بڕیارەکانی دادگای فیدراڵی عیراق

زنجییرە بڕیارەکانی ئەمدواییەی دادگای باڵای فیدراڵی دژ بە حکومەتی هەرێمی کوردستان بەڵگەی ئەوەیە کەوا دەسەڵاتی پارتی وحکومەتەکانی هەمووی ( فشەخانە ) بووەو ، بە عەقلیبیەتی بازاڕی وعەشایەری چەندین ساڵە ئەم حوکمە بەڕێوە دەبەن و ، ئەوەندە غەڵەت وپەڵەتیان زۆرە کە بەزنجییرە بڕیاڕێکی ئەم دادگایە نەبێ راستەڕی نابێتەوە .

بۆیە وەک دەستپێک دادگای ئیتحیادی ئەم بڕیارانەی دەرکرد :

- بڕیاری نادەستووری هەناردەی نەوت .

- بڕیاری هەڵوەشاندنەوەی درێژکردنەوەی تەمەنی پەرلەمان .

- دەرهێنانی داهاتی ناوخۆو دەروازە سنووریەکان لەدەست حکومەتی هەرێم بەپێی یاسای بوودجە.

- گێڕانەوەی دەسەڵاتی سەرفکردنی پارە بۆ وەزارەتی دارایی عیراق .

- چەسپاندنی دەسەڵاتی چاودێری دارایی بەسەر مەسروفاتی حکومەتی هەرێم .

- دامەزراندنی کۆمپانیایەکی سەر بە بەغدا بۆ وردبینی داهاتەکانی نەوت .

- کردنەوەی حیسابی بانکی سەر بە بانکی ناوەندی عیراق .

ئەمانە هەمووی بەڵگەی ئەوەن کەوا حکومەتی هەرێم دەستێکی ئەمین نەبووە یۆ پاراستنی سامان وداهاتی کوردستان .

پێشبینی دەکەم ئەم زنجییرە بڕیارانەی دادگای ئیتحیادی بەردەوام بێت ولە ئاییندەدا ئەمانەش بگرێتەوە :

- هەڵوەشاندنەوەی نووسینگەی پەیوەندییەکانی دەرەوەی حکومەتی هەرێم و گواستنەوەیان بۆ ناو سەفارەتەکانی عیراق لەوڵاتان .

- گێڕانەوەی هێزی پێشمەرگەی کوردستان بۆ سەر  وەزارەتی بەرگری عیراق ناساندنیان وەک پاسەوانی سنوور .

- کۆنتڕۆڵکردنی سنووری ئێران لەلایەن حەشدی شەعبی و سنووری تورکیاش لەلایەن جەیشی عیراقەوە .

- هەڵوەشاندنەوەی هەموو ئەو یاسایەنەی ناکۆکن لەگەڵ دەستووری عیراق .

- راگرتنی یەکجارەکی هەناردەی نەوتی کوردستان وبەکارهێنانی بۆ پێداویستی ناوخۆ .

ئەمانەو جگە لەوەی بە دووری نازانم لەمەولا زۆربەی ئەو خەڵکە زەرەرمەندانەی دەسەڵاتی پارتی روو لە دادگاکانی عیراق بکەن بۆ گێڕانەوەی مافەکانیان .

پێشتریش وتوومە ، دەسەڵاتی بەغدا زۆر بە جیدی کار دەکات بۆ بچووککردنەوەی دەسەڵاتی هەرێم و گێڕانەوەی بۆ سەردەمی حوکمی زاتی کارتۆنییەکە ، کێشەکەش لێرەدایە دەسەڵاتی هەرێم هیچی بەدەستەوە نەماوە بتوانێ دیفاع لە وجوود وکیانی کوردی بکات بەهۆی ئەو هەموو خراپ ئیدارەدان و گەندەڵی و زوڵموزۆردارییەی لەمیللەتەکەی خۆی کرد ، بەمەش سۆزو پشتگییری میللەتەکەی لەدەست خۆی داوە .

هیچ کوردێک شەڕەفمەند نیە بە لاوازبوونی هەرێمەکەی کە بەرهەمی دەیان ساڵ خەبات ودەریایەک خوێن وقوربانی میللەتە ، بەڵام ئەمەی ئەیبینیین عاقیبەتی ئەو مەغروری سیاسی وبێباکی دەسەڵاتە لەداخوازیەکانی میللەت و ئیدارەیەکی شاییستە بەم هەموو قوربانییە .