ئاگرەکەی عارف قوربانی کوێی دەسوتاند؟!

Saturday, 21/01/2012, 12:00

1576 بینراوە

ئەو راستیەی کە زۆربەی چاودێران و رۆژنامەنوسان لە سەری هاوڕان، دۆراندنی هەمو لایەنێکی سیاسیە لە شەڕی راگەیاندندا دژ بە یەکێتی، چونکە ئەو حیزبە بە درێژایی مێژوی خۆی لە شەڕی راگەیاندندا سڵی نەکردوەتەوە ، لە بەکارهێنانی نزمترین ئاستی شەڕ و پەنا بردن بۆ هەمو جنێوێکی سیاسی و دروستکردنی سەدان تۆمەتی ناڕاست و چەواشەکردنی خەڵک بە هەمو جۆرێک.
ئەگەر تەماشای راگەیاندنی ئۆپۆزسیۆن و بە وردی بزوتنەوەی گۆڕان بکەین ، لە ماوەی تەمەنی خۆیدا دەستی نەبردوە بۆ ژیانی تایبەتی هیچ سەرکردەیەکی یەکێتی، بۆ نمونە تا ئێستا باسی ئەو شەوە سورانەی نەکردوە ، کە سەرکردەکانی یەکێتی سازی دەکەن، زومی راگەیاندنی نەخستوتە سەر خودی کەسەکان، بەڵکو هاتوە و لە رێگەی بەڵگەوە مەلەفی گەندەڵیەکانی سەرانی ئەو حیزبەی باسکردوە بە سفەتی بەرپرسیارێتیان لە حکومەتدا، لە بەرامبەریشدا بینیومانە راگەیاندنەکانی یەکێتی بە چی شێوەیەک لە بەرامبەر هەر رەخنەیەکدا شەڕی کەسەکانیان کردوە و چەندین دەستەواژەی کەسانی ناکۆکی خۆیان دەستکاری کردوە و بڵاویانکردوەتەوە، هاتون و لە ناو یەک سەعات قسەکردنی نەوشیروان مستەفادا ، دێڕێکیان دەرهێناوە، کە وایان رێکخستوە ئەو سەرکردەیە قسە بە کەرکوکیەکان دەڵێت، هەر راگەیاندنەکانی یەکێتی بە شێوەیەک پەنایان بردوەتە بەر چەواشەکاری، دەستکاری دیمانەی فاروق رەفیقیان کردوە و دەنگی غازفرۆشیان لابردوە و کردویانە بە بانگ، بۆ ئەوەی بە خەڵکی بڵێن ئەم کابرایە کافرە و گاڵتە بە دین دەکات، جگە لە نمونەی محاویلەکەی سەرا، سەدان نمونەی تری لەو شێوەیە هەیە، بۆیە هەمو شەڕێک بەرامبەر راگەیاندنێکی لەوشێوەیە جنێو فرۆش، کۆتاییەکەی دۆڕانە، یاخود دەبێت وەک هەمان راگەیاندن خۆت لە ئەخلاق خاڵی بکەیتەوە و بچیتە ئاستە نزمەکەی ئەوەوە.
ئەوەی جێگای پێکەنینە، هەواڵی وەڵامدانەوەی عارف قوربانی دەستەڕاستی بەرهەم ساڵحە بۆ بەرنامەکەی کەی ئێن ئێن، مرۆڤ کاتێک هەواڵێکی لەو شێوەیە دەبینێت پێکەنینی دێت و شەرمیش دەکات، ئاخر بە لامەوە سەیرە بەرنامەیەک بە هەزاران بەڵگە و داتا و ژمارە نقومبونی حکومەتێک لە گەندەڵی بسەلمێنێت، بتەوێت بەرگری لەو حکومەتە بکەیت، من نازانم کاک عارف بە کام داتا و بەڵگەوە دێت و ئەو ژمارانە دەخاتەوە بە درۆدا، بەڵام دەزانم کۆمەڵێک قەوانی کۆن لێدەداتەوە و شانازی ئەوەمان پێ دەفرۆشێتەوە، کە گوایە حکومەت لە فڵان لادێ عەمودێکی کارەبای راستکردوەتەوە، فیسار رۆژ بەردی بناغەی فڵان قوتابخانەی داناوە، سەیرە کەمەکێک لەو ملیارەها دۆلارەی خۆتت بۆ بکەن بە پرۆژەیەکی خزمەتگوزاری و پاشان بێن بیدەنەوە بە ناوچاوتدا.
خۆ ئەگەر کاک عارف دێت و باسی بەرنامەی تواناسازیەکەی بەرهەم ساڵحمان بۆ دەکات، ئەوە گۆڤاری لڤین بە بەڵگەوە بڵاویکردەوە، کە سەدان کادری پاراستن و ئاسایش ئاخێنراونەتە ناو ئەو بەرنامەیە و تەزکیەیان بۆ کراوە بچنە دەرەوە بخوێنن، ئەو دەزگایانەش هەواڵەکەیان پشتراستکردوە، بینیشمان چەند کەسی تواناسازی لە بەر بێ توانایی گەڕێنرانەوە، ئەرێ حکومەتێک دەسەڵاتی نەبێت بە دو دەزگای هەواڵگری مەترسیدار بڵێت دەست مەخەرە ئیشوکارەکانم، کوێی پیرۆزە؟.
کاک عارف باش ئاگادارە، بە بەرچاوی بەرهەم ساڵحی سەرۆکی کابینەی کردار شەرتەوە، سەدان کەسی خۆپیشاندەر خەڵتانی خوێنکران، فەرماندەیەکی یەکێتی هێزی پێشمەرگەی هێنا و لە یەکلاییکردنەوەی ململانێی کۆمەڵایەتیدا بەکاریهێنا، بارەگای حیزبە سیاسیەکان لە کوردستاندا سوتێنران، لە بەر ئەوەی هاوڵاتیەک دابوی بە لای کاروانی ئۆتۆمبێلەکانی مەکتەب سیاسیەکدا فەلاقە کرا، لایەنگرانی حیزبەکانی ئۆپۆزسیۆن نانبڕاوکران، کەناڵی راگەیاندن سوتێنرا، تا ئێستا چەندین بێ سەروشوێن لە زیندانەکانی یەکێتی و پارتیدان، بە کلکە دەمانچە درا لە ئاسۆس هەردی، هەڵکوترایە سەر ئۆفیسی گۆڤاری لڤین، دەزگاکانی ئاسایش چاودێری ژیانی تایبەتی رۆژنامەنوسان دەکەن بۆ مەرامی سیاسی، ملیۆنەها دیناری خەڵک دەدرێت بە راگەیاندنە سێبەرەکان تا بە قورمیشی دەسەڵات کاربکەن، ئەرێ کاک عارف دێت بە بەڵگەوە ئەمانە بخاتەوە بە درۆدا؟! یاخود وەک وتم کۆمەڵێک وشەی بریقەداری سواوی کۆن ریزدەکاتەوە؟!
بە لامەوە سەیرە خەندان دەڵێت بەرهەم ساڵح داوای لە عارف قوربانی کردوە وەڵام نەداتەوە، ئەی کاک عارف پێمان دەڵێت ئەو راپۆرتە درێژەی لە سایتەکەی خۆیدا دایناوە وەلام دانەوە نیە؟ یاخود وەڵامدانەوە هەر ئەوەیە بڕۆیتە گەلی کوردستان و پڕ بە دەمت جنێو بە نەوشیروان مستەفا بدەیت؟ وەڵامدانەوە هەر ئەوەیە هەمو ئیتیک و سلوکێک بنپێ بخەیت، لە بری ئەوەی بە مەنتیق وەڵام بدەیتەوە، کۆمەڵێک رستەی چەواشەکارانە ریز بکەیت.
بریا عارف قوربانی وەڵامی دەدایەوە، با راستی ئەو فرێند لیبراڵەشمان بۆ دەرکەوتایە، تا بمانزانیایە چۆن بەرگری لە حکومەتێک دەکات، کە خراپترین نمونەی حکومداری بوە لە ٢٢ ساڵی رابردودا، بمانزانیایە چۆن شەرعیەتدەدات بە دزینی ماڵی خەڵک، بە رشتنی خوێنی هاولاتیانی بێ دیفاع، بە سوتاندنی بارەگای ئۆپۆزسیۆن و هەڵکوتانە سەر ماڵی کادیری لایەنە ئۆپۆزسیۆنەکان، هەرچەندە دڵنیاشم ئەگەر وەڵامەکەی کاک عارف ئاگریش بوایە، ناو ستۆدیۆکەی گەلی کوردستانیشی نەدەسوتاند، چونکە ئێستا تاک بە تاکی کوردستان ئاگاداری ئەو فەسادیە مالی و مۆراڵیەن هەردو حیزبی دەسەڵاتدار بەرامبەریان دەیکەن.