نەوشیروان مستەفا خیانه‌ته‌کانی بنهماڵهی بارزانی به هه‌ڵه‌ی مێژوویی پێناسه ده‌کات!
Wednesday, 03/04/2013, 12:00
2198 بینراوە
پرسیار و گفتوگۆکانی نه‌وشیروان فێڵێکه بۆ بردنی خەڵک بۆ بەردەم سندوقی دەنگدان.
چەند مانگ جارێک "نەوشیروان مستەفا" لەگەڵ هوشیار عه‌بدوڵلای بەرپرسی کەی ئەی ئێن دەردەکەوێت و بینه‌ر پێی وایه ئیستا قسه‌یه‌کی تازه و په‌یامێکی تازه له سه‌ر لابردن و گۆڕانی بیچمی ده‌سه‌لات راده‌گه‌یه‌نێت، لێ ئه‌مجاره خاڵی له هه‌موو شتێک و هیچی تازه‌ی پێ نه‌بوو، ته‌نها وه‌کو عیراقییه‌ک که به‌رده‌وام ده‌ڵێت کوردستانی عیراق، په‌یمانی عیراقبوونی خۆی تازه‌کرده‌وه، پارتیش و بنه‌ماله‌ی بارزانیشی دڵنیاکرده‌وه به‌وه‌ی ئه‌وان خائین نیین، لێ هه‌ڵه‌یان کردووه، ئه‌مه‌ی که له سه‌ر ده‌ستوریش ده‌یکه‌ن ئاوا هه‌ڵه‌یه، ئه‌و هه‌ڵه‌یه‌ش ده‌چێته پاڵ هه‌ڵه مێژووه‌یینه‌کانی تریان، واته بنه‌ماله‌ی بارزانی هه‌رگیز خیانه‌تییان له کورد نه‌کردووه، به‌ڵکو هه‌ڵه‌یان کردووه. گەرچی لە"کوردستانپۆست" ئێمه بڕیارمان دابوو ئەم جارە قسە له‌سه‌ر دووبارەکانی ئەم بەڕێزە نەکه‌ینەوە و بێدەنگ بین، بەڵام کاتێک هه‌ستمان کرد، بە پلان له‌م کاته‌دا دێن و پێناسەیەکی هەڵە بەگوێ خەڵکدا راده‌دێرن، خۆشیان وەک که‌سێکی سۆفی و دینی پاک پیشان ده‌ده‌ن، بۆ ئه‌وه‌ی خۆیان بگه‌یه‌نن بەحاڵه‌تی" نێرڤانە"
(1) ئه‌م هه‌موو قسانه فڕێ ده‌ده‌ن، پیاو کە گوێبیست دەبێت، کاتێک ئه‌و په‌یامه‌مان ده‌داتێ و ده‌ڵێت: "من وەكو بەندەی خوا ئەوەی كە واجب بوە لەسەرم، واجبی ئەخلاقی واجبی سیاسی، واجبی دینی، واجبی نیشتیمانی و نەتەوەیی، بەهاوكاری هاوكارەكانم كردومانە". ڕێک دەزانی چەندە سەیر و ناقۆڵا بووە، چونکه ئەم بەڕێزە ماوەیەکی دوور و درێژ سکرتێری به‌ناو پارتێکی مارکسی - لێنینی بوو، که هەزاران کەسی له‌و پێناوه‌دا به کوشتدا و سه‌دان که‌سیش گیانیان تێدا بەخشی. ئەدی پیریی و گەڕانەوە بۆ بەدبەختانە کە ئێمە ماوەیەکی زۆر دەرفەتە ئیلایەکانمان لەخۆمان دروور خستبۆوە، بۆیه جێی خۆیه‌تی بگوترێ هەر ئەوە ماوە کاک نه‌وشیروان بڵێت کاتێک خوداوەند ئێمەی بەتاقیکردنەوە و ئازار هەڵدەسەنگاند، ئێمە مەیدانمان چۆڵ دەکرد و یاخی بووین، بەڵام ئێستا منی بەندەی خوا ئه‌و ئەرکە دینی و نەتەوەیییه جێ بەجێ دەکه‌م، له‌مه‌ودا پیاو هه‌ست ده‌کات، کاک نه‌وشیروان وه‌کو مه‌لا و که‌سێکی دینی ده‌په‌یڤێت.
من بۆ خۆم گەیشتمە ئەو باوەڕەی، کە ئیتر ئەمانە بەهیچ شێوەیەک "ئۆپۆسیسیۆن "نین، چونکە لە دنیای سیاسەتدا نەبووە ئۆپۆسیسیۆن ڕێگە نیشاندەری دەسەڵات بێت و هیوای بۆ بخوازێت کە هەڵە نەکات. لە کاتێکدا دەبێت ئۆپۆسیسیۆن وەک چاودێرێک به ووریاییه‌وه چاو لەهەڵەکانی دەسەڵات ببڕێت و ڕاستەوخۆ خەڵک لە هەڵەکانیان ئاگادار بکاتەوە، بەڵام سیاسەتکردن لە نیشتمانی ئێمەدا وەک خزمایەتی وایە و هەموویان کەم تا زۆر بەسەر یەکیانەوە هەیە، بۆیە هیوای چاککردن بۆ دەسەڵات دەخوازن، لەکاتێکدا ئاشبەتاڵی ساڵی ١٩٧٥ خیانەت بوو، کە مه‌لا مسته‌فا بەبێ ماڵئاوایی ئه‌و میلله‌ته‌ی جێهێشت و دایه ده‌ست قه‌ده‌ری حوکمی به‌عس، بۆ نمونه تۆ بیهێنە بەرچاوی خۆت، باوکێک خێزانه‌که‌ی لە بەر تۆفاوێکدا جێبهێڵێ و خۆی ڕزگار بکات، داخۆ تۆفانەکە دامرکایەوە، ئه‌گه‌ر باوکەکە گەڕایەوە لایان منداڵەکان چۆن لەگەڵ باوکێکی خۆ پەرست و ترسنۆکدا به‌رخود ده‌که‌ن، ده‌شێت خێزان دروست بکه‌نه‌وه؟ بنهماڵهی بارزانی رێک له‌و نمونه‌یه ده‌چێت.
پاشان تێکەڵ کردنی ئاشبەتاڵ و ٣١ئاب کە دووخیانەتی ناشرین و قێزەونده، ئایا دەبێت بکەرانیان دادگای بکرێت، یان خه‌لات و جاوپۆشیی؟ که‌چی کاک نەوشیروان دێت تێکەڵی دەکات بە مەسەلەی دەستور، کە دوور و نزیک په‌یوه‌ندییان به یه‌که‌وه نییه، بۆیه جێگەی خۆیەتی بپرسین داخۆ ئاشبەتاڵ و خیانەتی ٣١ئاب لەگەڵ نوسینەوەی دەستور و تێپەڕاندنی کوجا مەرحەبا؟
هەڵە و خیانەت دوو ووشەی جودان و دووپێناسەی جوداشی دەوێت، خیانەت لێخۆشبوونی نییە، ئەوە تاکێک ناتوانێ ڕێنمایی بکەرەکەی بکات کە جارێکی تر ئه‌و خیانەته نەکات یان لێی ببورێت و بڵێت تۆ هه‌له‌ت کردووه، خیانەت واتە پشت شکاندن و پشتکردن لە میللەت، ئاخر ئێمە هەموومان دەزانین، کە مەلامستەفا لە ئاشبەتاڵەکەدا چی بە شای ئێران ووت؟ ٣١ی ئابیش پەڵەیەکی هێندە ناشرینە بە ناوچەوانی پارتییه‌وە کە پیاو قێز لە کورد بوونی خۆشی دەکاتەوە، پاشان ئێمە ڕووی دەمان لە کاک نەوشیروان دەکەین و دەڵێین ئایا چ پەیوەندییەک هەیە لەنێوان ئاشبەتاڵ و ٣١ئاب و تێپەڕاندنی دەستووردا؟
پاشان نه‌وشیروان مسته‌فا دێتە سەر باسێکی سواو و دەڵێ ئێمە کێشەی شەخسیمان لەگەڵ کەسدا نییە، نە پارتی نە یەکێتی، ئه‌مه له کاتێکدا مرۆڤ ده‌توانرێت بڵێت کێشەی شەخسیم نییە، کە ئەو کەسانەی لە دەسەڵاتدان خەڵکانی دڵسۆز و پاک بن، به مه‌به‌ست کارێکی خراپیان نه‌کردبێت، لەکاتێکدا ئێوه لە تەلەفیزۆنەکەتانەوە هەموو ڕۆژێک جەردەیەک ڕەخنە لە دەستپیسیی و بەهەدەردانی سامانی ووڵات پەخش و بڵاودەکەنەوە، بۆیە ئێمه‌ش دەڵێین کێشەی شەخسی به واتای شەڕی عەشایەری ناگرێتەوە، من بەش بەحاڵی خۆم قێز لەتاک بەتاکی دەسەڵات دەکەمەوە هێندە قینم لێیانە، کە دەردەکەون هێڵنجم دێت، ئه‌وان دزیی و فەسادی و خیانەتیان کردۆتە پیشه‌ی ڕۆژانەیان، داخۆ من خۆم جودا بکەمەوە لە دەسەڵاتێکی ئاوا، ئایا ئه‌و واتایه ده‌دات، که بگوترێت من کێشەم لەگەڵ تاک بەتاکی بەرپرس و دەسەڵاتداراندا هەیە؟ کێشەی من کێشەی گەلێکە نەک خودی خۆم، منیش تاکێکی ئەو گەلەم، لێره‌دا دەپرسین داخۆ نەوشیروان مستەفا ئامادەیە لەگەڵ دزێدا دانیشێت و.بڵێت من کێشه‌ی سه‌خسییم له‌گه‌ڵ تۆدا نییه؟ لەگەڵ خائینێکدا بکەوێتە گفتوگۆ و دانوساندن بڵێت کێشه‌م له‌گه‌ڵتا نییه؟ هه‌ڵبه‌ته له‌گه‌ڵ ئه‌وه‌شدا من ده‌ڵێم به‌ڵێ ئەمە ڕێک دەکەوێتە خانەی شەخسشه‌وه و من بەشانازییه‌وە دەڵێم بەڵێ من کێشەی شيخسیشم لەگەڵ ئه‌م هه‌موو دز و خائین و پیاوخراپانه‌شدا هه‌یه! چونکه ئه‌وانه یاری بە پیرۆزی گەلەکەم دەکەن.
خاڵێکی تر کە زۆر قوڵ بۆتەوە لە گفتوگۆ دروستکراوەکەدا ڕێکەوتنەکەی دەباشانە لە نێوان "گۆڕان و یەکێتی " کە ڕێک وەک ڕێکەوتنە ستراتیجێکەی نێوان "یەکێتی و پارتی "یه، کە کەسمان خاڵ و بەندەکانی نازانین، نازانین چی لە ناوەڕۆکی ئەو ڕێکەوتنەدایە، بۆیە دەبوو هەر یەکەم ڕۆژ کە :شاهۆسەعید "قسەکەری ڕەسمی گۆڕان دەستی لەکار کێشایەوە خاڵ و بەندی ئەو ڕێکەوتنە ئاشکرا بکرایە، بەڵام ئێمە دەزانین زیاتر سەروەت و سامانی پاچکارییه‌کەی یەکێتییە و پاراستنی خانەوادەکەی تاڵەبانییه دوای مردنی تاله‌بانی، بەهەمان شێوە ڕێکەوتنە ستراتیجێکەش هەمان خاڵبەندی لەخۆیدا حەشار داوە.
خاڵێکی تر کە لەجێگەی تریشدا ئاماژەمان پێداوە ئەوەیە، نەوشیروان مستەفا هەمووجارێک کە چاوپێکەوتن دەکات زیاتر وەک کەسێکی عێراقی خۆی نمایش دەکات و زوو زوو دەڵێ کوردستانی عێراق، ئەوەش بۆ ئەوەی دەرو دراوسێ ئاگادار بکات کە خەمیان نەبێت نایەڵم پەزەکە بخورێت، ئەمە چ کەلتورێکە ئەم سیاسیانە وه‌ک عیراقییه‌ک خۆووتەنی گۆشمان دەکەن؟ لای نەوشیراون زۆر گرنگە هەموو کێشەکان ببەستێتەوە بە مەرکەزەوە، واتە بەدەسەڵاتی بەغداوە، لەکاتێکدا بەغداد خۆی وەک برینی کێم و جەراعەت دەرکردوو وایە و نوقمی گرفت و کێشەی زۆر بووە.
ئێمە قسەمان لە سەر خودی ئەم گفتوگۆ دروستکراوە زۆره، بەڵام ڕادەوەستین و هۆکاری ئەم دەرکەوتنەی نەوشیروان مستەفا لەم کاتەدا دەخەینە ڕوو، دەزانین دەسەڵات دەیەوێت جارێکی تر خەڵکی هان بدەن بچنەوە به‌رده‌م سندوقەکانی هەڵبژاردن، گۆڕان و خودی نەوشیروان مستەفاش هەمان شتیان دەوێت بۆیە لەم کاتەدا زوو زوو له نێوان یەکێتی و پارتی، پارتی و گۆڕان، قسەلۆک دێتە ئاراوە، کە هاندەری خەڵک ده‌بێت بۆ ئەوەی ڕوو لە سندوقەکانی دەنگدان بکەن، لەکاتێکدا هه‌موو دیمان گۆڕان بە ٢٥کورسی هیچی پێنەکرا و هیچیشی پێ ناکرێت.
بەراستی کاک" بورهان مەجید "ی هونه‌رمه‌ند جوانی ووت: پێم بڵێن لە چ جێگەیەکی دنیادا دیکتاتۆر و گەندەڵ بە هەڵبژاردن لاچووە؟ قسه‌کانی بورهان مه‌جید سادە، بەڵام ڕاستگۆ، نەوشیروان مستەفا هیچی تازەی پێنەبوو تەنها ئەوە نەبێت خیانەتی ٣١ئاب و ئاشبەتاڵی بۆ کردینە هەڵەی مێژوویی. بۆیه منیش له‌گه‌ڵ قسه‌کانی کاک که‌مال جه‌مال موختار دام و ده‌ڵێم کاک نەوشیروان پێویسته، کە چیدی زووترە، هەروەک چۆن کۆمەڵەی رەنجدەرانی هەڵوەشاندنەوە و لێی چووە دەرێ، ئەمڕۆش ئاوا واز لە بزووتنەوەی گۆران بهێنیت و دەست لەکار بکێشێتەوە، واز لە سیاسەتیش بهێنێت، ببێتەوە بە میژوونووس، داوای لێبوردن لە گەلەکەشی بکات، لەوەی کە لە رابردوودا رووی داوە، با ئەمەش بکاتە کەلتورێک بۆ لێبوردن و لیخۆشبوون، چونکە مێژووی سەرانی کورد و ئەم حیزبانە پرە لە تاوان و خیانەتی نەتەوەیی.
(1) (نێرڤان) به واته‌ی دوورکه‌وتنه‌وه‌ی رۆح له له‌ش، هه‌روه‌ک چۆن ده‌روێشێک زیکر ده‌کات و ئاگای له خۆی نامێنیت.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
