزمونکارو دەرمانساز بەپێی بارستایی کارەکانیان لە نەخۆشخانە گشتییەکاندا ئەبێ.

13-موچەی مامۆستایان لە هەمو قۆناغەکانی خوێندندا بەپێی بڕی وانەکانیان ئەبێ.

14-موچەی خانەنشینیی سەرۆک و وەزیرو پەرلەمانکارو هەمو ئەوانەی بەدەر لە یاسای خانەنشینیی شارستانی و سەربازین، ئەبڕم.

15-زمانێکی فەرمی دەستەبەرئەکەم و گرنگیش بە شێوەزارەکان ئەدەم.

16-مێژوی کورد لە دیدی نەتەوەییەوە ئەنوسمەوە.

17-هەر لە قۆناغی سەرەتاییەوە، پەروەردە ئەخەمە سەر رێچکەیەکی نەتەوەیی.

18-هەمو مزگەوت و پەرستگەو کەنیسەکان ئەکەم بە ناوەندی خوێندن و زانیاری و هەمو کەسێکیش ئازادئەبێ لەماڵی خۆیدا ئاینداری و خواپەرستیی خۆی بکا، یا نەیکا.

19-پاشگرو پێشگری بەگ و ئاغاو شێخ و حاجی و مەلاو کوێخاو میرزاو هاوشێوەکانیان ناهێڵم.

20- دەستورێک دائەڕێژم سەروەریی یاساو ماف و ئازادیی تاکە کەس و پێکهاتە نەتەوەییەکانی تیا پارێزراوبێ و سنوری کوردستانی تیا دیاریکرابێ و یاساکان لەدەستورەوە سەرچاوە بگرن. 

بنەما گشتییەکانم: 

 ا- کوردایەتی، راگری بون و مانی ئێستەو ئایندەمانە. 

 ب- هەمو نزیکبونەوەیەک لەداگیرکەران، دورکەوتنەوەیە لەسەربەخۆیی.

 ج-سەربەخۆیی کوردستان هەمو کاتێ کاتیەتی ئەگەرچی کاتەکان چونیەکنین.

 د-جگە لە سەربەخۆیی و بەرگریکردن لێی، رەوا نیە بۆ هیچ مافیکی کەمتر،خوێنی نەتەوە بەهەدەر بدرێ.

 ه- پێدانی هەر پۆستێکی وەزاری و پەرلەمانی بە کورد، لەناو دەسەڵاتی داگیرکەراندا، دەرزییەکی سڕکەرە لەجەستەی کوردستان.

 و-نۆژەنکردنەوەی ماڵی داگیرکەران، وێرانکردنی ماڵی داگیرکراوانە.

 ز- ئاشتی و برایەتی لەنێوان داگیرکەرو داگیرکراودا، کۆیلەیەتییە بۆ دوەمیان. کوردستان لەجەنگێکی گەرم یا ساردا ئەبێ تا رزگارکردنی دوا بستە خاکی. 

تێبینی: کۆمەڵگەکان چونیەکنین، هەر کۆمەڵگەو لەهەر سەردەم و بارودۆخێکدا،جۆرە سیستمێکی بۆ ئەگونجێ و گەشەی پێئەدا. واتا ئەبێ کاڵا لەقەد باڵابێ. ئەم بەرنامەیە کاڵای بەقەد باڵای ئەمڕۆمانە و خۆشگوزەرانیش دابینئەکا بۆ گەلی کوردستان . ئایندە، بەرنامەی جیاوازی خۆی ئەبێ. ئەم بەرنامەیەش پێشنیارە بۆ هەر سەرۆکێکی هەڵکەوتو، نەک بۆ خودی خۆم.