وەڵامێكی كورت بۆ ئەو بەڕێزانەی وەڵامیان لە سەر موچەكەی بەڕێز نەوشیروان مستەفا دایەوە

Thursday, 29/10/2009, 12:00

3680 بینراوە

من بیردەكەوە كەواتە من هەم (دیكارت)

نازانم ئەوانەی وەڵامیان داوەتەوە,چەندیان لەو بەڕێزانەن بۆ چاكبونەوەی بەڕێز تاڵەبانی كاتی خۆی قوربانیان دا بە زەوییا و هیوایان خواست بەشێك لە تەمەنیان بچێتە سەر تەمەنی پڕ بەرەكەتی ئەو بۆ ئەوەی خزمەتی زیاتر بكات,هیوا دارم لەوانەش نەبن لە فرۆدگاكان جانتایان بۆی هەڵگرتووە,من باوەڕم بە میانەڕەوی, هەیە هەموو كات دژایەتی یەكێك بكەم بایی دۆستایەتی و پاشەكشەی تێدا دەهێڵمەوە,وە لایەنگری لە بۆچونێك بكەم بە شكەوە لایەنگیری لێ دەكەم بایی هەڵگەڕانەوە دەهێڵمەوە,لەوانەیە لەمەدا هەڵە بم.
نازانم بۆ ئەوانەی لەم دوورەوە ئەوەندە جەربەزانە دەنووسن,نازناو بۆ خۆیان هەڵە بژێرن,ئیتر نازانم ترسە یاخود لەوانەن لە كوردستان پۆست ڕۆستەم و زۆرابن,لە كەناڵەكانی دی بە زمانی گوڵ ڕەخنە دەنووسن, یەكێك لە ناشرینییەكانی كۆمەڵگا ئەم مرۆڤە دوو فاقیانەن.
ئەوەی وای لێمكرد وەڵامی ئەو خۆشەویستانە نەدەمەوە زۆربەیان بە نازناو وەڵامیان دابوەوە,ڕێزم بۆ خۆیان وەك كەسایەتی,وەلێ كەسێك نەتوانێت بەناوی خۆیەوە وەڵام بداتەوە ئەوا نووسینەكەی شایانی بە جدی وەرگرتن نییە.
18ساڵی تەواوە شەو ڕۆژ لەسەر هەموو وردە كارییەكانی ژیانی گشتی و تایبەتی سەرۆكەكان و خێزان و مناڵەكانیان دەنووسین,كەسێك دەبێت بە سەرۆك ژیانی تایبەتیشی دەكەوێتە ژێر چاودێری هەواداران و نەیارانییەوە,لەم نێوەدا كاك نەوشیروان لەم چركە ساتەی ژیانی سیاسیدا,ئۆپۆزسیۆنی خاوەند هژمۆنیایە لە كوردستان,وە ئەو دەنگەشی كە لیستەكەی هێناوێتیەوە دەنگی ڕابردوو و ئێستای ئەوە نەك پڕۆژەی سیاسی و ئایدۆلۆژیاو ئەوانەی ئێستا لەسەر كورسی لیستەكەی لە پارلەمان دانیشتوون,بۆیە ژیانی تایبەتی خۆی و خێزانەكەی,خزم و نزیكەكانی ,ئەوانەی نفوزی سیاسی و ئابووری ئەو ئیستغلال دەكەن بۆ خۆیان ئاساییە بكەوێتە بەر سەرنجی خەڵك.لەم ڕوانگەیەوە من بڕگەیەكی گۆشەكەم لە ڕۆژنامەی ئاوێنە بۆ موچەكەی ئەو تەرخانكرد,ئەوەش مافی خۆمە و لە گوڵیش خراپترم نەوتووە,پیشەی منیش نییە سوكایەتی بە هیچ كەسێك بكەم.
ئەگەر موچەكەی كاك نەوشیروان تەنها یەك دەفتەر بوایا,ئەوا شایانی باسكردن هەرنەبوو,چونكە هەموو ئەندامانی مەكتەبی سیاسی ینك3 دەفتەریان هەیە,ئیتر بۆ لەو حەرام بێت.
مانگانەی بەڕێزی 60000 دۆلارە"وەك ئەوەی مەلا بەختیار لە بەردەم 122 كەس لە كۆنفرانسی ڕێكخراوە دیموكراتیكەكانی ینك لە هۆڵەندا باسی كردووە",ئیتر ئەگەر زانیارییەكان مەلا بەختیار هەڵە بووە,بچن وەڵامی ئەو بدەنەوە,ئەگەر كاك نەوشیروان شەهید ئارام و عەلی عەسكەری و مامەڕیشە و.....ش بوایە ئەوا من ئەو موچەیەم هەر بە ناڕەوا دەزانی بۆی,زۆر نا ئاساییە لە وڵاتێكدا كەسێك ڕۆژانە 2000 دۆلار موچەی بێت و كەسوكاری قوربانیانیش6 دۆلار وەربگرن,ڕاستە كاك نەوشیروان وەك سەدان تێكۆشەری دیكە بە جوڵانەوەكەوە ماندووە,وەلێ شانس لەوە باشتر نییە خۆی وكەسوكاری هەموو سەریان سەلامەت دەرچووە ,گەورەترین قوربانیدەر ئەوانەن گیانیان بەختكرد.
ئیتر كاك جەزا جنگیانی كە ناوەكەمی لە یاد كردووە,چونكە هەڵگری "د" نابێت وەڵامی هاووڵاتیانی عامییە بداتەوە,چ نموونەیەك لەسەر كرێ و هەقدەست و موچە ڕیزە كات هەموو نالۆژیكین,با هەرچی كاغەزی دنیا هەیە ڕەشی بكاتەوە,هیچی دادی داكۆكییە كوێرانەكەی نادات لە ناڕەوای و ناعەدالەتی. ئەم برا لیبراڵە فتوا دەردەكات كە ئیتر كوردستان پۆست بابەتیشم بۆ بڵاو نەكاتەوە,هەی ئافەرین لیبرالیزمی ئاخر زەمان.
بەڕێزی كۆمەڵێك شێر و ڕێوی دێنێتەوە بۆ داكۆكی لە موچەكەی كاكە نەوشیروان و بەرگری لە نا عەدالەتی,كە سەركەوتوو نییە لێیان,بە پێی وتەكانی ئەو و نمونەكانیشی بێت ئەوا من ڕازیم موچەیەكی خانەنشینی بۆ كاك نەوشیروان و هەموو ئەو تێكۆشەرانەی بەشێك لە ژیانیان لە خەباتی چەكداری بەسەر برد, موچەیەك خانەنشینی وەك ئەوەی فیشەریان بۆ ببڕنەوە,لێگەڕێن جیاوازی كرێ و داهاتی تاك و بەرهەمی نەتەوەیی و هێزی كڕین و بارستایی ئابووری و بودجەی وڵات و ئاستی گوزەرانی تاك و ... قەیناكا,كە لە نێوان كوردستان و ئەڵمانیا ئاسمان و ڕێسمانە,وەلێ نەك مانگانەیان بە ئەندازەی ساڵێكی فیشەر بێت و مناڵەكانی ئەوان لە زانكۆ نمرە یەكەمەكانی جیهان لە ئەمەریكا بخوێنن,مناڵی شەهیدانیش پێڵاو بۆیە بكەن,كە بەندە نموونەیەكە لەوانە. سەیر بكەن كاكە د.جەزای حۆشەویست دەڵێت:
ئەو نووسه‌رەی پرسیار لە بڕی موچه‌ی نه‌وشیروان ده‌کات و بەراوردی ده‌کات لەتەك موچەی سەرۆكی هیندیستان. پێشكات پیویستە بزانرێ ئەو بەرێزە خۆی چەند موچە وەردەگرێت و سەرچاوەی موچەكەی لە كوێیە، بەچی وه‌ریده‌گرێت (ئیرۆ یان دۆلار)؟ بۆ خۆی كریكارە یان خاوەن پیشەیه‌كی باڵا یان سەرمایەداریكی خاوەن كەرتی تایبەتی؟ جیاوازی نێوان موچەی كرێكاریكی بنگلادیشی لەتەك موچەی كرێكاریكی ئەڵمانی پێوەریكی نابەرامبەرە، ڕەنگە موچەی كریكارێكی (BMW) زۆر زیاتر بێت لەموچەی سەرۆكی فیتنام. ئایا دەكرێ جەستەی ماندوی كریكارە ئەلمانیەكە بخرێتە ژێر تەقەی ووشەوە. لەتەك ڕێزما ئەوەی ئەو وتارەی نووسیوە نووسه‌ریكی زۆر كاڵفامە لەتیگەیشتنی لەجیاوازی نێوان موچەكان. ئەگەر نرخی كاتژمێری كارکردن لە هیندستان له‌گه‌ڵ ئەوروپییه‌کدا جیاوازه‌، كریكارێكی هیندی 12 ئێرۆ لە ڕۆژیكدا وەرگرێت. ئەی كرێكارە ئەڵمانیەكەی كە نرخی كاتژمیریك لە20 تا 30 ئێرۆیه‌.
نرخی كار په‌یوه‌سته‌ به‌ ئابوریی ووڵات، نەك سیاسەت، چونكە دڵی سیاسەت ئابورییە.
(یۆشكافیشا) دامەزرینەر و سەرۆكی پارتی سەوزەكان كە لەناوچەی(هێسن)دا لە هەڵبژاردندا پارتەكەی سەركەوتنی بەدەستهانی شۆفیری تەكسی بوو، كە چووە پەرلەمان وەك وەزێرێك و سویندی یاسای خوارد. پانتۆڵێکی كابۆ و جووتی كالەی لەپیدابوو (ئیستا كالەكانی لەموزەخانەدایە) لە شەو و ڕۆژیكدا مۆچەكەی لەموچەی شۆفیری تەكسیەوە گۆڕابە وەزیر. دواجار بۆ ماوەی شەش ساڵ توانی پۆستی وەزارەتی دەرەوەی ئەڵمانیا بگریتە دەست. ئیستا لەبەرلین وەك خانەنشین دانیشتووە مۆچەی خانەنشینی وەزیری وەردەگرێت. نووسەرێك نییە لە ئەڵمانیا تەقە لە یۆشكافیشە بكات و پرسیاری مۆچەكەی لیبكات ئاخر ئەوە مافی خۆیەتی.
كاكە جەزای لیبراڵ كە جار جارە هانا بۆ وتەو دەستەواژەكانی ماركسی دوژمنی باوك كوشتەی لیبراڵەكان دەبات ,فتوا بۆ كوردستان پۆست دەردەكات بۆ نووسەرانی نەیاری هاوبەشی ینك و پدك و گۆڕان و دەڵێت:
وەك دەزگایەكی نەتەوەی و جەربەزه‌ و ئازا پێویستە چاویك بەو وترانەدا بخشینێته‌وه‌ كە ڕووی تێدەكەن، ئازادیی ڕادەربڕین ئەوە نییە، هەموو ووتاریكی ناوەڕۆك پۆچ و نازانستی بڵاوبكاتەوە. مەرج نییە خاوەنەكەی كێ بێ، كە ناوەڕوكی ووتاریك دووربێ لە زانست و ڕاستی و لەسەر مزاجی ناهوشیاری نووسەرەكەی نووسرابێت، خزمەت بە دۆزی كوردی و ئیستراتجیتی كوردستانپۆست ناكات. سانسۆر پێویستە چونكە وتاری خراپ هوشیاری خۆینەری لاو دەشیوینی، تاوانە ڕووی كوردستانپۆستی ئازیزی پێ زبرببێ.......
ئەو تەقانەی میدیای جەلالی و مەلایی لە نەوشیروانی دەكەن. تەقەی خۆشیە، دەبێ بكرێت چونكە دوو نەیاری سیاسیین پێویستیان بەدیالۆگ و شەرەنووسینی میدیا هەیە. لە دیالۆگی سیاسیشدا هەندی جار جنیویش پیویستە. لە پەرلەمانەكانی ئەوروپی و یابانی و توركیادا شەڕەكورسیشی تیدەكەوێ.
ئەو تەقانەی چەندنووسه‌رێكی بەناو ئۆپۆزیسوینی دەسەڵاتی سیاسیی لە نەوشیروانی دەكەن، ئەوە ته‌قەی ناخۆشییە، چونكە ئەو بەڕێزانە ئەگەر سیاسیانە بڕواننە لەشی ئیفلیجی باشوری كوردستان، ئیستا هیچ ئەڵتەرناتیڤێك بیجگە لەگردەكە زیاتر نییە، که‌ بتوانی بێته‌ زمان له‌ ئاست دەسەڵاتی مافیای كوردی، ئەمە ئەوە ناگەینی ڕەخنە لە نه‌وشیروان و گۆڕان حەرام بێت، (جیاوازی نێوان ویستی گۆڕان ولیستی گۆڕان، کتێبێکه‌ تایبەت بەم دۆزەی ئیستای باشوری كوردستان هیوادارم لەمساڵدا بتوانم بڵاوی بكەمەوە).
وەك دەبینین ئەم برا نووسەرمان داوا دەكات ڕێگە نەدرێت بە بڵاو كردنەوەی هیچ بابەتێك لە دەرەوەی كوردستانی و گۆڕان ,هەموو دەنگێكی ئازادیخوازی لە دەرەوەی ئەم دوولایەنە بكوژرێت,نابێت لە نێوان ئەم 3 دەنگە دەنگی دیكە هەبێت,ئەمە چ فتوایەكە,ئەمەی كاكە جەزا دەیكات دەسەڵاتیش جورئەتی كردنی ناكات, باشە ئەمانە سبەی بگەن بە دەسەڵات, ئێستا ماڵپەڕەكانمان لێبگرن,ئەوا سبەی فتوای زمان برینیش دەدەن,ئەوسا دەبێت بڵێین سەت خۆزگەم بە كفن دز.
بەڕێزان تەنها لە باسی ئازادی نێوان خاوەند بۆچون و ڕوانگە جیاجیاكانە حەقیقەت و ڕاستییەكان ئاشكرا دەبن,وەلێ ئەم برا خۆشەویستەمان ڕاستی لە لای ئەو نرخی نییە,ئەو دەیەوێت بە زۆر پڕۆژەی خۆیمان بەسەردا فەرز بكات,كە ئەمەش تەواو دژ بە بیروباوەڕە نوێكەی خۆیەتی.مەگەر مافی هەر تاكێك نییە, بیروبۆچونی تایبەتی خۆی هەبێت و بڵاوی بكاتەوەو داكۆكی لێبكات,ئایا دەزانن ئەوانەی لە ساڵی2006 سەركەوتی ڕاپەڕینی جەماوەری ناڕازیان كرد,بەبێ داوای لێبوردنكردن بوونە گۆڕان.
كاكە جەزای زۆر ئازیز و خۆشەویست ڕێگامان لێدەگرێت لەوەی توانای هەڵبژاردنی باشترین ڕێگاكانمان هەبێت بۆ ژیانی تایبەتی و سیاسی,ئاخر برای هێژا ئێمە لە قوتابخانەی ئەم بەڕێزانەوە دوێنێ فێر داكۆكی لە كرێكاران و جوتیاران بووین , دوایی هەر خۆیان وتیان قەت ئێمە هەڵگری ئەو بیروباوەڕە نەبووینە,ئێستا تۆ چۆن ئەو مافەمان نادەیتێ و بە ڕەوای نابینی.
ئایا دەزانن,دیاریترین و بەرجەستەترین بەهای لیبرالیزم بریتیە لەئازادی و داكۆكی لە پرنسیبەكانی,ئەگەر ئازادی لە لیبراڵەكانی وەك ئێوە بكەنەوە,بیروباوەڕەكانتان هیچ بەهایەكی نامێنێت,بگرە پێناسی چەمكی لیبراڵ زۆرجار تەنها بە مانای وشەی ئازادی دێت لە فەرهەنگی سیاسییدا,وەلێ لەم كوردستانە هەموو چەمكو دەستەواژە سیاسییەكان شێوێنراون,قابیلە لیبراڵی بەسزمان نەكرێت بە سینەما.
لای لیبراڵەكان هیچ كات ئازادی وەك تاكتیك بەكار ناهێنرێت,تاكتیك نییە,بەڵكە ستراتیژییە,ئەمە وەك بیروباوەڕ , وەك پراتیك,لیبراڵەكان مێژووییەك لە خوێنڕشتنیان تۆمار كردووە,قوربانییەكانی سستەمە ئابوورییەكەشیان كەمتر نییە لە شەڕەكانیان"ئەمەیان بۆچوونی منی نالیبراڵە".
گلەییەكی دیكە لە كاك د.جەزا كە ڕەخنە لە بەڕێزێكی دیكە دەگرێت لە سەر شێخی گەورە,زیاتر لە نیوەی بابەتەكەی بۆ ئەو تەرخان كردووە,نایات ڕاشكاوانە بەرەو ڕوی خودی نووسەر ببێتەوە,كۆكتێلی ئەم بابەتەی دەكات"وەك لیرەو لیفكەكەی لێكردووە",ئیتر نازانم لەبەر ئیعتباراتی برادەریە یان .
هەر لەو چوارچێوەیەدا هاوڕێیەكی دیكەش بە ناوی ڕۆشار وەڵام دەداتەوەو دەنووسێت:
منیش:منیش پێم باش بوو ڕوونکردنەوەیەکی بچوک لەسەر ئەو نووسینەی کاک عەلی بدەم دڵنیاشم لەوەی کە ئەو بەڕێزە لێم زویر نابێت ...... .
ئایا دەزانیت موچەی وەزیرێکی بێ کەفائەت لە مووچەی مانگانەکەی نەوشیروان زۆر زیاترە؟
ئایا دەزانیت نەوشیروان تەنها دوو قات جلی هەیە! ؟
ئایا دەزانیت مەسروفاتی گەشتێکی چوار پێنج ڕۆژەی جەلال تاڵه‌بانی یاخود مەسعود بەرزانی بە ئەندازەی 500 ساڵی مانگانەی سەرۆکی هیندستانە. لە هەمان کاتیشدا ته‌مه‌نی ماندوونه‌بوونی نەوشیروان بە سیاسه‌ت و مه‌ترسیی له‌ سه‌ر ژیان و خه‌بات و که‌سایه‌تیی به‌ ئەندازەی 50 ساڵی سەرۆکی هیندستانە؟.
ئایا دەزانیت موچەی مانگانەکەی نەوشیروان بەئەندازەی پارەی جگەرەکەی مانگێکی دلێری سەید مەجیدە، چونکە دلێری سەید مەجید جگەرەیەکی تایبەت دەکێشێ، وەکو بیستومە هەر پاکەتێکی بە 50 دۆلارە؟.
سەرەتا من كەسێك ناناسم بەناوی ڕۆشار,ئیتر لە چی زویر بم,بە پێی وتەكانی ئەم بەڕێزە بێت ئەوا كەسێكی زۆر نزیكە لە كاك نەوشیروانەوە,چونكە سەرباری موچەكەی ئاگاداری ناو بوخچەكەشیەتی كە دەزانێت دوو دەست جل و بەرگ زیاتری تێدا نییە.
دەگێڕنەوە كە شێخەكانی سۆڵە دەچوون قاتیان بە 3000 دیناری سویسری لە شار بە كردن دەدا ,دوایی هەر بە وەستای دورمانەكە 3پینەیان لێدەدا,بۆ ئەوەی بڵێن لە گەڵ خەڵكدا جیاوازیان نییە.
لالۆ ڕەنجە تێكۆشەرێك بوو لە تیپی93 كۆیە,بۆ ئەوەی بیسەلمێنێت لایەنگری كرێكاران و جوتیارانە پینەی لە قاتە نوێكانی دەدا.
كاك نەوشیروان لە پێشمەرگایەتی پێڵاوی لاستیكی لە پێدا بوو,وەلێ مانگگانەی ئێستا 60000 دۆلارەو مناڵەكانی لە هەرە باشترین زانكۆی جیهان لە وڵاتە یەكگرتووەكانی ئەمەریكا دەخوێنێت,ئەو زانكۆیەی زۆربەی سەرۆكانو هەڵگرانی نۆبَڵ لێی دەرچوونە,تەنها دوو قاتی هەیە بەڵام مەسروفاتی مێزی شەوانیان بە ئەندازەی چەندین قاتە .
پێش 5 ساڵ لەسەر موچەی مام جەلالم نووسی,كاك كەماڵ میراودەلی هەمان بابەتی كردە ئینگلیزی,لەوانەیە ئەوكات زۆرتان لەو بابەتەش زویر بوبێتن.
ئەوەی دلێرەكان و تاڵەبانییەكان و بارزانییەكان و كۆسرەتییەكان و ...دەیكەن,ناڕەوایەو دزینی سەروەت و سامانی گەلە,ڕۆژێك هەر دەبێت لێپرسینەوەیان لە گەڵدا بكرێت و لەسەری بدرێنە دادگا,بە هەموو باوەڕ و ویژدانێكەوە ئەمە دەڵێم.
خۆشەویست ئایا دەزانیت ئەو60000دۆلارەی كاك نەوشیروان مانگانە بە ئاشكرا وەری دەگرێت,بەشێكە لەو بودجەیەی ینك مانگانە لە گەلی دەدزێت؟,هیوادارم كاك نەوشیروان و هەموو مەكتەب سیاسیی و سەركردایەتییە دەرچووەكان لە ناو یەكێتی,ئەگەر بودجەكەی ینك بە ناڕەوا دەزانن,پێش ئەوەی ینك لە پلۆنۆم بە دواوە موچەكانیان ببڕێت,خۆیان خۆ لە وەرگرتنی بپارێزن و بۆ گەلی ئاشكرا بكەن,نەك ئەوان وەك ئێستا بۆیان ئاشكرا بكەن.
ئەم بەڕێزە بێ ئەوەی سەرۆكی هیندستان بناسێت,كە سەرۆكی یەك ملیار مرۆڤە,كە سەدان نەتەوەن,بە شایستەتر لە كاك نەوشیروانی نازانێت,هەموو پێوەرێك بۆ بەڕێزی تەنها شاخە,ئەگەر كاك نەوشیروان لە ئێستادا سەرۆكایەتی شارێك بكات و كەسی یەكەمی بێت,ئەوا سەرۆكی هیندستان خاتوو براتیبا باتێل كە لە مێژووی هیندستاندا یەكەم خاتوونە بۆتە سەرۆك و نوێنەرایەتی یەك ملیار كەسە,گەورەترین دیموكراسییە لە جیهان,لە سەدان نەتەوەو ئاین پێك هاتووە,بەڕێزی حاكمی پێشووی ولایەتی ڕاجستان بوو"دانیشتووانی دەیان ئەوەندەی شاری سلێمانیە",پێشتریش بەڕێز أی بی جی عبد الكلام زانای گەورەی ڕۆكێت,سەرۆكی بوو,كە ڕۆڵی لە پێشخستنی هێزی ڕۆكێتی هیندستاندا هەبوو,دیارە كاك ڕۆشار مافی خۆیەتی لەمەدا,هاوكات هیندییەكانیش,هەموو كەس بە یاری خۆیدا دەڵێت.
"سەرۆكی هیندستان مانگانەی 50000ڕوپیەیە,هەر43ڕوپیە یەك دۆلارە,ئابووری وڵات نزیك100 ئەوەندەی كوردستانە,ژمارەی دانیشتوانەكەشی زیاتر لە200 ئەوەندەی كوردستانە".
لەسەر هەمان بابەت برادەرێكی دیكە بە ناوی كوردە عەزیز بە بێ ئەوەی بمناسێت دەڵێت ده‌لَێت: فەرموو نزیكەی 10 ساڵە گەندەڵییەكانی مەلابەختیارو برادەرانی ئاشكرا ئەكرێن تۆ لەوكاتەوە لەكوێییت بۆچی
شتێكت لەسەر نەنووسیوە ؟ جورئەت ناكەیت یان بەپشتیوانی ئەو لە ئەم و ئەو ئەدەیت.
بۆ وەڵامی ئەم خۆشەویستە وەڵامی كاك مستەفای حەسەن گەورە بەسە:
http://www.kurdistanpost.com/view.asp?id=cac4cbd5
یەكێك لەو ڕەخنانەی لە كۆڕو كۆبونەوەكان ئاراستەی گۆڕانە كرێن,شەفافییەتی بودجە و ئاشكرا كردنی سەروەت و سامانی بەرپرسانیەتی,تا ئەمە نەكەن,هیچ جیاوازییەك لە نێوان براكانی دوێنێكەدا ناكەم.كاك نەوشیروان چەندە لای لایەنگرانی خۆشەویست بێت,تا سەرچاوەی دارایی و خۆی و كەسوكاری ئاشكرا نەكات و سەروەت سامانی نەخاتە ڕوو,بەرەو ڕوی موچەكەی خۆی نەبێتەوە,داوا نەكات دادپەروەری لە موچەدا هەبێت,داواكارییەكانی بە عانەیەك ناكڕم,لەگەڵ ئەو پەڕی ڕێزم بۆ تێكۆشان و دەست و داوێن پاكیەكەی.

بۆ زانیاری زیاتر لە سەر ئەو ڕەخنانەی لە دەسەڵاتدارانم گرتووە لە ڕابردوو, بەشێكی كەمیان لەم لینكانەی خوارەوە هەیە:

http://www.kurdistanpost.com/view.asp?id=4f22

http://www.awene.com/Goshekan.aspx?Jimare=17
http://www.dengekan.com/ali.htm

http://www.kurdistanan.net/ourwriter.php?com=writers_show&id=58

http://www.klawrojna.com/component/option,com_comprofiler
 
بابەتەكەی من لەم لینكە بخوێننەوە:
http://www.rozhnamepost.com/dreje.php?id=163