سازانا نیشتیمانی یان سیاسی؟
Tuesday, 02/07/2013, 12:00
1379 بینراوە
بابه‌تی هه‌ری گرنگ ئیرۆ د ڕۆژه‌ڤا خه‌لكێ هه‌رێمێدا، ڕه‌شنڤیسێ ده‌ستوورێ هه‌رێما كوردستانێیه كو بوویه ئالافێ رۆژێ، ل شوونا هه‌موو خه‌لكێ هه‌رێمێ دئێك خانه و چه‌په‌ردا كۆمڤه بكه‌ت، به‌رب ئێك ئارمانجێ ببه‌ت، جهێ داخێیه به‌رب دۆخه‌كا دژوارڤه برییه، له‌و بوویه ئارمانجه‌كا سیاسی و تا ڕاده‌یه‌كی ئامرازێ توڵڤه‌كرنێ، هه‌ر لایه‌نه‌كێ سیاسی ژی لگۆره‌ی به‌رژه‌وندییا خوه پێناسه و گرنگ و نه‌گرنگ دكه‌ت!.
هه‌لبه‌ت لگۆره‌ی تێروانین و بۆچوونێن یاسازان و خه‌لكێ بسپۆر د بوارێ ده‌ستووریدا، ڕه‌شنڤیس پشتی ژ لایێ لیژنه‌یه‌كا تایبه‌تڤه دهێته نڤێسین و ئاماده‌كرن، پاشی په‌رله‌مان ده‌نگی ب (ئه‌رێ) لسه‌ر دده‌ت و (تێپه‌ر) دبیت، هه‌روه‌سا سه‌رۆك (په‌سه‌ند) دكه‌ت، ئێدێ بڕیارا (ئه‌رێ و نه‌رێ) ته‌نها بۆ ملله‌تی دمینیت و چ هێزه‌ك دیتر بووی نینه، هه‌ر وه‌كو جه‌نابێ سه‌رۆك بارزانی د بیروه‌رییا 26ێ گولانێدا ڕاگه‌هاندی، ده‌ستكاریێ تێدا بكه‌ت و ل شوونا ملله‌تی بریارێ لسه‌ر بده‌ت، ژبه‌ر كو هه‌موو قۆناغێن یاسایی ده‌ربازكرینه و چو رێكاره‌كا یاسایی نه‌مایه لێ بزڤریت.
به‌لێ ئه‌وا خه‌لكێ هه‌رێمێ مه‌نده‌هۆشكری ئه‌وه، هه‌موو ئالییه‌ك ژ لایه‌كی خوه ب نوونه‌رێ وان دادنیت، ژ لایه‌كێ دن رێ ل وان دگرن كو مافه‌كێ گرنگێ خوه په‌یره‌و بكه‌ن! جهێ داخێیه چ بهایه‌ك ژ لایێ ڤان ئالییانڤه بۆ ده‌نگێ په‌رله‌مانی و په‌سه‌ندا جه‌نابێ سه‌رۆكی و ئـه‌رێ و نـه‌رێ یا ملله‌تی نه‌مایه؟ هنده‌ك لایه‌ن ب مه‌به‌ستا مسوگه‌ركرنا هنده‌ك قازانجێن سیاسیێن بێ بها به‌رامبه‌ر ئیراده و ده‌نگێ ملله‌تی مینا به‌رامبه‌ر دژمنه‌كی راوه‌ستاینه، ب بهانه‌یا ڕه‌شنڤیس پێدڤی ب سازانێیه؟ گه‌لۆ چی سازانه‌ك مه‌به‌سته؟ ئه‌گه‌ر نیشتیمانی بت، ئانكو پێكهاته‌یا نیشتمانی، واته "تاك ـ تاك"ێ ڤێ هه‌رێمێ تیێدا به‌شدارببیت، ئه‌ڤه ژی ب رێكا ریفراندۆمێ جێبه‌جێ دبیت و هیچ رێره‌وه‌كا دن نینه، به‌لێ یا سه‌یر ئه‌وه هه‌ر ئه‌و ئالی دژی ڤێ رێره‌وێ ب توندی راوه‌ستاینه و وه‌ناكه‌ن ملله‌ت دادوه‌ربیت و خوه‌دی بریارا خوه بیت! واته مه‌به‌ستا وان سازانا نیشتیمانی نینه؟ ئه‌گه‌ر مه‌به‌ست سیاسی بیت، ئانكو لایه‌نێن سیاسی پێدڤی دكه‌ت رێكبكه‌ڤن، ئه‌رێ دپرسین ما ئه‌ڤ سازانه نه هاتییه‌كرن ده‌ما ل په‌رله‌مانێ كوردستانێ ب (96) ده‌نگێن ئه‌ندامان ژ هه‌موو فراكسیونێن ناڤا په‌رله‌مانی ئه‌ڤ ره‌شنڤیسه ب ئه‌ری په‌سه‌ندبووی؟، بمن: ڤان ئالییان باوه‌ری ب خوه نه‌مایه و پێگه‌یا خوه ژده‌ستداینه، پشتراستن ئه‌گه‌ر ره‌شنڤیس كه‌ت به‌ر ئیراده‌یا ملله‌تی، دێ ب ئـه‌رێ ده‌ربازبیت، له‌و دێ سه‌روه‌رییه‌كا دن لبن سیبه‌را جه‌نابێ سه‌رۆك بارزانی و پارتی بۆ كوردستانێ تۆماربیت، ئه‌ها ئه‌ڤه یه وان دئازرینیت، توند دكه‌ت، هاردكه‌ت، داخدار دكه‌ت، به‌لێ دبێژینه وان هوون به‌رامبه‌ر ملله‌تی چه‌ند ره‌شبین بن، بێی وه‌فابن، شاره‌زایێن تێكدان و دروستكرنا قه‌یرانان بن، مفایێ هه‌وه ناكه‌ت، چونكو مانه‌وه بۆ "ملله‌تی" یه و ملله‌ت ژی مانه‌وه و هێزا خوه د سیبه‌را پارتی و جه‌نابێ سه‌رۆك بارزانی دا دبینن، ئه‌ڤجا وه‌رن سه‌ر سازانا نیشتیمانی و رێكێ ل ملله‌تی نه‌گرن، دڤێت هوین بزانن دژمنكارییا ته‌رفدارێن ده‌ستووری ب مێرخاسی ناهێته ل قه‌له‌مدان و ئه‌ڤێ حه‌زێ بۆ خوه ب ئه‌رك نه‌زانن و ملله‌تی ب دژمنێ خوه نه‌دانن، چونكو "ئه‌رستۆ" دبێژیت: (مه‌زنترین مێرخاسی ئه‌وه مرۆڤ كونترۆلا حه‌زێن خوه بكه‌ت، نه‌ك دژمنێن خو، ئاسانه مرۆڤ دده‌مه‌كیدا لسه‌ر دژمنه‌كێ خوه زالببیت، به‌لام یا گرنگ ئه‌وه لسه‌ر حه‌زێن خوه زالببیت)، ئه‌ڤجا وه‌رنه رێزێ و ته‌ره‌فدارییا ملله‌تی، لدووڤ حه‌زێن خوه یێن نه‌ره‌وا نه‌چن، بلا سه‌قامگیرییا هه‌رێمێ ب هه‌وه تێك نه‌چیت.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
